Улихьнаси Дагъ.Огни шагьриъ дуланмиш шулайи жямяаьтлугъ кас, дирбаш бай Фикрет Шихгьяфизов (шиклиъ) кечмиш гъахьну кIури, пашман хабар кубкIунзук.
Фикрет Шихмягьямедович Шихгьяфизов 2019-пи йисхъанмина таниш вуйзуз. Думу «Табасарандин нурар» газатдинра вафалу дуст вуйи.
Фикрет Дагъ.Огни шагьриъ Шихгьяфизоварин аьхю хизандиъ бабкан гъахьну. Бедендик сакьатвал кашра, думу хизандиз ва жямяаьтдиз хайирлу кас вуйи. Гьяйифки, Фикрет багъри шагьрин жямяаьт бадали апIуз имбу ляхнар кIваъ имиди, ухди уьмриан гъушну.
Фикретдин текелиф капIуз Дагъ.Огни шагьриъ дуланмиш шулайи дугъан аьхюну чи Нефизат Амировайихьна гъушнийза.
– Нефизат Шихмягьямедовна, Фикрет фицир кас вуйи?
– Фикрет ич хизандиъ варитIан бицIину бай вуйи. Учу шубур чве ва юкьур чи вуча. Думу ДЦП уьзур кади бабкан гъахьнийи. Хъа чав жандихъ зяифур вушра, фагьумлу, варибдихьна гьевес кади янашмиш шлур вуйи. БицIидиган дугъу учкан, чаз китабар, шиърар, художествойин литература урхай кIури, гьаммишан ккун апIуйи. Мектебдиз гъягъру вахт гъабхьиган, дугъаз хулаъ дарсар кивувал тешкил гъапIнийча. Ва гьамци урхуз-бикIуз дудубгъну, дугъу чан аьгъювалар сагъу ва шикаствал кайи инсанариз кюмек апIбаъ ишлетмиш апIуз хъюгънийи. Бедендин зяифур ву дупну, ухьу саспи вахтари шикаствал кайи инсанарин ляхнариз фикир тувурдархьа, амма ихьтIан дурарин зигьимлувал, ляхнарихьна вуйи гьевеслувал артухъди шулу.
Пуз ккундузузки, йиз гъардаш, ликар ккадаршра, инсанар, жямяаьт бадали гизаф ликар алдагъу кас вуйи. Ич абйир-бабар Чеховдин ччвурнахъ хъайи кючейиъ варитIан кIулиъ дуланмиш шулайи. Хъа Фикрет гьаммишан коляскайиъ айи. Ич кючейин рякъ ужуб дар ва чазра читинвал кайиз кIури, думу Дагъ. Огни шагьрин глава Жалалудин Аьлирзаевдихьна илтIикIнийи. Саб бицIи вахтналан, Чеховдин ччвурнахъ хъайи кючейиин асфальт улубзура кIури, хабар гъабхьнийи.
Гъи, узуз айи мялуматариинди, Дагъ.Огни шагьриъ бедендик шикаствал кайи 2 агъзур инсанар а. Фикретдин гьадму вари инвалидарин кьадар ва дурарин ччвурар кайи дафтар айи, дидик йиз чвуччву думу касарин дердерикан ва метлебарикан дибикIну шуйи. Дурариз лазим вуйи шейъ, адру дармнар, Мягьячгъалайиз хабар дапIну, тялукь идарйириз илтIикIну, дугъу кетIерццнайидарихьна рукьури гъахьну. Фикрет гьаммишан варидарин гъайгъушнаъ айи, ужур чве вуйи ич. Амма чав думукьан ярхи уьмур хъапIундар. Кечмиш шлу вахтна дугъан 36 йистIан дайи.
Дугъриданра, Фикретди варидарин кIваъ ужувлан шил гъибтну. Инсан кетIерццну ашра, зяифди вушра, саб вахтнара кIул ис дапIну ккундар. Фикрет Шихгьяфизовди чан уьмриинди му гафар дюзидар вуйивал субут гъапIну.
«Табасарандин нурар» газатдин коллективди Фикрет Шихгьяфизовдин хизандиз ва багахьлуйириз дерин башсагълугъвал ккун апIура.
