«Урусат – мумкинваларин уьлке» АНО-йин (Автономная некоммерческая организация) проектдин «Урусатдин регьбрар» конкурсдин региондин финалиъ Кафари Кавказдин ургур вакил гъалиб гъахьну. Дурар 2022-пи йисан кIули гъябгъру суперфиналин иштиракчйир хьиди ва жара федеральный округариан вуйи гъалибчйирихъди талитназ удучIвиди.

 

 

Гъалибчйирин арайиъ ихь ватанагьли, РД-йин Главайин ва Правительствойин тешкиллувалинна проектарин управлениейин экономикайин ва финансарин отделин начальникдин заместитель Эльнара Исламовара а. Учу Эльнара Аьгьмедовнайихъди сюгьбат гъубхунча ва думу газатдин машнаъ чап апIурача.

– Эльнара Агьмедовна, «Табасарандин нурар» газат урхурайидариз увухъди таниш хьуз ккунди а. Уву наънан вуш, фуну ляхниин машгъул духьнаш, учуз кидибтуб ккун апIураза.

– Узу Псковский областдин Псков шагьриъ бабакан гъахьунзу. Йиз абйир-бабар Табасарандиан ву. Псков шагьриъ экономикайин ва алверчивалин бинайикан аьгъювалар тувру 10-пи нумрайин лицейдиъ урхури, кми-кмиди олимпиадйириъ иштирак шули гъахьунза. Мектеб ужудар аьгъювалар ади, гъизилин медалиинди ккудубкIунза. 10-пи классдиъ урхурайиган, областдиъ кIули гъубшу экономикайиан вуйи олимпиадайиъ гъалибвал гъадабгъбаз лигну, узу Псковдин гьюкуматдин институтдиз кьабул гъапIнийи. Амма, хизан багъри Дагъустандиз кючмиш хьувалихъди аьлакьалу вуди, саб имтигьян тувну, Дагъустандин гьюкуматдин университетдин экономика идара апIбан факультетдик урхуз кучIвунза. Харижи уьлкйирин чIалар аьгъю апIувалихъ юкIв хъайиз, гьаддиз университетдиъ английский ва немецкий чIалар аьгъю апIувалра давам гъапIунза. Университетдиъ ужудар аьгъювалар ва уьру диплом гъадабгъунза.
ДГУ-йиъ шубубпи курс ккудубкIбан кьяляхъ, «Фирма АС» коммерцияйин тешкилатдиъ отделин начальникди лихуз хъюгъну, яваш-явашди фирмайин кIулиъ айи бухгалтерин гъуллугъниинакьан удучIвунза.

– Эльнара Аьгьмедовна, ихь республикайиъра кадрйирин конкурс кIули гъубшнийи. Уву думу конкурсдиъ иштирак гъахьундайва?

– Гьелбетда, 2018-пи йисан республикайин кадрйирин конкурс кIули гъябгъруган, узу дидиъ иштирак духьну, гъалибчйирин арайиъ айза. Гьадму конкурсдин натижйириз лигну, узуз Дагъустан Республикайин Главайин ва Правительствойин администрацияйиъ экономикайин ва финансарин отделин начальникдин заместителин гъуллугъ теклиф гъапIнийи. Гьамци узу гьюкуматдин ватандаш гъуллугъниина гъафунза. 2018-2019-пи йисари «Аьтрафарин гележегдин артмиш’вал» (магистр делового администрирования) МВА-йин программайиинди аьгъювалар гъадагъну, «2025-пи йисаз Каспийск шагьрин артмиш’валин стратегия» проект гьязур апIбаз лигну, 2020-пи йисан РД-йин Правительствойин Гьюрматнан грамотара тувунзуз.

– Яв фикриинди, гьаму жюрейин конкурсарин метлеб фу ву?

– 2021-пи йисан «Урусатдин регьбрар» конкурсдиъ иштирак хьуз ният гъапIнийза. «Урусатдин регьбрар» – му сифтена-сифте образованиейин конкурс ву. Гьаму жюрейин конкурсар инсандиз айи аьгъювалар, идара апIувал, тешкиллувалин мумкинвалар ачмиш апIру майдан ву. Гъалиб гъахьидариз 1 миллион манатдин образовательный грант ва хъуркьувалиинди ляхин гъабхурайи касдин регьберваликкди ляхин апIуз мумкинвалра тувру.
Конкурс швнуб-саб паярикан ибарат ву: аьрза тувувал, видеоинтервью, манзилнаъди тестариз жавабар тувувал, идара апIувалин табшуругъар тамам апIувал ва къанун аьгъяди хьувал.

– Конкурсдиъ иштирак хьуз ккунидарин кьадар аьхюб вуйин?

– Гьаму йисан уьлкейин вари регионариан конкурсдиъ иштирак хьуз ккунидарин терефнаан 180953 аьрза гъафнийи. Конкурсдин манзилнаъди гъубху пайнан кьяляхъ, конкурсдин очно гъабхру пайнахьна 3987 кас деетнийи.
Конкурсдин нубатнан пайнаъ иштирак шулайи Кафари Кавказдин округдин 118 ва Кьибла федералин округдин 172 вакил 2-5-пи декабриъ Ростов-на-Дону шагьриъ гюрюшмиш гъахьнийи. Шубуд йигъандин арайиъ швнуб-саб ражари дигиш гъапIу командйирин дахилнаъди иштиракчйири жюрбежюр месэлйир гьял апIури гъахьну. Экспертари, иштиракчйирин ляхнин натижайиз лигури, айи аьгъювлариз кьимат туври гъахьну.

– ЮФО-йин 17 ва СКФО-йин 7 вакил, гьадрарин арайиъди увура, гъалиб гъахьунчва. Гьамус жара регионарихъди вуйи конкурс фила кIули гъябгъюру?

– Уьлкейин вари регионарин конкурсариъ гъалиб гъахьи 300 кас, иштирак хьиди, гьадму гьисабнаъди узура, 2022-пи йисан суперфиналиъ, гьаму жюре конкурсари учуз уьлкейин жюрбежюр йишвариан дуфнайи бажаранлу инсанарихъди таниш хьуз мумкинвал тувра. Узу Дагъустан Республикайикан ктибтури гъахьунза. Думу конкурсдин йигъар гизаф шадди кIули гъушнийи, инсанарихъди гъуху гюрюшар, сюгьбатар гьичра кваълан дурушур.

– Конкурсдиз гьязур шлуган, варитIан читинди фуну месэла алабхъунвуз?

– Эгер йиз гьязурлугваликан улхуруш, варитIан гизаф вахт къанунар аьгъю апIбаз харж гъапIунза. Республикайиъ кIули гъушу ва жара конкурсариъ иштирак шлуган, гъарашугъарин теклифари гизаф кюмек гъапIунзуз. Хусуси метлеб айи курсариъ гъурхундарза, фицики, йиз фикриинди, гьарсар касди жвуваз айи мумкинвалар улупну ккунду. Суперфиналиъ «Насигьятвал» проектдиъ иштирак хьидиза. Ич метлеб – «Урусат – мумкинваларин уьлке» платформайин конкурсарин финализ удучIвдарикан сар насигьятчи кадагъну, гьадгъаз жвуваз айи идара апIбан тажрубайикан мялуматар тувувал ву.

– Газат урхурайидариз яв гележегдин планариканра цIибди ктибтуб ккун апIураза.

– Багахь гележегдиз вуйи йиз вари планар суперфиналихьна гьязур хьувалихъди аьлакьалу ву. Федеральный дережайиъди Дагъустан Республикайин вакил хьувал – важиблу ва аьхю жавабдарвалин ляхин вуди гьисаб апIураза. Гьацира гъюру йисан, суперфинализ удучIву гьарсар касдиси, гъадабгъу образованиейин грантдихъ аьгъювалар гъадагъувал ккебгъувал планламиш апIураза.

– Эльнара Аьгьмедовна, сюгьбатнан аьхириъ деврин жигьилариз фициб насигьят тувуз шлвухьан?

– Ихь уьлкейиъ, республикайиъ конкурсарин платформйириъ иштирак’вал апIуз шлу, гизаф жюрейин удукьувалар айи жигьилар а. Дурариз деврин цифрайихъди аьлакьалу цирклариъ жюрбежюр хъуркьувалар а. Мектебариъ урхурайидарикан, студентарикан, гучI дарапIди, олимпиадйириъ, проектариъ иштирак хьувал ккун апIураза. Саб ражари иштирак хьувал цIиб ву, дишлади гъалиб дархьузра мумкин ву. Кьяляхъ зигувал лазим дар, хъуркьувал дишлади гъюруб дар. Хъуркьувалихьна вуйи рякъ читинуб ву, вушра, улихь месэла дивну, думу гьял апIуз мумкинвалар дагну ккунду.
Мисал вуди гъадабгъуруш, узу 10 йисаъ айи шуран дада вуза. Узу дугъаз бицIи вахтнахъанмина жюрбежюр конкурсариъ, олимпиадйириъ иштирак хьуз улупураза.

– Эльнара Аьгьмедовна, маракьлу сюгьбат гъабхбаз чухсагъул, яв кIваъ айи хиялар кIулиз удучIврияв, суперфиналиъ гъалибвал гъадабгъну, уву ич редакцияйиз хялишди гъуруганси ибшри.