Мартдин 17-пи йигъан Мягьячгъала шагьриъ, Урус драмайин театрин бицIинуб залиъ дагъустандин халкьарин хьадукран машквриз тялукь вуйи серенжем кIули гъубшну.
Хьадукар улубкьувал къайд апIувал – дагъустан халкьарин варитIан ккуни машквар ву. РД-йин культурайин министерствойи республикайин халкьдин яратмиш апIбан Хулахъди ва шагьраринна районарин администрацйирихъди сатIиди му серенжем тешкил апIбан асас метлебра – республикайиъ яшамиш шулайи вари халкьарин жюрбежюр аьдатар улупувал, тамашичйир милли хурагарихъди таниш апIувал ву.
Му шадвалин машквриъ ишти-рак’вал апIуз Дагъустандин хайлин районариан ва шагьрариан фольклорин коллективар уч духьнайи. Мягьячгъала, Хасавюрт, Буйнагъск, Дагъустандин Огни, Дербент, Къизлар, шагьрариан, Акъуша, Ахцигь, Дахадаев, Гъяякент, Новолак, Нугъай, Шамил, Табасаран ва Тлярата районариан яратмиш апIбан коллективар дуфну, вари 71 нумра улупну, дидкан аьхю серенжем гъабхьнийи.
Гьарсаб халкьди хьадукар улубкьбаз тялукь вуйи жвуван фольклорин аьдатар улупну: урсари – «Масленица», лезгйири – «Яран-сувар», табасаранари – «Эбелцан», агъулари – «Хьидин Iуьш», лакари – «Интнил хьхьу», къумугъари – «Гъазза новруз», нугъаяри – «Шатман байрам», азербайжнари – «Новруз», рутулари – «Эр», цIахурари – «Юханинйегъ», даргйири «Хьебла бери», татарари – «Шегьме-васал». Мушваъ гьацира пягьливнарра, гъямпIарра айи, халкьдин мукьмарра гъивнийи ва мяълийирра гъапIнийи, гьацира ялхъвнар апIру коллективарра иштирак гъахьнийи.
Серенжемдиъ табасаранарин «Эбелцан» кIуру аьдат улупбаз лигну, Табасаран райондиан сатIиди вуйи фольклорин коллектив РД-йин культурайин министрин терефнаан диплом тувбиинди лишанлу гъапIну.
Дупну ккундуки, аьхиримжи вахтари, ихь халкьдин аьдатар цIийи алауз хъюгъна.
Хайлин йисари кIваълан душнайи халкьдин аьдатар, фольклор сабпну чIиви апIуз гизаф читинди ву. Гьаци вушра, гьелелиг ихь гъуларин клубариъ, культурайин хулариъ хайлин йисари лихурайи бажаранлу пишекрарин жягьтлувалиинди думу ляхин ужуди кIули гъябгъюра. Дицдар пишекрар Къужникарин, Кюргъярин, Пилгъарин, ТIюргъярин, Жвул’арин, Гум’арин, Жулжгъарин, Гурхнарин, ЦIурутIларин ва гьацдар жара гъуларин культурайин хулариъ лихура. Ав, ухьуз аьгъюганси, кюгьне аьдатар, фольклор цIийи алаъбан бадали, думугандин кюгьне палтар, ликариин алахьрудар, кIул’ин улукIрудар лазим ву. ДумутIанра савайи, ихь сягьнайиина кюгьне вахтари ишлетмиш апIури гъабхьи гъаб-гъажагъра адабгъну ккунду. Къайд дапIнайи фольклорин серенжем кIули гъябгъюрайиган, гъулариъ лихурайи пишекрари кюгьне деврин палат ва гъаб-гъажагъ уч апIувалин ляхин заан дережайиъди гъубхуб мялум шуйи.
