Нубатнан 2022-пи йис улубкьну, амма, аьдат вуйиганси, му вахтна ухьу гъубшу йисан гъапIу ляхниз кьимат тувурхьа, гъазанмиш гъапIу хъуркьувалар ва кIваъ бина диву ужувлан ляхнар уьмрин тарихнаъ гьаммишандиз мюгькам апIуз чалишмиш шулхьа. Хъа гьял дарапIди гъузу месэлйири, гьелбетда, ухьуз сикинвал туври шулдар. Чан ляхниз вафалу касди цIийи йисан думу месэлйир сабпи нубатнаъди гьял апIбаз, дицисдар камивалар ляхниъ сарун текрар хьуз гъидритбаз вари кьувватар сарф апIуз ижми кьаст апIуру. Эгер гьарсар касди чан ляхниъ ватандаш’валин буржи тамам апIбан жавабдарвал гьисс апIури гъахьиш, ужу шулу.
Улихьнаси Дагъ. Огни шагьрин администрацияйиз шагьриъ аьлакьайин ляхин лазим вуйи дережайиъ адруваликан, бязи гъуллугъчйир чпин вазифйирихьна жавабдарсузвалиинди янашмиш шулайиваликан, рякъярихъди ва штухъди аьлакьалу читинвалар алахьурайиваликан ва жара камиваларикан аьрзйир гъюри гъахьну. Аьхиримжи кьюд йисандин арайиъ, гьарсаб аьрзайиз дилигну, «Дагъустандин Огни шагьрин глава Жалалудин Аьлирзаев кIулиъ ади, ерли администрацияйи му месэлйир ахтармиш апIура. Аьрзйириъ улупнайи бязи камивалар терг апIузра мумкинвал гъабхьну. Хайлин месэлйир гьял гъапIну, мисалназ, инсанариз варитIан гъалабулугъвал кайи рякъарин месэла. Багарихьди штун месэлара гьял апIуз мумкинвал хьибди.
Рябкъюрайиганси, Дагъ. Огни шагьриъ администрацияйин шагьрин агьалйирихъди вуйи аьлакьа лазим вуйи дережайихъна хпан бадали, сабпи нубатнаъ гьарсар агьали, чан ихтиярар уьрх-бан гъаразнаъ хьуб лазим ву. Гьелбетда, агьалйирин игьтияжар гьуркIувалин ляхин табшурмиш дапIнай пишекрарра чпин ляхнихьна намуслувалиинди янашмиш духьнц ккунду.
Дагъ. Огни шагьур аьхиримжи йисан уткан ва дигиш шула. Улихьнаси шагьрин главайи душваъ дуланмиш шулайидар ужуб хабрихъди таниш гъапIну.
«Улихьди шагьриъ ади гъабхьи чяхир гьясил апIру заводдин 6 гектарин жил Дагъ. Огни шагьрин администрацияйихьна тяйин саягъниинди кьяляхъ тувну. Му месэла гьял апIури, хайлин вахт гъубшну. Ихь шагьрин агьалйирин кьадар йислан-йисаз артухъ шулайивализ лигну, гьамус думу 6 гектарин йишв’ин 604 бицIириз урхуз йишв айи мектеб ва 250 бицIир кьабул апIру бицIидарин багъ, спортдин тамшир, волейбол, футбол апIру майдан, бицIидари тамшир апIру майдан тикмиш апIуз къарар адабгъну. Думу къарар 2022-пи йисандин аьхириз тамам апIуз планламиш дапIна. Жямяаьтлугъдин серенжемар гъахру аьхю майдан вуди хьпаз лигну, душв хъябкънайи зона хьибди», – къайд гъапIну Жалалудин Исмяиловичди.
