Наргиз Гюлечова

 
Улихьна йигъари республикайин глава Федор Щукин «Дагъустандин команда» ччвур тувнайи проектдин иштиракчйирихъди 5-пи ражари гюрюшмиш гъахьну. Му ражари дугъу махлукьатлу мялуматарин дакьатарин цирклин вакиларихъди гафар-чIалар гъапIну. Проектдиъ иштирак шулайи кандидатар – журналистар, редакторар – цирклиъ хайлин йисари ляхин апIури, аьхю тажруба айидар вуйи. Дурарикан саспидар, гъи ляхнихъди тямин гъапIишра лихуз гьязурди айи, хъа тмундарихъди цIиб артухъси ляхин дапIну ккундийи.

Проектдиъ иштирак хьуз дуфнайи Умай Ибрагьимовайи чан видеопроектдиъ, дидиз лигрударин фикир чаина жалб апIруганси, учIру суал туврайи. Видеойин сабпи секундайилан думу кас медиацирклин ужуди гъавриъ айир вуйиб аьгъю шулу. Дугъу гъи республикайиъ уьмриз кечирмиш апIурайи «ЦIийи медиайин институт» проектдин гьякьнаан чан фикир ачмиш гъапIнийи. Ибрагьимовайин гафариинди, ляхин гъабхурашра, гьелелиг проектдиз айи вари мумкинвалар кIулиз адагъурадар.

 
Кьюрпи кандидат, Елена ТIагьирова, СМИ-йин цирклиан хъанара артухъ тажруба айир вуйи. Думу Артем Боровикдин ччвурнахъ вуйи премияйин лауреат, 2009-пи йисан режиссерарин арайиъ вуйи «ТЭФИ регион» конкурсдин пешкешнан йишван сагьиб ву ва хайлин вахтна РГВК «Дагъустан» телеканалин директорди гъилихну. Елена ТIагьирова республикайин министерствйириъна ведомствйириъра жюрбежюр гъуллугъариин гъахьну. Кризисдин аьгьвалатнаъ жавабдарвал бисувал ва ляхин апIуз аьгъювал дугъу чан пишекарвалин ужуб ериси гьисаб апIура.

 
Елена ТIагьировайиз айи тажрубайиз, жюрбежюр конкурсариъ гъазанмиш гъапIу дугъан гъалибвалариз Федор Щукинди заан кьимат дивнийи. Республикайин главайи мялум гъапIганси, региондин улихь-кIулихь хьайидари, Елена ТIагьировайи Дагъустандиз хайир хпан бадали, дугъаз ляхин дабгна.

 
«Дагъустандин команда» проектдиъ иштирак хьуз «Дагъустан» РИА-йин кIулиъ айи Рустам Каниев ва телевидениейиъ передачйир гъахурайи Эльнар Надыршинра дуфнайи. Эльнар Надыршинди чан улхбаъ гъапиганси, гъи гьюкмин органари, гьаму деврин цIийи гьяракатарин шилнаъди гъягъюри, республикайин ва уьлкейин аьхю блогерарихъди артухъси сатIи вуйи ляхин дубхну ккунду. Гьадму жюрейиинди ляхин апIури гъахьиш, республикайин аваза за апIузра удукьиди, яшайишдин цирклизра артухъди хайир хьибди. Чан гафариз кюмек вуди, Надыршинди республикайиъ аьхю мархьар гъургъу вахтна блогерари туву кюмек кIваин гъапIнийи. «Дагъустандин команда» проектдин жюрийи Надыршиндихъди хъанара ляхин дапIну ккуниваликан гъапнийи, гьаци вушра думу проектдиз гъадагънийи.

Эгер учвуз, Дагъустан артмиш апIбан бадали, лазим вуйи тажруба, аьгъювалар ва ляхин апIуз метлеб аш, «Дагъустандин команда» проектдиъ иштирак йихьай. Душваз аьрзйир кьабул апIувал давам шули ими.