Ктабхъурайи йисан «Ужуб ерийин хатIасуз рякъяр» милли проектдин дахилнаъди Дербент–Хючна–Хив республикайин мяна айи рякъюн Дербент райондин Жалгъан гъул’ан Табасаран райондизди гьидицру йишвхьан зина 16 километрин рякъ рас гъапIну кIури, Дагъустан Республикайин транспортдинна рякъярин мяишатдин министерствойин пресс-гъуллугънаан хабар тувра.

Му рякъ, Табасаран райондин центриз гъябгъюрайи асас рякъси, саб манигъ’валра адарди имбуну гъуларизра машин хъапIуз мумкинвал туврайи ва гьацира район, жара муниципалитетарихъдиси, Мягьячгъалайихъдира, «Кавказ» М-29 федеральный мяна айи трассайихъдира сатIи апIурайи рякъ ву.
Улубзнайи асфальт чIур дубхьну, рякъюъ ичIар ади, хъаърайи машинариз зарар шули, ва чав рякъра ккуруди вуйивализ лигну, улихьган душваъ кми-кмиди хатIалувалин дюшюшарра арайиз гъюри гъахьну. Гьаму далилар ва райондин агьалйирин фикрар гьисабназ гъадагъну, рякъ чIур дархьбан бадали ккиврайи геосеткара кьюб жарди ккивну, гъваларихъди шид гъябгъру, инсанар гъягъру йишварра хъади, рякъ’ин къанундиъ улупнайи-бсиб ягълишнаъди ерийин асфальт улубзну, Дербент–Хючна–Хив рякъ рас гъапIну.

Дербент–Хючна–Хив рякъюхъди жара рякъяр сатIи шулайи йишварра къайдайиз гъахну. Мидланра гъайри, рякъярихъди машин хъапIруриз мялуматар кади шлу лишнарра цIийидар дивну ва инсанар рякълан улдучIвру йишварра тяйин гъапIну.

Къайд дапIну ккундуки, му рякъ туристар гъягъюрайи, республикайин кьибла терефназди айи асас рякъярикан саб ву. Аьхиримжи йисари республикайиз гъюрайи туристарин кьадар швнуб-саб ражари артухъ дубхьна. Табасаран райондизра тарихнанна архитектурайин ва табиаьтдин ядиграриз лигуз хайлин хялар гъюра. Гьамусдихъантина, рякъяр айивализ лигну, райондиз гъюрайи туристарин кьадарра артухъ хьибди.