Гюльнара Мягьямедова

 Урусатдиъ 1-пи октябрилан йисандин аьхиризкьан давам шлу чвлин призыв ккебгъна. Уьлкейин армияйиз 120 агъзуриинакьан жигьил баяр гьауб планламиш дапIна. Повесткйир 18 йислан 30 йис’ина яшар вуйи баяриз тувра. 

Эгер улихьна йисари призыв уьлкейин президентдин указдиинди йисан кьюб ражари кIули гъябгъюри гъабхьнуш, 2026-пи йисан 1-пи январилан ккебгъну, Урусатдиъ армияйиз призывдихъди вуйи серенжемар ярхи йисди кIули гъягъюра. 12 вазлин арайиъ военный комиссариатари армияйиз гъягъюз гьязур шулайи баярин сагъламвал ахтармиш апIуру, дурар, психологияйин улупбариз лигури, гъядягъюру, призывдин комиссйирин заседанйир гъахуру. Гьамци призывдин пунктари апIурайи ляхнин гъагъ ярхи йисаз пай апIуру.

2026-пи йисандин чвлин призыв гьяракатнаъ а. Дидин гьякьнаан «Дагъустан» РИА-йиъ кIули гъубшу пресс-конференцияйиъ республикайин военный комиссар Аьбдурягьман Мурадхановди ва республикайин военкоматдин призывдин отделин кIулиъ айи Гьюсейн Уьмаргьяжиевди мялуматар тувнийи. 

Республикайин военкомди гъапиганси, гьаму йисан декабрин 31-пи йигъазкьан республикайиан 2850 кас армияйин жергйириз гьауб планламиш дапIна. Призывдихъди вуйи серенжемар ярхи йисди гъягъюрайивализ лигну, планламиш дапIнайи кьадарнакан 50 проценттIан артухъ баяриз повесткйир тувна. Гъуллугъ апIру йишвариина дурар 10-пи октябрихъан гьауз хъюгъди. Дагъустандиъ хьадукран призывдин планра лазим вуйиси тамам гъапIну. Эгер повестка гъюбан кьяляхъ, сагъламвалин месэлйириан ясана кьюрпи бицIир бабкан хьуб’ан ватандаш кьяляхъ апIбан себебар арайиз гъафиш, дугъу военкоматдиз мялумат тувну ккунду. Хьуд йигъандин арайиъ призывдин комиссияйихьан, аьрзайиз дилигну, айи къарар кьяляхъ дапIну, цIийиб кьабул апIуз шулу. Аьбдурягьман Мурадхановди къайд гъапIганси, сад йисазди армияйиз гъягъюрайи баяр Украинайин жилариин гъягъюрайи дявдин женгариъ иштирак хьидар. 

Ццийин чвлин призывдин тафавутлувал гьюкуматдин мялуматарин «Эскервалин гьисабнан сабвуйи гъурулуш» ишлетмиш апIувалиъ а. Диди «Госуслуги» порталиан призывникариз электронный повесткйир хътаура. Думу гъурулушди студентариз, 2-3 бицIир хъайи ватандашариз, IT-пишекрариз отсрочкйир тувра.

 Республикайин военный комиссариат ва призывникар уч шлу пунктар армияйиз гъягъру баяр кьабул апIуз гьязурди а.