Улихьна йигъари 84 йисан яшнаъ ади Дербент шагьрин яшлуйирин ва ветеранарин Советдин председатель Мисриев Мисри кечмиш гъахьну.
Мисри Зейналович Мисриев 1938-пи йисан Табасаран райондин Бургьанкент гъулаъ аьхю хизандиъ бабкан гъахьну. Мектебдиъ урхбан кьяляхъ, дугъу Советарин армияйиъ ватандин улихь чан буржи тамам гъапIну. Армияйиъ гъуллугъ апIури гъахьи йисарира думу жямяаьтлугъ ляхнарин кIулиъ ади гъахьну. Гьюрматлу ва тербиялу эскер дишла ротайин комсомолин тешкилатдин членди ктагъуру. Дявдин ва политикайин гьязурлугвалин чан заан къанажагълувал улупу Мисри Зейналович армияйиъ дишла КПСС-дин членвализра кьабул апIуру. Армияйиан гъафи Мисри Мисриев Мягьячгъала шагьриъ Дагъустандин гьюкуматдин политехнический институтдин инженервалинна техникайин факультетдик урхуз кучIвру ва думура заан аьгъювалариинди ккудубкIуру.
Зегьметнан рякъ Мисри Мисриевди Билижийин консервйир гьясил апIру заводдин лабораторияйин заведишди, инженерди, хъасин цехдин аьхюрди ляхин апIури ккебгъну. Ляхниъ пишекарвалин жигьатнаан аргъаж шули, цIийи-цIийи ляхнарикк кIул ккиври, чан бажаранвал ачухъ апIурайи Мисри Мисриев Дербент райондин ВЛКСМ-дин райкомдин сарпи секретарди ктагъуру. Дугъу душваъра дишла комсомоларинна жигьиларин ляхин жанлу апIуру. Мяишатдин ляхнариъ жигьил пишекрин жанлувал гъябкъю Дербент шагьрин улихь-кIулихь хьайидари Мисри Мисриевдиз шагьрин аьхю кархана – консервйир гьясил апIру заводдин директорин гъуллугънаъ дийигъуз теклиф апIуру.
Мисри Зейналович Дербент шагьрин агьалйирин ва Табасаран халкьдин арайиъ аьхю гьюрмат айи кас вуди гъахьну.
Мисри Мисриевдихъди гизаф йисари таниш вуйи, Дербент шагьрин депутатарин Собраниейин председателин заместитель ва гьацира Табасаран милли культурайин Автономияйин председатель Айваз Аьлихановди ихь гьюрматлу ватанагьлийикан узуз хайлин маракьлу мялуматар ктитнийи.
«Жямяаьтлугъ зегьметну инсан заан ва гьюрматлу апIуру кIуруганси, Мисри Зейналович Мисриев Ватан бадали фидакар зегьмет зигбиинди адлу гъахьи кас вуйи. Узу думу касдихъди 1989-пи йисан 19-пи майдиъ, Дербент шагьриъ айи Лезгйирин драмайин театриъ Табасаран культурайин центр тешкил апIурайи вахтна, таниш гъахьнийза.
Серенжемдиъ иштирак шулайи табасаран интеллигенцияйин вакилари думу, жюрэтлу, адмивал кайи, ужур, бажаранлу кас ву кIури, тазади тешкил гъапIу Табасаран культурайин центрин председателди, хъа узу – дугъан заместителди ктагъуз мясляаьт гъапIнийи. Учу Мисри Мисриевдихъди 40 йисан, Дербент шагьриъ фунуб машквар гъабхьишра, сатIиди серенжемар кIули гъахури гъахьунча. 1990-пи йисан МутIалиб Митаровдин 70 йисандин юбилей, Аьгьмед Уружевдин юбилей къайд гъапIунча ва гьацдар хайлин жара серенжемар тешкил апIури гъахьунча.
Ва кьяляхъна, ихь уьлкейиъ демок-ратвалин сифтейин лепйири миллетарин къанажагъ жанлу апIури, дурари чпин вари метлебар ва гъайгъушнар ужуди тамам апIувал тIалаб апIуз хъюгъган, милли советар тешкил апIури гъахьунча.
Гьадму вахтна Мисри Мисриевдина Зейдуллагь Юзбеговди табасаранарин милли Совет тешкил гъапIнийи. Диди гъубшу аьсрин читин 90-пи йисари, ихь халкьдин рюгьнан ва жара игьтияжар гьуркIбан бадали, гизаф серенжемар кIули гъахури гъахьну.
2002-пи йислан мина Мисри Мисриевди, Дербент шагьрин яшлуйирин ва ветеранарин Советдин председатель вуди, агьли инсанарин игьтияжар гъуркIбан бадали, хайлин хайирлу ляхнар кIули гъахури гъахьну. Ва гьацира гьар йисан Аьхю Гъалибвалин Йигъаз бахш дапIнайи шаду машквар тешкил апIури, дугъу дявдин ветеранариз пулин ва жара савкьатар туври гъахьну.
Мисри Зейналович, ужур жямяаьтлугъ касси, ляхнин бажаранлу тешкилатчира вуйи. Думу 1970-пи йисари консервйирин, ширейин заводдин директорди лихури гъахну. Гьадму вахтари дугъахъди заводдиъ лихури гъахьи ярашугъарин гафариинди, заводдиъ лицури, дидин кюгьне духьнайи авадлугъар рякъюри, Мисри Мисриев дартмиш, сикинсуз шули гъахьну. Му аьхю карханайин ляхин гьацира читинуб, аьхю жавабдарвалихъди аьлакьалуб вуйи.
Амма Мисри Зейналович жвуван кIваъ айи умуд ухди гъибтру инсанарикан дайи. Дугъу багъдин йимишар ва бистнин мейвйир гьясил апIру мяишатарихъди йикьрар йитIуру, заводдиъ шубуб нубатнаъди ляхин тешкил апIуру, яна 400-500 касдикан ибарат вуйи студентарин аьхю десте кюмекназ жалб апIури, гъирагъдианра 1400-1500 кас кюмекчйир ляхниз хъади гъюри гъахьну. Дурарин гафариинди, заводди, йимиш, мейва айи хьадан ва чвлин вахтари суткайиъ 300-500 тонна йимишарин ва мейвйирин шире гьязур апIури, 50-60 агъзур банкар хъяркьри гъахьну. Гьамци ляхин тешкил апIували заводдиз аьхю гъазанж хуру ва завод цIийи алатарихъди тямин апIуз мумкинвал тувру. Дербент шагьриъ кIули гъягъюри гъахьи Табасаран райондин саки вари жямяаьтлугъ серенжемариъ Мисри Зейналович гьаммишан сабпирди иштирак шули гъахьну».
Мисри Мисриев, жвуван ватанагьлийир бадали гъизигу марцци зегьметназ лигну, хайлин медалариинди, кьиматлу пешкешариинди ва жара савкьатариинди лишанлу гъапIну. 2015-пи йисан 4-пи ноябриъ думугандин Дагъустан Республикайин глава Рамазан Аьбдулатипов кIулиъ айи делегацияйин дахилнаъди Дербент шагьрин жямяаьтлугъдиан терефнаан Мисри Мисриевра Москвайиъ Кремлиъ РФ-дин Президент Владимир Путиндихъди гюрюшмиш гъахьну.
Гъит гъийин девриъра, гележегдиъра ихь ватанагьлийирин арайиъ мицисдар бажаранлу, гьаммишан Ватандиз, жвуван халкьдиз вафалу баяр артухъ ишри.
