Гьарсаб вахтназ чан игитар айиб ву. Гьаму девриъ дурар машариин лизи маскйир, бедендиин вирусдихьан уьрхру палат алабхьну лицура. Гьар йигъан дурар гъагъи тIягъвнихъди женгнаъ а. Гъи учу нубатнан ражари ихь духтрарикан ва медсестрйирикан улхурача.
Гьаму гъагъи вахтна, вари дюн’яйин махлукьатлу хабрарин дакьатаризси, «Табасарандин нурар» газатдизра, инсаниятдин сагъ’вал уьбхюри, коронавирусдин тIягъвнихъди женгнаъ айи ихь ватандаш духтрарикан, медсестрйирикан бикIувал аьдат дубхьна. Гъийин макьалайиъ узуз учву Табасаран райондин НичIрас гъул’ан вуйи, Воронежский областдин Павловск шагьрин госпиталиъ лихурайи Сибиржат Рашидовайихъди таниш апIуз ккундузуз.
Шубуд-юкьуд йис мидиз улихьна учу Сибиржат Рашидовайикан, шиърар дикIурайи медсестрайиканси, «Табасарандин нурар» газатдин машариъ макьала чап гъапIнийча. Дугъан яратмишарихъди учву танишра гъахьнийчва. Гъи ихь шураз шиърар дикIбиин машгъул хьуз затра вахт адар. Гьамусяаьт думу госпиталин уьру зонайиъ лихура.
«Павловск шагьриъ дявдин ветеранарин госпиталь ачмиш дапIну, 31 йис шула. Думу ачмиш гъапIу йигъланмина узу гьамушваъ медсестради лихураза. Сифте думу госпитализ анжагъ Ватандин Аьхю дявдин ветеранартIан кьабул апIудайи, кьяляхъна йисари афгъандин, чечендин, сирияйин дявйирин иштиракчйирра мушваз сагъ’вал мюгькам апIуз гъюри гъахьну. Коронавирусдин тIягъвнихъди аьлакьалу вуди шагьрин больницйириъ йишвар гьуркIри адрувализ лигну, ич госпиталра «уьру зонайиз» илтIибкIну. Гьелелиг госпиталь «уьру зонаси» либхури ими», – ктибтура Сибиржатди чан ляхникан.
Сибиржат Табасаран райондин НичIрас гъулаъ бабкан гъахьну. Мектебдин кьяляхъ дугъу Тверь шагьриъ медицинайин училище ккудубкIну. Кьюд йисан гъулаъ медсестради гъилихну, хъа, хал-хизан ккебгъбан кьяляхъ, чан уьмрин юлдаш ТIайибдихъди Павловск шагьриз яшамиш хьуз кючмиш гъахьну. Ватандихьан ярхла ашра, дурари багъри халкьдин дагълу аьдатар, намус, халкьдихьна, миллетдихьна вуйи гьюрмат, багъри чIал кIваълан гьархрадар, аьксина вуди, гьадму ата-бабйирин багьалу савкьатарин бинайиинди чпин велед Рашидра тербияламиш апIура. Гьяйифки, му ражари Сибиржатдихъди вуйи сюгьбатнаъ хизандикан, тазади дикIурайи шиърарикан, дугъан планарикан затра гъулхундайча. Ихь шуру ватанагьлийириз шлубкьан чпи вирусдихьан уьрхюз, прививкайихьан гучI дарапIуз дих апIурайи.
«Узу гьарсар касдиз чан сагъ’валин гъайгъушнаъ хьуз дих апIураза. Узура, ва ич госпиталиъ лихурайи 300-дихьна духтрарра ва медицинайин имбу вакиларра му уьзриан аьзарлу гъахьунчу. Машниин маска алабхьури, бедендин иммунный гъурулуш мюгькам апIру витаминар ишлетмиш апIури ккунду. Духтрарихьна душну, сагъ’вал ахтармиш дапIну, прививка апIинай. Гъи вари духтрари прививка апIбан теклиф дивра. ИкибаштIан, сумчрарихьан, саламариз гъягъбахьан, аьхю кьадар инсанар сатIиди уч шлу йишварихьан сацIиб ярхлади гъузну ккунду. Мициб хяви вирус гьелелиг гъабхьиб дар. Коронавирусди учу мюгьтал апIурайиб гьадму вуки, думу, инсанси, фикир айи-бси гьибгъру. «Уьру зонайиъ» лихури, кьюд йистIан артухъ вуйич. Гьарсаб больницайиъси, учухьра уьзур ахтармиш апIура, дидин зиин гюзчивал гъабхурача. Сабдикан пуз ккундузузки, коронавирусдин уьзур инсандин психикайиз тясир апIруб ву. Ич тажрубайиъ хайлин гьамцдар дюшюшар алахьура Мисалназ, иццру гъахьири уьзрихъди женг дурубхди, аьксина, учв лап гъагъи гьялнаъ айиваликан, сагъ даршлуваликан, учвра уьзриан кечмиш хьидикIан кIури, фикрар апIуруш, думу, дугъриданра, бицIи вахтнан арайиъ лап гъагъи гьялназ гъюру. Гьаму жюрейиинди чпи гъахру аьзарлуйирин аьхюнубсиб пай кечмишра шулу. Хъа, аьксинучхьан 10 йигъандин арайиъ аьхю температура ис апIуз шуладаршра, гьяфтйириинди реанимацияйиъ дахънайидари, уьзрихъди фикриинди женг гъабхури, диди чпи мютIюгъ апIуз гъитри адрудар сагъ шулу. Гьаддиз уьзрихьан гучI мапIанай. Ичв сагъ’вал уьбхбан женгнаъ йихьай.
Учу сацIиб рази апIурайиб гьадму вуки, гьамусяаьт Воронежский областдиъ аьгьвалат къайдайиз гъюз хъюбгъна. Коронавирусдин тIягъюн ачмиш гъабхьиган, хайлин духтрар ва медсестрйир ляхнариан удучIвури гъахьнийи. Думуган, духтрар ва медицинайин саб йишваъ лихурайи гъуллугъчйир гьуркIри адру вахтна, хайлин гъагъиди алабхъунчуз. Аьхириъ духтрар ва медсестрйир ляхнариан удучIвну, дурар хулаъ ашра, коронавирусдиан иццру духьну, учу сагъ апIури гъахьунча. Чухсагъул пуз ккундузуз госпиталин кIулиъ айидариз. Дурари гьадму гъагъи вахтна ва гьамусяаьтра учу, ич сагъ’вал ва хатIасузвал уьбхбан бадали, лазим вуйи вари алатарихъди тямин апIура», – гъапну Сибиржат Рашидовайи сюгьбатнан аьхириъ.
Учу яв теклифариз фикир тувурча, Сибиржат. Уву ва гъи увухъди сатIиди «уьру зонайиъ» айи, лизи палат али вари малайикар Аллагьди уьрхри.
