Урусатдин МВД-йин Мягьячгъалайин линейный управлениейин наркотикариин гюзчивал гъабхру отделин гъуллугъчйири Мягьячгъала шагьриан вуйи, 22 йисаъ айи дишагьли саб килойихьна синтетикайин наркотикар хьади гъидисну.

 

 

Полицияйин вакилари думу дишагьлийихъ ухдиан мина ул хъивну гъахьну. РД-йиъ айи Урусатдин МВД-йин пресс-гъуллугънаан туву мялуматариинди, дишагьли яшамиш шулайи хулар ахтармиш гъапIу вахтна, полицияйин вакилариз душваъ гьитIикIнайи, лизи рангнан хюсиб жвилли наркотик айи 900 бицIи багъламйир гъидихъну. Экспертизайи думу 860 грамм N-метилэфедрон, яна наркотикдин синтетикайин жюрейин сурсат вуйиб тасдикь гъапIну.

«Гъийин йигъаз учуз айи мялуматариинди, дишагьлийи сад йисандин арайиъ интернетдин кюмекниинди наркотикар масу туври гъахьну. Мидланра гъайри, дугъу му тахсиркарваларигъ чан яшар бегьем духьну адру чира гъяъну», – хабар гъапIнийи пресс-гъуллугънаан.

Думу дишагьлийиина, РФ-дин УК-йин 2 маддайиз (къанунсузди наркотикар гьязур апIбан, масу тувбан ва тахсиркарвалар апIбахьна яшар бегьем духьну адру касар жалб апIбан гьякьнаан) асас вуди, уголовный делойир гъитIирккна. Думу маддйирин варитIан гизаф кьадарнан санкцйирин жазайиинди, дишагьли уьмурлугдиз дустагъдиъ итуб мумкин ву.