Урусатдин кьувват халкьарин сабвалиъ а
Гюльнара Мягьямедова
4-пи ноябри Урусатдиъ Халкьарин сабвалин йигъ къайд апIура. Машквар 2004-пи йисхъанмина федеральный къанундиинди гьюрматнан йигъси тяйин дапIна. Думу 1612-пи йисан гъахьи гьядисйирин гьюрматназ, халкьдин кьувватариинди Москва Польшайин чапхунчйирихьан азад апIбаз бахш дапIнайи йигъ ву.
2026-пи йисан гьаму йигъ гьербе йигъ’ин алабхъну.
Халкьдин сабвалин йигъ паччагь Алексей Михайловичдин указдиинди 1649-пи йисланмина къайд апIуз хъюгънийи ва 1917-пи йисазкьан къайд апIури имийи. Советарин Союздиъ думу машквар Октябрин инкъилабдин йигъ вуйи 7-пи ноябрихъди гьюдюхнийи.
Тарихдин машквран йигъ хъана ихь календариз 2004-пи йисан гъафнийи. Думуган Урусатдин динарин арайиъ айи советди теклиф дивнийи, хъа Государствойин Думайи теклиф кьабул гъапIнийи – гьамци, 2005-пи йисхъанмина 4-пи ноябрь Халкьарин сабвалин йигъси къайд апIуз хъюгъну. Машкври ватандаш жавабдарвалин, уьлкейин агьайири чиб-чпиз кюмек тувувалин, читин вахтари сатIивал уьбхювалин важиблувал улупура. Халкьдин сабвал тарихдихьна вуйи гьюрматси, милли хъуркьуваларин ва артмиш’валин бинара ву, гьаз гъапиш ккудубшу уьмриз апIурайи уртахъди вуйи гьюрматну ужуб гележегдин шибритI арайиз хуру.
Гъийин деврин шараитариъ Халкьдин сабвалин йигъаъ хъана аьхю мяна а. Урусатди гъабхурайи хусуси метлеб айи дявдин операцияйиъ иштирак шулайи агъзрариинди эскрари, чпи гьар жюре миллетарин вакилар вушра, жара динар хъаърашра, сатIиди уьлкейин хатIасузвал уьбхюра. Юкьуб аьсир улихьнаси, гьамусра гележегдин уьмрикан вуйи фикрари жюрбежюр миллетари, жара дин хъапIрудари, гьаржюре пишейин ва гъуллугъарин вакилари фронтдиъ женгар гъахура, далу терефнаъ зегьмет зигура, женгнаъ айи эскрариз ва сяргьятарин багахь яшамиш шулайи агьалйириз кюмек тувра. Гьарсар касди апIурайи гьюрмат уьмуми метлеб бадали апIурайиб ву.
Аьзиз ватанагьлийир, учву Халкьарин сабвалин йигъахъди тебрик апIури, учвуз сагъвал, хъуркьувалар, ислягьвал ккун апIурача. Урусатдин кьувват чан ул хъудрубкьру чюллериъ, гизаф миллетарин сатIивалиъ, инсанарин ачухъ машариъ рябкъюру. Ихь сабвал гьаргандиз уьбхюрхьа!