Халачичивал – табасаранлуйириз ата-бабйирилан мина аьсрариинди гъубзнайи аьдати кесп, милли савкьат ву. Диди кюгьне вахтарилан мина ихь халкьдин уьмриъ лайикьлу йишв бисура, фицики халачйир гьясил апIурайивали сифте нубатнаъди ерли йишвариин агьалйир ляхнихъди тямин апIру мумкинвал тувра. Шаксуз, халачичивал ихь халкьдин кьимат адру милли ирс, дидин девлетлу культурайин сурат ву. Гьяйифки, аьхиримжи йисари хили гъурху халачйириз игьтияж гъудубгну, дурарин улихьна вахтари айи ад ис абхъуз хъюбгъну. Натижайиъ вари дюн’яйиз машгьур вуди гъахьи табасаранарин халачйир урхурайи фабрикйир яваш-явашди ккадахьурайивалин шагьидар шулахьа.

 

 

Гьаци, 21-пи мартдиъ Дагъустандин Прави-тельствойин кIулиъ айи Аьбдулмуслим Аьбдул-муслимовди кьабул гъапIу тялукь къарариз асас вуди, «Хиварин халачйирин фабрика» ГУП-ра хъябкьну. Улупнайи фаб-рикайиз Гъвандккарин, ГъуштIларин, Лик’арин ва Чювккерин цехар дахил шулайи.

– Тялукь къарар кьабул гъапIуваликан учузра махлукьатлу хабрарин дакьатариан мялум гъабхьунчуз. Дидин гьякьнаан учуз хабар дебккурра адар.

Хъа кIули гъабхурайи ляхникан, арайиз гъюрайи натижйирикан гъапиш, фаб-рикайиъ халачйир гьясил дапIну, натижалу улупбар адарди гизаф йисар ву. Заказар гъахьиган, фабрикайин дахилнаъди дишагьлийирихьна хусуси хулариъ урхуз халачйир туврайча. Учуз халачичивал артмиш апIбан рякъ’ан сарун жара я шартIар, я мумкинвалар гъахьундар. Гьюкуматдин кIулиъ айидари му жигьатнаан учуз кюмекар тувбан гьякьнаан хайлин улхбар гъахьну, амма натижайиъ саб жюрейинра уьлчмйир кьабул гъапIундар. Аьхирра фициб гъабхьнуш, магьа рябкъюрахьуз, – гъапну ич сюгьбатнаъ «Хиварин халачйирин фабрика» ГУП-дин директор Савадат Рамазановайи.

Дарпиди гъитуз шулдар. Деврин читинвалариз дилигди, саб жерге табасаран дишагьлийири чпин юкIв али кесп дипри адрували му сяняаьт пакди уьбхюз гьамусра кьувват тувра. Гьаци, тялукь дишагьлийирин рюгьнан кьувватлували, зегьметниин юкIв аливали, читинвалариан удучIвну, Мажвгларин халачйирин фабрика уьбхюз гьелелиг мумкинвал тувра. Гьамусяаьт Хив райондиъ Мажвгларин халачйирин фабрика халкьдин милли сяняаьт ва савкьат уьбхбаан кьувватнаъ имбу саб кархана ву гъапишра, кучIал шулдар. Фицики улихьди ляхник кайи Ляхлаарин халачйирин фабрикйирин ляхинра лап зяиф дубхьна.

Халачйирин фабрикйирин дахилнаъ айи халачичйирилан савайи, дурари райондин саб жерге гъуларин дишагьлийирихьнара, йикьрарин бинайиинди хулариъ халачйир урхбан бадалира, мурслар тувра.

Халачичйири, муштар-йирин тIалабариз лигну, аьхю уьлчмейин халачйирилан савайи, бицIи дорожкйир, марфкIарин машар, жюрбежюр уьлчмйирин халачйир урхура.

Ав, хайлин дишагьлийир, жиниб дар, му пишейихьан ярхлара духьна. Гьадму саб вахтна милли пишейиз вафалуди зегьмет зигурайидар, дугъриданра, тярифназ лайикь ву.

Гъи, ухькан гьарсар шагьид вуйиганси, уьлке лап читин гьялнаъ а. Украинайиъ гъягъюрайи гьяракатарихъди аьлакьалу вуди, саб вахтна инсаниятдин яшайишдиъ лайикьлуди учIву, харижи уьлкйирин терефнаан духьнайи ляхнин йишвар кам шула. Гьелбетда, мициб аьгьвалатнаъ жвуваз айиб уьбхювал маракьлу шула. Хъа тялукь аьгьвалатнаъ йишвариин гъузнайи ГУП-ар ва аьлава ляхнин йишвар ккутIувализ фициб кьимат тувруш, гьюрматлу ватанагьлийир, учву йипай!?

– КьатI’иди гъапиш, аьхиримжи йисари улупнайи ГУП-ди саб жюрейинра ляхин дубхнадар. Я душваъ гьясиллувалра гъабхьундар. Натижайиъ хайир ктабгъбан мумкинвалра адар.

Халачйирин цехар мершвну хъидитIнайи зунжрариинди хъяркьну, саки 20 йис шула. Мушваъ сарун ярхи улхбарра, йиз фикриан, лазим шуладар, – аьлава гъапIну Хив райондин администрацияйин экономикайин отделин кIулиъ айи Гьяжибег Рамазановди.