Газатдин юбилейихьна
Гьяжимягьямед Гьяжиев 1949-пи йисан Табасаран райондин Хюрикк гъулаъ гъуллугъчйирин аьхю хизандиъ бабкан гъахьну. Дугъан абайи учв пенсияйиз удучIвайизкьан жюрбежюр гъуллугъариъ ляхин апIури гъахьну. Хъа бабу чан вари уьмур Хючнаарин халачйирин фабрикайиъ халачйир урхури гьапIну. Дурари ургур велед дюрхну арайиз адаъну, гьадрарикан варитIан аьхюнур Гьяжимягьямед ву.
1955-пи йисан Гьяжи-мягьямед Гьяжиев Хюркка-рин думуган бегьем дару ургуд йисандин мектебдиъ гьязурлугвалин классдиз урхуз гъягъюру, хъасин думу миржид йисандин мектебдиз илтIибкIнийи. 1966-пи йисан Хюрккарин миржид йисандин, хъа 1968-пи йисан – Хючнаарин кьялан мектебар ккудубкIну, 1969-пи йисан думу, мялимвалин пише гъадабгъуз кьаст ади, Дагъустандин гьюкуматдин педагогвалин институтдин филологияйин факультетдик заочно вуди урхуз кучIвру. Гьадму йисан думу, Гьесхъарин кьялан мектебдин ккергъбан классариз дарсар киври, мялимвалин рякъюъра учIвру.
Институтдин сабпи курс ккудубкIиган, Гьяжимягьямед Гьяжиев 1970-пи йисан чан ватандаш’валин буржи тамам апIуз армияйиз гъягъюру. Армияйиан гъафир, институтдиъ аьгъювалар гъадагъувал давам апIури, багъри Хюрккарин кьялан мектебдиъ мялимди лихуз хъюгъру, садпи йисари ккергъбан классарин мялимди, хъасин заан классариъ урус чIал ва литература киври. Саб хайлин вахт гъубшиган, дугъу табасаран чIална литературара кивуз хъюгъру. Гьаддихъанмина гъийин йигъазкьан багъри гъулан мектебдиъ лихура.
Му касди саб хайлин йисари Хюрккарин кьялан мектебдин директорин заместителдира ляхин апIури гъахьну.
Мялимвал – дегьзаманйирихъанмина читин, амма гьюрматлу пишйирикан саб ву. Гьарсар урхурайирин хайир ккун апIру, хасият аьгъю, дугъан кIвахьна вуйи жини симар агуз шлу мялимдихьантIан баяр-шубариз ужудар аьгъювалар тувуз, чан ляхниъ хъуркьувалар гъазанмиш апIуз шулдар. Жвуван пише лап кIваантIан аьгъю дапIнайи ва тамам апIурайи мялимарикан сар Гьяжимягьямед Гьяжиевра ву.
Гьяжимягьямед Кьасумович райондиъ, республикайиъ кIули гъягъру жюрбежюр конкурсарин, гьадму гьисабнаан «Йисандин мялим» конкурсдинра, иштиракчи ву. 2016-пи йисан кIули гъубшу «Бабан чIалнаан варитIан ужур мялим» кIуру республикайин конкурсдиъ дугъу 2-пи йишв гъибисну. Гьадму йисан думу Табасаран райондин главайин грантдин сагьибра гъахьну.
Жигьил наслиз ужудар аьгъювалар ва тербия тувбан ляхниъ гъазанмиш гъапIу хъуркьувалариз лигну, Гьяжимягьямед Кьасумович швнуб-саб ражари райондин администрацияйин, райондин образованиейин управлениейин, Дагъустан Республикайин образованиейин министерствойин терефнаан гьюрматнан грамотйириинди ва кьиматлу пешкешариинди лишанлу гъапIну. Дугъаз мялимвалин квалификацияйин сабпи категория ва «РФ-дин уьмуми кьялан образованиейин мектебдин лайикьлу гъуллугъчи» кIуру ччвур а, думу педагогвалин зегьметнан ветеранра ву. Гьяжимягьямед Гьяжиевдин хиликк урхурайи баяр-шубарира райондиъ кIули гъягъру жюрбежюр серенжемариъ хъуркьувалиинди иштирак’вал апIури шулу. Мисалназ, олимпиадйириъ, литературайин ва багъри юрд аьгъю апIбан конкурсариъ.
2013-пи йисан Гьяжимягьямед Гьяжиевдиз, мялимвалин ляхниъ заан хъуркьувалар гъазанмиш апIбаз лигну, «РД-йин лайикьлу мялим» кIуру ччвурра тувну.
Хюрккарин кьялан мектебдин директор Загьир Аьли-мирзаевди Гьяжимягьямед Гьяжиевдин гьякьнаан гьамци гъапнийи: «Гьяжимягьямед Гьяжиевди, гизаф йисари багъри мектебдиъ ляхин апIури, учв анжагъ ужуб терефнаанди улупура. Жигьил насил тербияламиш апIбан, урхурайидариз аьгъювалар тувбан ляхниъ дугъаз аьхю тажруба а. Дугъу чан вари кьувват мялимвалин ляхниз харж апIура. Гьаци вуйиган, дугъан зегьметну ужудар натижйирра тувра. Методикайин месэлйир ахтармиш апIури, дугъу му жюрейин макьалйир методикайин журналариъ чап апIура. Мялимдин ляхниъ варитIан асасуб – баяр-шубар аьгъювалар гъадагъбиина жалб апIувал, дурарик гьевес капIувал ву. Хъа Гьяжимягьямед Гьяжиев гьациб къайдайиинди лихура. Сифте учв вари аьгъю апIуз чалишмиш шулу, хъасин урхурайидарикан тIалаб апIуру».
Гизаф йисари Табасаран райондиъ «Табасарандин нурар» газатдин хусуси мухбирди гъилиху Сейидгьясан Сейидмягьямедовди, Гь. Гья-жиевдикан ктибтури, гьамци гъапнийи: «Табасарандин нурар» газатдихъди аьлакьа адарди гъабхьи вахт йиз кIваин илимдариз. Сифте Хючна гъулаъ айиган, думу райондин газат вуйи, хъасин республикайин газатдин дережайиз адабгъиган, «Табасарандин нурар» газатдин редакция Мягьячгъалайиз гъубхнийи. Гизаф йисари узу «Табасарандин нурар» газатдин Табасаран райондиъ айи хусуси мухбирди лихури гъахьунза. Думу вахтари узу гизаф кьадар бажаранлу журналистарихъди таниш гъахьунза. Дурар вари ктухуруш, сиягь ярхиб шулу, хъа гъи узу Гьяжимягьямед Гьяжиевдикан улхураза.
Думу узуз ухдианмина танишур вузуз. Учу рягьматлу Юсуф Базутаевди, ихь адлу шаири, сар-сарихъди таниш гъапIнийчу. Редакторин теклифниинди узу «Табасарандин нурар» газатдин редакцияйиъ мухбирди лихурайиган, газатдин редакцияйиъ Гьяжимягьямедра лихурайи. Саб йишваъ лихури, саб жюрейин ляхинра тамам апIури, ич таниш’вал хъана ижми гъабхьнийи.
Узуна думу Табасаран райондиъ айи хусуси мухбирар вуйча. Табасаран райондин асккан мягьялин ва этег терефнан гъулариан материалар узу дикIуйза, хъа Рубас нирин гагул терефнаъ ерлешмиш духьнайи гъулариан материалар – дугъу.
Гьяжимягьямед Гьяжиев Табасаран райондин бажаранлу журналистарикан сар ву. Дугъаз журналистикайин вари терефариан аьгъювалар а ва газатдиз хътаъру материалар заан дережайиъди албагуз аьгъя. Гьяжимягьямеддин материалар мяна жигьатнаан маракьлудар шулу, фицики дугъу чан макьалйириъ халкьдин уьмрикан, райондин агьалйириз айи игьтияжарикан, учIру месэлйирикан, жямяаьтлугъдин яшайишдикан устадвалиинди бикIури шуйи».
С.Сейидмягьямедовдин гафар аьлава апIури, кIурза: Гь. Гьяжиев 2006-2015-пи йисари «Табасарандин нурар» газатдин хусуси мухбирдира гъилихну. Думу Урусатдин журналистарин Союздин членра ву.
Гьяжимягьямед Гьяжиевдикан бикIури, дугъан сабсан терефнакан хабар тутрувди гъибтуз шулдар. Думу, бажаранлу журналистси, шаирсира ва прозайин эсерар дикIрурсира аьгъяхьуз. Йиз очеркдин игитдин шиърар, макьалйир дикIувал гизаф юкIв али ляхин ву. Думу шубуб шиърарин гъварчарин («Аьшкьнахъди сюгьбат», «Артурин луф», «Поэзияйин ужагъ») ва прозайиинди дидикIнайи кьюб китабдин («Мюршид», «Улихьди гъягъюрайидар») автор ву. Дугъан эсерар гьамус цIийи кIултIан удубчIвуз хъюбгънайи «Литературайин Табасаран» журналиъ кми-кмиди чап апIура. Гь. Гьяжиевдин ихтилатар ва шиърар ужуб ерийиндар ва маракьлудар ву. Улихьна йигъари «Литературайин Табасаран» журналиъ узу дугъан «Архйирин пише давам апIура», «Ккебехъну гъузуб – гъизил ву» кIуру ихтилатар гъурхунза. Узуз дурар кьабул гъахьунзуз. 2021-пи йисан Дагъустандин китабар адагъру чапханайиъ дугъан «Бабаз пешкеш» кIуру бицIидариз вуйи китабра чапдиан адабгъну.
Гьяжимягьямед Гьяжиевди ляхнихьан азад вахтра гьа-вайиди гьапIрадар. Думу Хюрикк гъулан жямяаьтлугъдин фунуб ляхниъра жанлуди иштирак шулу.
Гьамкьан йисари Гьяжи-мягьямед Гьяжиевдихь аьгъювалар ва тербия гъадагъу баяр-шубари, жюрбежюр пишйирин эйсйир духьну, ватандихъ, хизандихъ зегьмет зигура. Чахь аьгъювалар гъадагъу урхурайидарикан ужудар пишекрар, инсанар, ватанперверар хьувал дугъан кIван метлеб ву. Чан хиликк гъурхдари швнуд-сад йисариланра учв кIваълан гьадраувал, машкврарин, машгьурвалин йигъари учв кIваин алаувал Гьяжимягьямед Кьасумовичди чан хъуркьувалси, жвуван зегьметну ужуб натижа тувганси гьисаб апIура.
Жигьил насил бадали гъизигу зегьмет саб вахтнара зяя дарибшрияв, гьюрматлу мялим.
