Накьвдин шибарик шул тарих,
         Жил’ин гъахьи касдин тяриф,
        Дугъу хъапIу уьмрин кьисмат,
       Имбударизра насигьят.

 

* * *
Ву жарариз гъапIу уж’вал гьарх, инсан.
Вуз жарари гъапIу писвал гьарх, инсан.
Аллагьдин ччвур гьарган кIваин уьбх, инсан,
Уву йикIрур вуйиб магьархан, инсан.

* * *
Гьаму накьвдиъ дахънайири
УнчIв иливуб ккун гъапIнийи накьвдиин…
Дюн’яйихъ дугъан ул хъмийи…
Гьяйиф, шлуб дар унчIв иливуз накьвдиин.

* * *
Уьмриан гъушунва, намус уьбхюри.
Гъюуьбхюнва! Фаракьатди дахъ жилиъ.

* * *
Мушвакк дахъна адлу Камалил Башир,
Хуш кIалбарин машнаъ ригъдин нур айир.
Вахт дархьиди гъушну думу уьмриан,
Бахиларин, фендиграрин терс хил’ан.

* * *
Икрам апIурза яв рюгьнан кьувватназ
Ва фикрарин деринвализ фагьмин сагъ.

* * *
Гьаму накьвдиъ даахна халис инсан.
Гьяйиф дарди халкь бадали тувур жан.

* * *
Гьаму накьвдиъ аьзабнаъ а дишагьли,
Веледариз макур гъапIу авали.

* * *
«Ич дадайи чан веледар
Кьюб йишваз пай гъапIнийи.
Сарпидар вуйи ккунидар,
Тмундар ярхла дерккнийи», –

– Гьамци бикIна гьатму шибдик.
Яраб фуж вуйкIан думу?
Учв йикIайиз, гьаму гъвандик
ГъидикIнийкIан гафар му?

* * *
Абайиз пуз шулин аба,
Веледдикан чаз лукI гьязур апIуруш?
Веледдиз пуз хай шулин бай,
Кьаби абин кIваз чав мичIливал хуруш?

* * *
Яв уьмрин рякъ фукьан ярхиб гъабхьишра,
Аьхир, инсан, диди ву хур накьвдихьна.

* * *
МучIу накьвдиъ аьзаб шул, кIур,
Аьзаб шул, кIур, чара адру.
Душваъ имтигьян тувур, кIур,
ХъапIу уьмрин Жил’ин аку.

* * *
Уьмур – ухьуз гъябкъю нивкI ву
Сяргьят адру даимлугъдиъ.
Ухьуз гъубзруб аьхират ву –
Ихь мичIли хал даимлугъдин.

* * *
Аьхират гъубзруб ву, кIура,
Дидиз аьхир адар, кIур.
Аьхиратдин хал ухьузра,
Му шаксуз ву, кьисмат шул.

* * *
Эй багъри Жил!
Аманат вуйиз увухьна йиз ккунир!
Биса йиз хил –
Узу вуза ув’ин умудлу вуйир.
* * *
Йиз уьмрин пайдагъси уву гъахури,
Уьмур хъапIнийза яв гъайгъушнаъ ади.
Ву тадагъну узхьан инсафсуз уьзри,
Йиз гирами гьиссар саймиш дарапIди.

* * *
Уьмрин гъайгъушнарихьан гьитIикIунва,
Ах, йиз ккунир, нивкI апIин увуз даим.
Варибдиз дупну «ваъ», узхьан гъушунва,
ДапIну узкан йитим, аьжуз ва саил.

* * *
Шаду йигъар гъапIнийва узуз багъиш.
КьутIкьлидарра увухъди гъапIза дадмиш.
Ужубдизра, харжибдизра баркаллагь,
МучIу накьвдиъ кюмек ишривуз Аллагь.

* * *
Уьмрин чагълариъ ву узхьан гъушунва,
Арццну фтихъ-вуш тамарзу имбу улар.
Аьгъязуз: ву шюшдин улар арццунва,
Сабсан ражну рякъюз багьалу кIалбар.

* * *
Багъри Жилилан, йиз ккунир, гъушунва,
Гъитну узуз хажалатна дердна гъам.
Ялгъуз уз’ин гъайгъушнар иливунва,
Тувну узуз гюзел веледарин гъварч.

* * *
Гьялак гъахьунва, ккунир, накьвдиъ учIвуз.
Гьязур апIин багахь гъюдли руг узуз.

* * *
Дахъ, багьалур!
Зиквран ахин ибшривуз ихь багъри руг.

 

 

* * *
Му шибдик ка кьянццар, табушв, гаварзал,
Гьатмунубдик – гажин, дураг ва язал.
Дахънахьиди мушвак кеспагьлийир гужал,
Пай кидривдар уьмриъ ляхнарик усал.

* * *
Жут йицарна юрккагъ, дуруц ка гьамдик –
Халис нежбервалин лишнар чиб дарин!
Му шибдикк кка инсандиз ризкь туву кас.
Икрам апIурхьа чан гьялал вуй кеспназ.

* * *
Халачийин шикил капIна му гъвандик.
Гьалав ваъ, хъа халис халчи, гуг али,
Гъубхуб дагълу шуран тIубари зирек.
Мушвакк дахъна гъизил хиларин эйси.

 

 

* * *
КIару дубхьна гьатму шибдин гьацIахьна.
ЦIин ялав утIубччвну, кIур, му накьвдиан.
Терс, фасад кас гъафиган жили чахьна,
ЦIа гъивну, кIур, дебккуз дархьиб ругдихьан.

* * *
Уьмрин девлет хайлинси гъапIнийва уч,
Хъергну дидихъ я йигъ, я йишв дарпиди.
Девлетну яв уьмрин аьхир гъапIну пуч.
Гъубзну думу, увуз герек дархьиди.

* * *
Рякъюн исикк гъвандин бяргъял за дубхьна.
Дидин кIулихъ рас дарапIу шиб хъубсна.
Ярумчугъди кацахна шибдик гьярфар,
ГужнииндитIан урхуз шулдар гафар:
«Гьаму бяргъликк дачIаркIна Шябуйин хпир,
Мирасари гъванар йивури гъакIир,
Эдеб адру касдихъди гаф саб гъапIур,
БачукI ликриккан дапIну, гьергну гъушур».
Тай вуйиган, Аллагьди кьисмат гъапIу,
Яв ккунириз уву вуйи лап багьа.
Яв вакили, шли-вуш кIул’ан адау,
Фендигарвал гъапIну яв аку бахтназ.
* * *
Жилириз яв вафасузвал гъябкъиган,
БецI гъапIну, дугъридан, кIван дериндиан.
Пай апIуз гъабхьундар дугъхьан мюгьюббат,
Айиган му ляхниъ ккудрубкIру тюгьмат.

* * *
Му тепейикк аьзаб зигурайири
Кюмекнан хил саризра гьачIабккундар.
Хъа гъи милин гъягъюрайи юлчйири
Сарира му касдиз дюаь гъапIундар.

* * *
Инсанариз хуш дайи мушвакк ккайир,
Рякъюз-агуз дару ягъурсуз саил.
Вуйи уьмур, инсан ккунир, табиаьт;
АпIрур вуйи уж’вал ва марцци тIяаьт.

Му накьвдихъ хъубсну айи гъвандин машнаъ
Гъайгъудар хилари адатIна гафар:
«Уьмрин гьацIаъ гъазанмиш гъапIну гьюрмат,
Аьхиратдиъ Аллагьди тувур рягьмат».

* * *
Уж’вал, жумартвал юкIварин хазна ву,
Магълуб даршул ужуб ният айи кас.
Аку уж’вал ибшри ичв уьмрин къанун,
Писвализ йишв дибрихъри юкIвариъ пак.

* * *
Эй инсанар, уьбхяй учву дугъривал,
Думу кьимат адру зурба девлет ву.
МапIанай гьа сар’ин сари хаинвал,
Думу инсан бейгъуш апIру зегьер ву.

* * *
Я инсанар! Дугъривалин къанунар учву уьрхяй.
Гьякьлувал ву варитIан багьа савкьат.
Ичв гъуншдин девлетниин бахил махьнай.
Бахилвал ву инсан чIур апIру дакьат.

* * *
Инсан, махьан девлетнан лукI,
Диди уву бейгъуш апIур.
Инсанвал уьбх, саф апIин юкIв,
Диди яв кьимат за апIур.

* * *
Дагълариъ шул гьар жюрейин булагъар,
Гьарубди кIур учв багьа апIру мукьмар.
Аьгъю шулхьуз кьимат гьарсаб булагъдин,
Таниш хьиган ухьу, шид дубхъну дидин.

* * *
Уьмур, аку умуд адру,
МучIу ву ваз адру йишвси.
Уьмрин даягъ вуйихь думу,
Умудсуз кас гьич даришри.