9-пи февралиъ вахтназ вуди РД-йин Правительствойин председателин вазифйир тамам апIурайи Аьбдулмуслим Аьбдулмуслимовдин регьберваликкди промышленностдин сурсатарин къанунсуз алвер апIбаз аьксивал улупбан комиссияйин ВКС-дин къайдайиинди заседание кIули гъубшну.
Думу ачмиш апIури, Аьбдулмуслим Аьбдулмус-лимовди къайд гъапIганси, республикайиъ ипIру-убхъру сурсатар, палат ва ликариин алахьрудар, арагъи, спирт кайи, тембекуйин ва гьацдар жара сурсатар къанунсузсди, маркйир алдарди алвериъ хьпан улихьишв бисбан ляхин гъабхура, фицики экономикайин жиниди гъубзрайи му пайну республикайин бюджетдиз гъазанжар гъювализ чIуруди тясир апIура.
«Натижа уларикк рябкъбан бадали, гьаму цирклин идара апIурайи гьюкмин гъуллугъарихъди сатIиди ляхин дубхну ккунду. Сурсатариин маркйир аларсбан гьякьнаан къанундин тIалабар тамам дарапIрайидари намуслуди ляхин апIурайи юридический ва хусуси касаризра аьхю зарар тувра», – гъапну дугъу, ва му месэлайин натижйирин, дидхъан гъабхру жавабдарвалин гьякьнаан махлукьатлу хабрарин дакьатариъ яркьуди дибикIну ккуниваликан къайд гъапIну.
Гьаму терефнаан гъабхурайи ляхнин натижйирикан кIури, Федеральный таможняйин гъуллугънан Кафари Кавказдин таможняйин управлениейин Дагъустандин таможняйин кIулиъ айи Сергей Троцко удучIвну гъулхну.
Дугъан гафариинди, гъубшу йисан юкьубпи кварталиъ Дагъустандин таможняйи республикайин къанун уьбхру ва гюзчивалин органарихъди сатIиди, ликариин алахьрудар гьясил апIру циркил ахтармиш апIури, 4 серенжем кIули гъухну.
Натижайиъ, къанундин тIалабар чIур дапIну, 15 агъзур жут ликариин алахьрудар масу туврайивал ашкар гъабхьну. Серенжемар Дербент райондиъ, Мягьячгъалайиъ ва Каспийскдиъ кIули гъухну. Дурарин гьякьнаан материалар РД-йиъ айи МВД-йин тялукь гъуллугъарихьна хъадаъна.
РД-йиъ айи Роспотреб-надзорин управление-йин кIулиъ айи Николай Павловди, чпи гьаму терефнаан гъабхурайи ляхникан ктибтури, гъубшу йисан тялукь 64 серенжем тешкил гъапIуваликан, гьадму гьисабнаан 53 – тембекуйин сурсатарихъди аьлакьалудар, мялум гъапIну.
Вахтназ вуди РД-йин промышленностдин ва алвер апIбан министрин вазифйир тамам апIурайи Низам Халиловди къайд гъапIганси, «Бизнес-аналитика» кIуру экспертарин тешкилатдин ахтармишариинди, маркйир алдарди къанунсузди тембекуйин сурсатар масу тувбаан (43%) Дагъустан Урусатдин Федерацияйиъ кIакIначи дубхьна.
Заседаниейин натижйир йивури, Аьбдулмуслим Аьб-дулмуслимовди комиссияйи муниципалитетарихъди вуйи ляхин жанлу дапIну ккуниваликан, республикайин Минпромторгди му терефнаан зяифди ляхин гъабхурайиваликан ва промышленный сурсатар къанунсузди алвер апIбаан комиссияйи 2022-пи йисаз вуйи ерийин план дюзмиш дапIну ккуниваликан гъапну.
