Дагъустандиъ хайлин бажаранлу композиторар а, дурарикан сар табасаран халкьдин бай Аьгьмед Уружевра ву. Думу 1937-пи йисан 23-пи мартдиъ Рубас ва Хянягъчай нирар сатIи шулайи успагьи йишвахь ерлешмиш дубхьнайи Табасаран райондин Хючна гъулаъ бабкан гъахьну.
Аьгьмед Уружевичдин байвахтра чан деврин бицIидаринубдиз ухшар вуйиб гъабхьну. Думу вахтнан баяр-шубариз Ватандин Аьхю дявдин кьяляхъ улуркьу читин йисари гизаф дарвалар аьх апIувал алабхъну. Амма табиаьтди тувнайи бажаранвали Аьгьмед Уружевдин читин байвахтназ шадвал хури гъабхьну. Хючнаарин кьялан мектебдиъ урхурайиган, думу художествойин самодеятельностдин гьаммишанлугъ иштиракчи вуйи. Дугъан успагьи сес варидиз кьабул шули, аьхю гарччлар йивбиинди къаршуламиш апIури, дугъаз Аллагьди тувнайи бажаранвал а, кIури гъахьну.
10-пи класс ккудубкIган, Аьгьмед Уружев Бакуйиз Азербайжандин консерваторияйик урхуз кучIвуз гъягъюру, амма ляхнар дюз дархьиди, думу кьяляхъ хъадакну гъюру. Дилин гъафир, дишлади Дагъустандин Огнийин СПТУ-йик механизаторин пише гъадабгъуз урхуз кучIвру. Думу ккудубкIган, жигьил пишекар жвуван хушниинди Казахистандиз лихуз гъягъюру.
Душваъ жилихъ лихруриз ккудудубкIрубкьан ляхин ашра, Аьгьмед Уружев музыкайихьан ярхла шули гъахьундар. Казахистандиан кьяляхъ гъафиган, думу Мягьячгъалайин музыкайин училищейик урхуз кучIвру. Урхурайи йисари Агьмед Уружевди хорин солистдиз ва оркестриз саб жерге эсерар гъидикIну: «Дустваликан», «БицIидар ахуз ккаъру эсер» ва «Дагъустандин багъларикан» кIуру юкьуб пайнакан вуйи эсер.
Музыкайин училище ккудубкIбалан кьяляхъ, ДАССР-ин Гостелерадиойин тавакъу апIувалиинди думу радиойиъ ляхин апIури гъитру. СацIиб вахтналан, ужуди ва мянфяаьтлуди ляхин апIбаз лигну, Аьгьмед Уружевич СССР-ин министрарин Советдин багахь хьайи радиовещаниейин ва телевидениейин Комитетдин гьюрматнан грамотайиинди ва культурайин гъуллугъчйирин профсоюзарин ЦК-йин грамотайиинди лишанлу апIуру.
1971-пи йисан Аьгьмед Уружевдин зегьметназ хъана лайикьлу кьимат тувру, думу «ДАССР-ин лайикьлу артист» заан ччвурнан сагьиб шулу.
Чав зегьмет зигурайи йисари Агьмед Уружевди гизаф миллетарикан ибарат вуйи Дагъустандин хайлин чIалариинди 150-ртIан артухъ кIул’инди вуйи мяълийир гъидикIну. Дугъу М. Митаровдин, А. Жяфаровдин, П. Аслановдин, Ю. Базутаевдин, П. Кьасумовдин, М. Гьюсейновдин, Г. Гьяжиевайин, Т. Салихдин ва хайлин жара шаирарин шиърариз мукьмар гъидикIну. Гизафси дугъу табасаран ва азербайжан чIалариинди мяълийир апIури гъахьну. Гьацира дугъу Табасаран халкьдин театризра мукьмар дикIури гъахьну: Межид Шамхаловдин «Сижар», Ислам Къазиевдин «Аци-Баци», Абумуслим Жяфаровдин «ДарчIиди кивур» спектаклариз.
2000-пи йисан Агьмед Уружевдиз «Дагъустан Республикайин халкьдин артист» кIуру заан ччвурра тувру. Чаз алахьури гъахьи читинвалариз дилигди, музыкайиин, мяълийир апIбиин юкIв алди, Аьгьмед Уружевди чан вари уьмриъ багъри халкьдиз музыкайин цIийи эсерар яратмиш апIури гъахьну.
2018-пи йисан 20-пи июндиъ бажаранлу композитор уьмриан гъушну.
