Коронавирусдиз аькси прививкайин руб йивувалин мянфяаьтлувалин гьякьнаан инсанар гъаврикк ккаъри, гьаму суал хьади узу гизафдарихьна илтIикIунза. Узу гьерхувал гъубху агьалйирин арайиъ 2020-пи йисхъанмина грипп жюрейин уьзур ктрубчIву кас гьич саркьан имдайи. Дурарикан аьзарлу гъахьидарин аьхюну пайну чпик коронавирусдин уьзур кубчIвувал лабораторияйин ахтармишари тасдикь дапIнайиваликан гъапнийи. Хъа тмуну пайну, гъагъиди аьзарлу гъахьнушра, чпи духтрихьна анализ тувуз дурушувалра жин апIурадайи.
Коронавирусдин сар инсандикан тмунурикна тарабгъру уьзур ихь республикайиз гъафихъан мина 23-пи декабриз вуйи улупбариинди, Дагъустандиъ 64908 касдик думу уьзур кубчIвну, гьадму кьадарнакан 3132 кас гъийихну. Гъийихдар вари кьабидар, жара уьзри гьитнайидар дайи. Дурарин арайиъ яшайишдин ужудар чагълариъ айи, уьмрихъ бегьем улар хъимбу, ужуб ляхнин кIулиъ айи, касибвал ктру инсанар гизаф айи. Гьаци вушра, бязидар уьзур айивалихъ хъугърадар ва гъийин йигъан арайиз дуфнайи аьгьвалат гьюкмарин ва духтрарин аьмалдар тIуларси гьисаб апIура.
Гьюрматлу ватандашар, уьзур а, ва думу гьамусра гьяракатниинди тарабгъура. Аьхиримжи йигъан ва йишван 139 кас аьзарлу духьна. Аьзарлу гъахьидарин арайиъ, бицIидарилан гъадабгъну, лап кьабидарра а. Уьзри сар каскьан ккадаурадар. Садар касар пучIуди иццру шула, тмундар – гъа-гъиди, хъа бязидар уьмрихьан шула. Гьаддиз духтрарин теклифар кьабул апIувал ккун апIурача, вакцинайин рубар йивай, коронавирусди учву умрихъ мягьрум апIуз мигъитанай. Эгер Урусатдиъ адабгънайи вакцинайиин хъугъ’вал алдарш, харижи уьлкейин вакцина масу гъадабгъну, дидин руб йивай. Фу чара дапIнура, уьзри учву ккагъуз мигъитанай.
Узу инсанарин арайиъ гъуху гьерхуваларикан бязидарин жавабар исихъ туврача.
Аминат Нурмягьямедова, 39 йис:
– Узуз вакцинайин руб йивуз ккундарзуз… Узу затра аьзарлу шлур дарза, ижми сагъламвал хъайир вуза, белки, думу рубди йиз бедендиз чIуру зарар тувур. Гьелелиг узу, аьзарлу гъахьишра, рубар, дармнар ишлетмиш дарапIди сагъ шулазу. Хъа бегьем сагъ’вал хътрудари, рубар йивну, чпин иммунитет за апIри.
Аьйшат Нариманова, 54 йис:
– Узу коронавирусдиан аьзарлу гъахьунзу. Уьзур кубчIвиган, лап гъагъиди алабхъунзуз. Бедендин температура ис апIуз даршлуган, больницайиъра дахъунза. Капельницйир апIури, рубар йивури 15 йигъан дахъну имийза. Гьяфтайик саб ражари анализра тувуйза, коронавирус кимдрувал тасдикь гъабхьиган, духтрари больницайиан деетунзу. Уьзрин кьяляхъ бедендин кефйир адарди, хъюхъниз ниъ дяргъюри, 3 ваз гъабхьнийиз. Думу уьзри узуз гизаф гучI ккапIну. Сабсан ражари думу уьзур кубчIвиш, узхьан аьх апIуз хьибдар. Гьаддиз, уьзриан сагъ духьну, 6 ваз улдубчIвиган, узура, жилирира, баярира вакцинайин рубар гъивунча. Гьадди учу уьрхюр кIури, умуд киврача.
Надим Сефербегов, 26 йис:
– Узу мектебдиъ мялмимди лихураза. Сагъламвалин аьгьвалат харжиб дариз. Хъа мектебдиъ айи вари баяр-шубар сабсдар дар. Гьар йигъан дурарихъди гюрюшмиш шулаза, дурари чпин хул’ан уьзур хуб мумкин ву. Мектебдин директори цIибди мажбурра гъапIну, гьаддиз узу вакцинайин руб гъивунза. Руб йивубсира гъабхьундарзуз, бедендин температура за гъабхьундариз. Узухъди лихурайи гизаф мялимари рубар гъивну, хъа сасдари руб йивуваликкан аьмалдарвалиинди кIул ккадабгъну.
Гьелбетда, ижми сагъ’вал хъайи касар гизаф а. Хъа варидарин сагъ’вал сабсиб дар, гьаддиз ухьу ихь гъвалахъ хъайидариканра фикир дапIну ккунду. Уьзур тарабгъувал яваш апIбан бадали, 80 процент агьалйири вакцинайин рубар дивну ккунду. Хъа гьеле ихь респуб-ликайиъ 40 процент агьалйиритIан рубар дивнадар. Имбу 40 процентсан тамам хьуз учвура пай кивай.
