9-11-пи декабриъ Мягьячгъалайиъ, «Урусат – йиз тарих» кIуру тарихдин паркдиъ «Региондин махлукьатлу хабрарин дакьатар цифрайин цIийи деврин шартIариъ: артмиш’валин рякъяр» ччвур тувнайи форум кIули гъябгъюра.
Форумдин дахилнаъди 9-пи декабриъ Дагъустан Республикайин Глава Сергей Меликовдин пресс-конференцияра кIули гъубшну. Республикайин кIулиъ айири СМИ-йин Форум ва китабарин фестиваль ачмиш апIбаъра иштирак’вал гъапIну.
Форумдин жюрбежюр секцйириъ уьмрин вари цирклариъ мюгькамди убчIвнайи цифровизацияйин шартIариъди региондин журналистика артмиш апIбан цIийи рякъярикан, хабрар тувбан аьдати дакьатар ва социальный сетар артмиш апIуваликан, жигьиларин яратмиш’валин удукьувалариз кюмек тувуваликан ва жара месэлйирин гьякьнаан сюгьбатар гъахура. Форумдин дахилнаъди жигьил журналистарин Х слетра кIули гъябгъиди.
Форум гъабхбан асас метлеб – журналистарин жямяаьтлугъ саб йишвахь сатIи дапIну, дурар чиб-чпин тажрубайихъди таниш хьуз гъитну, федеральный ва регионарин махлукьатлу хабрарин дакьатарин арайиъ аьлакьа тешкил апIувал, региондин хабрарин дакьатариъ гьамусдин деврин мялуматарин цIийи технологйир ишлетмиш ва артмиш апIбаз кюмек тувну, жюрбежюр регионариан вуйи махлукьатлу хабрарин дакьатарин жямяаьтлугъдин вакилар гележегдиъ сар-сариз ляхниъ кюмек апIбан рякъярихъди таниш апIувал ву.
Форумдиз вари Урусатдиан хялар дуфна. Дурарин арайиъ урусатдин мялуматарин ИТАР-ТАСС, «Интерфакс» агентствйирин, «Российская газета» хабрар чап апIбан федеральный дакьатдин кIулиъ айидар, Урусатдин журналистарин Союздин секретарар, СКФО-йин субъектарин вакилар ва республикайин махлукьатлу хбарар чап апIбан дакьатарин, гьадму гьисабнаан Урусатдин халкьарин милли чIалариинди чапдиан удучIвурайидаринра, кIулин редакторар а.
«Тарки-Тау» гъи СКФО-йиъ варитIан аьхю выставка-ярмарка ву гъапишра, кучIал даршул. 2021-пи йисандин му ярмаркайиъ Кабардино-Балкарияйин, Кафари Осетияйин, Чечен Республикайин ва Дагъустандин чапханйир ва китабар масу тувру тешкилатар сатIи духьна.
Шубуд йигъандин арайиъ кIули гъябгъюрайи форумдин секцйириъ республикайин гьюкмин улихь-кIулихь хьайидари, Урусатдин писателарин Союздин, милли китабар адагърударин Советдин, Урусатдин китабарин палатайин вакилари иштирак’вал апIура.
Фестивалин программайиъ китабар адагъру чапханйирин проектарин, китабарин презентацйир тешкил апIувал, писателарихъди ва документалистарихъди гюрюшар, литературайин ва китабар адагъбан месэлйириан яркьу лекцйир, Урусатдин милли республикйирин китабар адагъру чапханйирин совещание, художественный выставка ва жара серенжемар гъахувал а.
