Швуваз хъаърайи шураз насигьят тутрувруб анжагъ гъуншдин аьхъиъ дибтIнайи хюни ву. Хъа инсанарин арайиъ баярихьна вуйи гьиссар рякъруган, дурариз уьмур хъапIбан вари асулар аьгъюганси, хиял шулу.

 

 

Дишагьлийиз бицIидихъанмина ебхьруб ву: «Яв жилириз гьюрмат апIин, дугъан хал, палат ва ликариин алахьрудар марцциди уьрх. Дугъу гъазанмиш гъапIу пул гьавайиди пуч мапIан. БицIидариз хъайивал апIин, хъа аьхюдариз – гьаммишан гьюрмат» гафар ву. Му макьалайиъ шураз кIуру гафарин гьацIкьана ктухуз даршул. Думу вари буржйир кIваълан гьадрархузра хайлин жафа дизигну ккунду.

Вари хъайи-хъайиганси шлихьан апIуз шулухъа? Жямяаьтлугъдин фикриинди – баярихьан. Гьаци дарш, гьаз дурариз сар касдира чиб хизандиъ фици духну ккундуш кIурадар. Фицики хизандин эйсийин вазифйир анжагъ пул гъазанмиш апIувалиинди ккудукIурадар, вушра гьадмура дарапIрудар гизаф а. Хъа швушваз гьюрмат апIин, кIуру кас тек-бирра дихъурдар.

Йиз фикриан, гъийин вахтна, гьаму гъалатI себеб вуди, гизаф хизанар ккадахьура. Гьаз гъалатI? Гьаз гъапиш, шуразси, гьадму бализра бицIидихъанмина насигьят тувну ккунду. Гизафдари пуб мумкин ву: «Ихь аьдатариинди, гагайи жвуван кюлфетдихьна вуйи гьиссар улупну ккундар». Ав, улихьна вахтари гьаци гъабхьну, хъа гъийин заманайи улихь жара тIалабар дивра.

Компьютерари, телефонари ва жара техникайи инсанарин сар-сарихъди вуйи аьлакьйир кам апIура. Гьаддиз гюре баяриз ужудар хизанарин кIулиъ айидарихъди гаф-чIал апIувал метлеблу ляхин вуйиваликан мялум дапIну ккунду. Мидихъди сабси, жвуван веледарихъди гаф-чIал апIувалра кIваълан гьархну ккундар.

Саб хизандиъ айидар сар-сарихъ хъпехъури, чпин арайиъ гьюрмат уьбхюри гъахьиш, думу хизан ккададабхъур. Хъа, дици хьпан бадали, инсанарин арайиъ анжагъ шураз ваъ, бализра насигьят тувру аьдат тарабгъну ккунду. Думу ляхин тухмарикан фунури дапIну ккундуш, жямяаьтлугъди тяйин апIри.