Магьа 2021-пи йис аьхирихъна дуфна, амма инсанарин кефйир сефилди ву. Ухьуз мялум вуйиганси, 2020-пи ва 2021-пи йисарин арайиъ коронавирусдин уьзри лап гизаф кьадар инсанар гъирмиш гъапIнфу. Саспи хизанариъ аба-баб, чвйир-чйир, абана бай, шлин кьюрид веледар ва хайлин жара инсанар кечмиш духьна. Жямяаьтдиъ ва мяишатдиъ кьадар жигьатнаан шулайи дигиш’валарин мициб аьгьвалат гъябкъиган, иццрушнан гьамцдар натижйир дархьбан бадали, ухьу вари чалишмиш духьну, варидари саб гаф дапIну, вакцинайин рубар йивну ккунду.
Ццийин йисандин аьхириъ Дагъ.Огни шагьрин ЦГБ-йин кIулин духтир Жамиля Важибовайи, Дербент шагьрин ЦГБ-йин кIулин духтир Девлетхан Мирзахановди ва Дербент райондин ЦРБ-йин кIулин духтир Рашид Чупановди чпихь коронавирус уьзриан кетIерццнайидарин кьадар ва вакцинайин рубар йивбан гьял фициб вуш, узуз ктибтну.
Дагъ.Огни шагьрин ЦГБ-йин кIулин духтир Жамиля Важибова:
– Дагъ.Огни шагьриъ коронавирусдиан кетIерццнайидарин кьадар 24 кас ву. Гъубшу йисаз гъилигиган, ццийин йис думукьан читнуб дайи. Гьамусяаьт шагьриъ дуланмиш шулайи аьхю пай инсанар вакцинайин руб йивуз гъя-гъюра, му ляхниин учу, духтрар, фукьан вушра рази вуча. Магьа, гъийин гьисабариинди, вакцинайин руб гъивдарин кьадар 8910 кас ву, миди 42 процент тяйин апIура. Сабпи ражари вакцинайин руб гъивдари хъанара кьюбпи ражарира думу йивувал текрар апIура.
Дербент шагьрин ЦГБ-йин кфIУлин духтир Девлетхан Мирзаханов:
– Дербент шагьриъ коронавирусдиан кетIерццнайидарин кьадар 53 кас ву. Хъа вакцинайин руб гъивдар 27100 кас, дурари руб йивну ккунидарин кьадарнакан 34,6 процент тяйин апIура. Прививкйир йивбан мициб цIиб процент хьувалин асас себеб – гьамусяаьт кетIерццну госпиталиъ дахънайидарин гизаф пай чпин яш 60 йислан зиина вуйи касар вуйивалихъди аьлакьалу ву. Яшлуйириз вакцинайин руб диривбан асас себебра гьаддихъди аьлакьалу вуки, дурарикан шлик сахарный диабет уьзур ка, шлин гурдмар иццура, хайлиндар жара хатIалу уьзрариан аьзарлу ву. Дурариз гьаруриз чан участокдин духтир а, ва кайи иццрушназ лигну, вакцинайин фициб руб йивну ккундуш, гьадгъахъди мясляаьт дапIну ккунду. Хъа гизаф пай яшлуйирихъди вакцинайин руб йивбан гьякьнаан читинди алабхъурачуз. Дурар гъаврикк ккауз гъагъиди ву. Гьаддиз ковид-госпиталиъ вари ккаънайидарра яшлу касар ву. Мялум апIурача, вакцинайин руб йивну, гьелелиг яшлуйирикан кечмиш гъахьир адар. Гъюрматлу Дербент шагьрин агьалйир, учвкан вакцинайин руб йивувал ккун апIураза.
Дербент райондин ЦРБ-йин кIулин духтир Рашид Чупанов:
Дербент райондин ЦРБ-йиъ GOVID-19 узриан кетIерццнайидарин кьадар 31 кас ву. Му 31 аьзарлуйирикан 12 кас ЦРБ-йиъ ккаънайич. Хъа улихьнаси ковид больницйир Падар гъулаъ ва Билижийиъра айи. Гьамус Билижийиъ айи больница хъябкъюнча. Думу хъябкьбан себебра кетIерццнайидарин кьадар цIиб гъабхьивалихъди аьлакьалу ву. Гъийин улупбариинди, Дербент райондиъ вакцинайин руб йивнайидарин кьадар 30409 кас вуйич. Му ляхин жанлуди кIули гъябгъюра. Райондин гъулариъ айи участокарин духтрарира инсанарихъди ляхин гъабхура. Ва гьацира узура, гьар гьяфтайиъ гъягъюри, илтIикIури шулза.
