Декабрин 15-пи йигъан РД-йин Правительствойин председатель Аьбдулпятягь Амирхановдин регьберваликкди кIули гъубшу заседаниейиъ региондин аьтрафариин уьмриз кечирмиш апIуз планламиш дапIнайи инвестицйирин проектариз гьюкуматдин терефнаан кюмек тувбан месэла гьял гъапIнийи.
Дагъустандин региондин инвалидариз кюмек тувбан «Нивгъар адру уьмур» ччвур тувнайи жямяаьтлугъ тешкилатди сакьатвал кайи бицIидариз ва жигьилариз йигъандин вахт адапIру, жямяаьтдин арайиъ вердиш хьуз, жвуваз хъайивал апIуз ва удукьру жюрейин зегьмет зигуз улупру Центр тикмиш апIбанди ву. «Нивгъар адру уьмур» ДРОО субсидйир гъадагъру тешкилат ву. Центр юридический ва физический касарихьан уч дапIнайи рягьимлувалин кюмекнан дакьатарихъ тикмиш апIиди. Гъагъи сакьатвал кайи 100-хьна бицIидар центриз кьабул апIбанди ву. Йигъандин вахт адапIру центрин хуларин проект гьязур дапIна. Тешкилатди Правительствойин членарикан центр дивуз жилин участок жара апIувал ккун гъапIнийи.
Правительствойин членари проектдин тешкилатчийиз Мягьячгъала шагьрин «Ветеран» микрорайондиъ жилин участок жара апIувал дюз вуди гьисаб гъапIну.
Гьаму жюрейин къарар жара проектарин гьякьнаанра кьабул дапIна. Дурарин арайиъ Докъузпара райондиъ «Урус ярмаркйир — Кьибла тереф» оптово-логистический центр тикмиш апIувалра а. Думу проект уьмриз кечирмиш апIбан натижайиъ 101 касдиз лихру йишвар ачмиш хьиди.
Дагъустандин Огни шагьриъ 10,5 гектарин йишв’ин сабсан проект уьмриз кечирмиш апIбанди ву. Думу шире, мер, жюрбежюр нектарар гьясил апIбан проектдин тешкилатчи «Хазар» ООО ву. Проект уьмриз кечирмиш апIбан натижайиъ 103 касдиз лихру йишвар ачмиш апIиди. Пландиинди гьаму проектдилан вари дережйирин бюджетариз 1,813 миллион манат гъибди.
Дербент райондиъ 132,3 гектарин жилиин «Флора» ООО-йи мейвйир артмиш апIбан цирклин проект уьмриз кечирмиш апIбанди ву. Душваъ гьарган лихурайи 26 касдиз ва хьадукран, хьадан ва чвлин фаслариъ лихурайи 100 касдиз йишв хьибди.
Министрарин кабинетдин членари Правительствойин заседаниейиз адагънайи вари проектарин теклифарин гьякьнаан чпин разивалин къарар адабгъну.
