24-пи февралиъ гвачIнинган сяаьт хьубдиъ, ДНР ва ЛНР халкьдин рес-публикйир Киевдин мянасуз политикайин зулмиккан азад апIбан бадали, Урусатдин Яракьлу кьувватари дявдин хусуси метлеб айи операция ккебгънийи.
Мидиз улихьна, думу республик-йирин хатIасузвал ва конституцияйин гъурулуш уьбхбан гьякьнаан тяди серенжемар кьабул апIувал ккун апIури, ДНР ва ЛНР республикйирин кIулиъ айидар Урусатдин Федерацияйин Президентдихьна илтIикIнийи.
Урусатдин улихь-кIулихь хьайидари ДНР ва ЛНР республикйирин агьалйир нацизмдин терефкрарихьан уьрхюз ужударсдар баяр гьаъну. ДНР ва ЛНР республикйирин халкьди чпин багъри ругар нацизмдин терефкрарин яракьлу гьяракатарихьан азад апIуз кюмек тувбаз Урусатдин армияйин эскрариз дюъ-йир апIура. Дурари ихь эскрар сабпи йигълан мина аьхю разивалиинди кьабул гъапIнийи. Ухьуз мялум вуйиганси, Украинайин жил душмандихьан уьбхюри, хайлин ихь эскрари чпин жанар фида гъапIну. Дурарин ччвурар Урусатдин халкьдин кIваъ гьаргандиз гъузди.
РФ-дин Президент Владимир Путинди Украинайин аьтрафариин дявдин хусуси метлеб айи операция гъабхбан гьякьнаан адабгъу къарариз кьимат туври, Дагъустандин кьибла терефнан агьалйир, ихь ватанагьлийир – Дербент шагьрин зегьметнан ветеранарин, ОМВД-йин ва ВВ-йин Советдин председатель, шагьрин ветеранарин тешкилатдин президиумдин член Агъагюлов Эмирбег Хидировичди ва 1999-пи йисан Чечен Республикайиъ гъахьи дявдин гьядисйирин иштиракчи, ветеран Ибрагьимов Ибрагьим Шагьимирзоевичди Украинайиъ арайиз дуфнайи аьгьвалатнакан чпин фикрар ачухъ гъапIну.
Эмирбег Агъагюлов: «Гьарсар жигьилин улихь гьаммишан хьайи аьхю вазифа – жвуван Ватан уьбхюбвал ву. Дугъриданра, ухьу сикинвалиинди дуланмиш хьувал – ихь ватан уьбхюрайи вакиларин гьунар ву. Гьелбетда, ухьуз рябкъюрайиганси, думу вазифа тамам апIури, фукьан жигьил эскрар, офицерар уьмриан гъушну ва гъягъюра.
Ихь тарихдиъ гъахьи дявйириъ гъалибвал гъадабгъбак табасаран ватандашарира чпин пай кивну. Дурарин метлеб – душмниин гъалиб духьну, аргъаж шулайи насларин кIул’ин гьарган аку зав алди хьувал вуйи. Дурар гьаммишан кIваинди гъитну ва ватан гъюбхдариз ва гъи думу уьбхюрайидариз гьюрмат дапIну ккунду. Гъи ихь кIул’ина хъанара пашман йигъар дуфна. Му читин вахтари ихь игитари чпин хасиятнан ужударсдар терефар: жилирвал, дирбаш’вал, кIван ачухъ’вал, читинвалар аьх апIуз шлувал, ватан уьбхюз гьарган гьязур вуйивал улупну.
Гизаф миллетарикан ибарат вуйи дагъустан халкьдин жигьиларихъди сабси, табасаран баярира гъи ватандиз гъуллугъ апIура. Гьамусяаьт Украинайиз душнайи табасаран баярин кьадар аьхюб ву. Гъи варидари, гьяракатниинди ислягьвалин йикьрар йитIну, мясляаьтар дапIну, дюн’я сикин ибшри кIури, Аллагьдикан ккун апIурхьа. Хизандиан думу дявдиз кьюр, шубур, юкьур жигьил душнайидарра а. Гьяйифки, гьар гьяфтайиъ гъийиху жигьиларин кьадарра артухъ шула, йизра юкьур худул Украинайиъ айиз. Гьарсаб гъул’ан 50-тIан артухъ баяри хусуси метлеб айи дявдин операцияйиъ иштирак’вал апIура. Варидариз Аллагь кюмек ишри».
Ибрагьим Ибрагьимов: «Узу 1999-пи йисан, Кьюбпи чечен дявдин варитIан гъизгъин женгар гъягъюрайи вахтна, армияйиъ гъуллугъ апIури гъахьунза. Ихь тарихнан аьхиримжи аьсриъ кIули гъушу пис дявйирин кьутIкьли дад саб хизандира гьисс дарапIди имдар. 1941-1945-пи йисари гъабхьи Ватандин Аьхю дяви, 1979-1989-пи йисари Афгъанистандиъ гъабхьи дяви, 1994-1996-пи йисари ва 1999-2009-пи йисари гъахьи кьюб чечен дяви – му рякьмар инсаниятдин тарихнаъ гьаммишандиз гъузди. Му дявйири фукьан инсанарин уьмрар кьатI гъапIну, бабар – баярихъ, бицIидар – абйирихъ, дишагьлийир – жиларихъ, чйир – чвйирихъ мягьрум гъапIну. Ва гьамус Украинайиъ кIули гъябгъюрайи хусуси метлеб айи дявдин операцияйиъ иштирак шулайи дагъустан миллетарикан аьхюну пай табасаран жигьилар ву кIури, мялуматар а. Дюн’яйин фунуб вушра уьлкейиъ варитIан багьалуб инсандин уьмур ву. Ухьу дид’ина хил за гъапIу вягьшйириз гьаргандиз гучI тувну ккунду.
Ав, дугъриданра, гьаму кьюб гьяфтайин арайиъ йицIихьуртIан артухъ жигьилар кечмиш духьна. Ватан бадали жанар диву игит баярин абйир-бабариз аьхю кьувват ва сабур туври. Дявдин дад фициб шулуш, узуз гъябкъюнзуз, ва думу ихь веледариз зат кьисмат дарибшри. Гъи табасаран халкьдин кIул’ина аьхю мусибат дуфна, швнур-сар жигьил духну кивунхьа. Варидари, ихь гьюкуматарин улихь-кIулихь хьайидари мясляаьтар дапIну, дюн’я саламат шул кIури, умуд киврухьа».
