Гюльнара Мягьямедова

2-пи ноябри Урусатдин Президент Владимир Путинди Кремлийиъ Дагъустандин глава кьабул гъапIну. Федор Щукинди майдин вазлихъанмина региондин кIулиъ айирин вазифйир тамам апIурайи, хъа октябри республикайин Халкьдин Собраниейин депутатари думу Дагъустандин главайин гъуллугъниина ктагънийи.

«Федор Вячеславович, узу увуз, Дагъустандин кIулиъ айирин заан гъуллугъниина ктагъбахъди тебрик апIбан бадали, теклиф гъапIунза. Фици вушра думу асас регион, Кавказдиъ айи Урусатдин сяргьятарин гъирагъ, гизаф миллетарикан ибарат вуйи республика ву. Сабпи нубатнаъди, дагъустанлуйирин аьхюну пайну хъапIрайи диндиз, ата-бабйирин аьдатариз, дагълуйирин культурайиз лазим вуйи кьадар гьюрмат апIуб ва, гьадму ляхин бинайиъ дибисну, Дагъустандин экономикайин, промышленностдин артмиш’валин тереф уьбхбиина яв фикир жалб апIуз ккундузуз.

 
Дагъустандихъди уву таниш вува. Душваъ республикайин Верховный суддин кIулиъ ляхин гъапIунва, гьелбетда, арайиъ айи месэлйирин гъавриъ ава, фицики вари думу месэлйир сударин хилариан гъягъюра. Хъа яв цIийи гъуллугъ тамам апIбан гьюкмин пай ву, думу суддин гьюкмихьан тафавутлуб ву, ва мушваъ увуз айи тешикиллувалин лишнар ва инсанвалин хасият лазим хьиди, гьаму ухьу ктуху вари цирклариан месэлйир хъуркьувалиинди гьял апIбан бадали», – гъапнийи Владимир Путинди.
Федор Щукинди Владимир Путиндиз ва Дагъустандин халкьдиз чаина гьамкьан заан хъугъвал апIбаз чухсагъул гъапнийи.
Дагъустандин главайихъди вуйи сюгьбатнаъ Владимир Путинди хусуси метлеб айи дявдин операцияйин иштиракчйириз, ветеранариз ва дурарин хизанариз кюмек тувну ккуниваликан гъапнийи. Путиндин гафариинди, республикайин агьалйири гьаммишан чпин бицIи ватандизси, вари Урусатдизра чпин вафалувал улупура.

 
Урусатдин Президентди Дагъу-стандин главайин асас фикир региондин яшайишдин месэлйир гьял апIбиина жалб гъапIнийи. Владимир Путиндин гафариинди, Дагъустандиъ бицIидар бабкан хьувал ужуб дережайиъ а, амма диди яшайишдин цирклиъ мялум вуйи месэлйир арайиз хура. Дугъу республикайин главайиз мектебариъ сабпи сменайиъ урхурайи бицIидарин кьадар артухъ, хъа кьюбпи ва шубубпи сменйириъ урхурайидарин кьадар цIиб дапIну ккуниваликанра гъапнийи.

 
Мидланра савайи, уьлкейин президентди амбулаторйириъ ва поликлиникйириъ туврайи медицинайин кюмек йигълан-йигъаз ужу дубхьну ккунивал къайд гъапIнийи, бицIидарин багъарин ва душваъ айи йишварин месэлара гьаци гьял дапIну ккуниваликан гъапнийи.

Сюгьбатнан аьхириъ Владимир Путинди Федор Щукиндиз жавабдар гъуллугънаъ хъуркьувалар ккун гъапIнийи.