Дагъустандиъ мектебариз гъягъюрайи гизаф баяр-шубар манзилнаъди аьгъювалар гъадагъбан къайдайиина алдаъна. Му саягъниинди аьгъювалар гъадагъувал региондиъ тарабгънайи уьзрихъди аьлакьалу апIура ва аьгьвалат ужуб терефназди дигиш хьайизкьан давам апIбанди ву.
Аьхиримжи йигъари республикайиъ гьар йигъан 550 касдиинакьан коронавирусдиан аьзарлу духьнайидар ашкар апIура. Эгер гъубшу йисан гизафси яшлу касар аьзарлу шулайиш, аьхиримжи вахтна бицIидар ктIерццувалин кьадарра лап за дубхьна. Республикайин бязи мектебариъ 70 процентдихьна урхурайидар аьзарлу духьна.
Духтрарин гьисабариинди, эгер гьарсар бицIири жвуван хул’ан дарсар аьгъю апIури гъахьиш, дурарин арайиъ уьзур тарабгъувал яваш хьибди. Амма бицIидарин абйир-бабари, мялимари думу ляхнин гьякьнаан чпин наразивал улупура.
«Узхьан йиз бицIидариз, манзилнаъди аьгъювалар гъадагъбан бадали, лазим вуйи шартIар яратмиш апIуз шуладарзухьан. Узуз шубур бицIир азуз. Дурарикан кьюр мектебдиз, сар бицIидарин багъдиз гъягъюра. Ав, хулаъ саб компьютер айич, хъа гьаруриз жа-жаради компьютер масу гъадабгъуз узуз мумкинвал адарзуз. Йиз бицIидари аьдати саягъниинди, классдиъ мялимдихъди сюгьбат гъабхури, аьгъювалар гъадагъури ккундузуз. Мектебдиъ бицIири билиг гъадабгъувалси, думу яшайишдин терефнаан артмиш, чан таярихъди вердиш шулу. Йиз наразивал баладар, бицIидариз чпизра манзилнаъди урхувал кьабулди адар. 2-пи классдиъ айи шуру узуз аьрзар апIура: «Дада, узу ич мялимди компьютериан ктибтурайи дарснан гъавриъ шуладарзу. Узуз мектебдиз гъягъюз ккундузуз». БицIир учв мялимдихъди вуйи гюрюшдиъ чаз артухъ аьгъювалар шулайивалин гъавриъ духьна. Мидланра савайи, ярхи йигъди компьютерин улихь дуснайи бицIирин уларин язухъ дарин? Дугъан сагъ’вализ компьютери чIуру тясир апIуру», – ктибтура ич сюгьбатнаъ Каспийск шагьриан вуйи шубур бицIирин дада Наримайи.
Дугъриданра, гьаму аьгьвалатнакан сар касра – я мялимар, я урхурайидар – разиди дар. Мялимаринра аьрзйир гъагъидар ву. Манзилнаъди аьгъювалар тувруган, дураризра гизаф читинвалар алахьура. БицIидарин аьгъювалариз лайикьлу кьимат дивуз удукьурадар. Амма жара чара адар. Ихь ватандашариз я вакцинайин рубар йивуз ккундар, я духтрарин тIалабар тамам апIуз. Гъийин йигъаз Дагъустандиъ 50% агьалйирикьан вакцинайин рубар йивнадар. Гьадму рубар гъивнуча кIурударинра гьацI пайну кучIал апIура. Думу дюз ляхин дар. Эгер ихь сагъ’вал ухьу дюрюбхиш, шли уьбхиди?
Йиз фикриинди, гьаму аьгьвалатнаъ ухьу вари сатIи духьну, уьзрихъди женг гъабхури ккунду. ЦIиб вахтнан арайиъ мялимарира, бицIидарира, абйир-бабарира сабур гъапIиш, ужу шул. Гьаддихъди сабси, духтрарин тIалабарра тамам апIуз кIваълан магьарханай.
