1998-пи йисан декабрин 30-пи йигъ вуйи. Узу дадайихъди сатIиди автобусдиъди хулаз гъягъюрайза. Пашманвал, кризис, касибвал – яшамиш хьуз гизаф гъагъиди вуйчуз. ЦIийи йис улубкьурайи, амма учуз я ёлка, я мандаринар, я пешкешар масу гъадагъуз пул адайчуз.

 

 

Автобусдиан эдеъну, ликри хулаз гъягъру рякъюъ йиз юлдаш Камилайин адаш алахъунчуз. Дугъу дадайихьан йиз ляхнар фици вуш гьерху, Камилайикан ктибту ва ёлка гъабалгнуш суал туву. Учу, ёлка январь вазлиъ, пулсузди ккабхъиган, ккабалгурча кIури, зарафатар гъапIнийча. Гьадму сюгьбатнан кьяляхъ, думу чпин хулазди, учу ич терефназди жара гъахьича.

Декабрин аьхиримжи 31-пи йигъан хябяхъган ич раккнарик шли-вуш кучу. Абццурча – ёлка! Камилайин адашди учуз ёлка ва мандаринар хьади гъафну. Мандаринар, ёлка, шадвал, разивалин нивгъар, ЦIийи йис…

Дидхъан мина гизаф йисар гъушну. Амма йиз ва йиз юлдаш Камилайин му дюшюш уьмурлугъдиз кIваъ гъубзди.