Улихьнаси Москва шагьриъ, Кирилл Романцевдин рюгьназ бахш дапIну 18-20 йисандин яшар духьнайи жигьиларин арайиъ самбойиан сабпи йишв бадали кIули гъушу талитариъихь ватанагьли, Табасаран райондин Хюрикк гъулан вакил, Ивановский областдин Кинешма шагьриъ яшамиш шулайи ва МГУ-йин 2-пи курснаъ урхурайи студент Мягьмуд Къурбановди 1-пи йишв гъадабгъну.
Му талитариъ Мягьмуд 6 ражари 79 килойихьна гъагъишин айи спортсменарихъди кчIихуз удучIвну, гьадму гьисабнаан грепплинг спортдиан вари дюн’яйин чемпиондихъди ва самбойиан Урусатдин чемпионатдин пешкешнан йишван сагьибдихъди.
Му талитариъ гъалиб хьпаз лигну, табасаран спортсмен 2022-пи йисан спортдин самбойиан Казань шагьриъ кIулиъ гъябгъру Урусатдин чемпионатдиъ иштирак хьуз Москвайиан уч дапIнайи командайин дахилназ гъадагъну.
Мягьмуд Къурбановдикан учу сачра газатдиъ мялумат тувнийча. Учв кIубан спорсмен вуйивализ лигну, гьар йисан ужудар натижйир улупури, дугъу учура чакан бикIуз мажбур апIура. Гъит дугъаз гъележегдиъ хъанара аьхю хъуркьувлар ишри.
