Гьаму йигъари вари Урусатдиъси, Хив райондиъра, Украинайин аьтрафариин ислягь инсанарин ихтиярар ва маракьар уьрхбан гъайгъушнаъди хусуси метлеб айи дявдин операцияйиъ иштирак шулайи Урусатдин эскрарин гьюрмат ва тереф уьбхюри, саб жерге ватанпервервалин серенжемар гъахура.

 

«Жвувандарихъанди! Гьякьлувалихъанди! Гъалибвалихъанди!»

 

Гьаци, 16-пи мартдиъ райондиъ автопробег кIули гъубшну. Серенжем Урусатдиъ лозунгдиз илтIибкIнайи «Жвувандарихъанди! Гьякьлу-валихъанди! Гъалибвалихъанди!» лишниккди кIули гъубхну. Ватанпервервалин мяълийирихъди ва Урусатдин пайдгъар хьади саб жерге машинар райондин ругарилан, гьарсар агьалийиз гъийин читин вахтна ихь уьлкейин сабвал ва ислягьвал уьбхбахьна дих апIури, илтIикIну.

 

«Эскриз кагъаз»

 

16-пи мартдиъ Хив райондин саки 50-тIан артухъ баяр-шубари ва аьдати ватандашари Украинайин ругариин ислягьвал уьбхбан гъуллугънаъ дийигънайи Урусатдин эскрариз кагъзар хътаъну. Кагъзариъ дурари гьарсар эскриз чпи, кIвак сикинсузвал кади, дявдин гьяракатар шлубкьан ухди ккудукIну, дурар сагъ-саламатди кьяляхъ хътакбаз ккилигурайиваликан, йишвариин жямяаьтлугъди дурарик Ватандин намус уьбхбан жигьатнаан аьхю умудар киврайиваликан гъибикIну.