Феруза Рамалданова
Мялум вуйиганси, 18-20-пи сентябри Урусатдиъ Федеральный Собраниейиз партйир тяйин апIбан, Гьюкуматдин Думайиз ва РД-йин Халкьдин Собраниейириз депутатар ктагъбан сечкйир кIули гъушну.

Хив ТИК-дин председатель Фридман Асваровди къайд гъапIганси, райондиъ сечкйир ужуб иштирак’валиинди, ачухъвалиинди кIули гъушну.
– Улупнайи сечкйирихьна гьарсаб вахтна инсанари маракьлувал улупури гъахьну. Му ражарира Хив райондин гъулариъ сечкичйири сесер тувну.
Вахтназ улихьна лазим гьязурлугар гъахбан натижайиъ сечкйириз гьязур гъапIу вари 27 УИК-диъ ляхин саб жюрейинра камивал адарди кIули гъубхьну.

 
Улупнайи вари УИК-ар материалинна техникайин алатарихъди улихьнатIан тямин вуйи. Сечкичйирин хатIасузвал уьбхбан месэлйирра жавабдар вакилари ижмишнаан гюзчиваликк гъюрхну. Сечкйириъ райондиъ гьисабнаъ айи 13281 сечкичйирикан 12610 касди улупнайи йигъари чпин ватандаш’валин буржи тамам гъапIну. Му кьадар сечкйириъ иштирак духьну ккунидарин 94,5%. Дурарикан асас пайну «Саб вуйи Урусат» партияйин тереф гъюбхну.
КьатI’иди гъапиш, Дагъустандин Халкьдин Собраниейиз депутатар ктагъбаан сечкичйирин 89,07%-ди чпин сес «Саб вуйи Урусат» партияйин вакиларихъанди тувна. 5,39%-ди КПРФ-дин, 3,35%-ди «Гьякьлу Урусатдин»-дин ва 1,42%-ди ЛДПР-рин, 0,74%-ди «ЦIийи инсанарин» тереф гъюбхну.

 
Республикайиан Гьюкуматдин Думайиз улупнайи саб мандатдин йишв’ина вакил ктагъбан жигьатнаан сесер туву 12610 касдикан 11251-ри Хизри Абакаровдин тереф гъюбхну.
Федеральный Собраниейиз вуйи партийирихъан сесер тувбакан гъапиш, Хив райондин 94,46% сечкичйири «Саб вуйи Урусатдин» тереф дюбхна. Ватандаш’валин буржи тамам гъапIу 1,82% сечкичйири КПРФ-дин, 2,09%-ди «Гьякьлу Урсусатдин», 1,06%-ди ЛДПР-рин ва 0,54%-ди «ЦIийи инсанарин» программйир чпиз кьабул вуйивал субут гъапIну.
ХатIасузвал уьбхбан месэла ужуб дережайиъ дебккбан натижайиъ сечкйир гъахру муддатнаъ лазим вуди улупнайи серенжемар райондиъ ислягьвалиинди гъахру мумкинвал гъабхьну, – аьлава гъапIну Фридман Асваровди.

...хъа Табасаран райондиъ – ваъ

Зубайдат Шябанова
Сечкйир аьхирихъна гъафну. Вари районариъ ва шагьрариъ натижйир йивура, улихь ккамиди мялум духьнайи мялуматар чап апIура, комиссйирин вакилари сечкичйирин улихь гьякь-гьисаб тувра.

 
Табасаран райондиъ сечкйир фици гъушнуш, агьалйирин иштирак’вал фициб гъабхьнуш мялуматар гъадабгъури, узу райондин ТИК-дин кIулиъ айи Исамудин Исаевдиз зенг гъапIнийза. Дугъу выборарин аьхиримжи натижйирин гьякьнаан гьелелиг чахьан кьатI’и мялумат тувуз даршлуваликан гъапнийи, фицики дурар гьелелиг ерли, райондин газатдиъра чап дапIнадар, хъа учв Мягьячгъалайиъ душна.

 
Рябкъру гьялариан, райондиъ лихурайи гьякимари фуну газатдиз фила мялумат тувруш, чпи нубат хъипра. Жара районарин натижйир рякъюрайи Табасаран райондин сечкичйиризра чпин районди фици сесер тувнуш маракьлу ву. Хъа гьелелиг дурариз ккилигубтIан гъайри фукIара гъубзрадар.