Дагъ. Огни шагьрин администрацияйи диндинна политикайин экстремизмдихъди ва терроризмдихъди женг гъабхбак чан лайикьлу пай кивра. Экстремизм ва терроризм варитIан хатIалу тахсиркарваларси гьисаб апIури, шагьрин администрацияйин вакилари мектебариъ, сагъламвалин идарйириъ ва жямяаьтлугъ тешкилатариъ идеологияйин ляхин жанлу апIбаз артухъ фикир тувра.
Гъи ихь кючйириъ бикарар гизаф духьна, жигьилар ляхнихъди тямин апIувал фаслин вахтаритIан шуладар, яшайишдин хайлин меселйир гьял дарапIди гъузра. Вузар ккудукIну гъафидариз чпин пишекарвалин ляхниин машгъул хьуз мумкинвал адар. Гьаму ва жара себебари жигьилар хатIалу тахсиркарвал апIурайидарин жергйириз гъягъюз мажбур апIура. Мицисдар дюшюшарин улихьишв бисбан бадали, Дагъ. Огни шагьрин кIулиъ айи Жалалудин Аьлирзаевди гьар йисан, экстремизмдиз ва терроризмдиз акьси вуйи серенжемар гъахбан къарар адабгъну. Сабпи ражари тялукь серенжем сач яркьуди кIули гъубшнийи, газатдин машариъ дидин ляхникан мялуматарра тувнийча. Нубатнан серенжем гъубшу гьяфтайиъ Дагъ. Огни шагьрин культурайин хулаъ гъабхьнийи. Дидиъ иштирак хьуз Кьибла Дагъустандин 14 муниципалитетдин вакилар ва республикайин кIулиъ айи Сергей Меликовдин кюмекчи, Дагъустандин кьибла аьтрафдин округдиъ айи РД-йин АТК-йин вакил Тимур Зербалаев гъафнийи.
Серенжем ачмиш апIури, Жалалудин Аьлирзаевди уч духьнайидарикан гъудужвну саб дакьикьайиъ ккебехъувалиинди Украинайиъ гъийиху ихь эскрарин гьюрмат уьбхювал ккун гъапIнийи.
«Дюзди гъапиш, улихьна йисарихь дилигну, аьхиримжи вахтна ихь республикайиъ экстремизмдин ва терроризмдин бинайиинди апIурайи тахсиркарваларин гьял саб хайлин ужу дубхьна. Улихьна йисарин улупбар кIваин гъапIиган, мициб аьгьвалатну ислягь инсанарин юкIвар архаин хьуз гъитра. Хъа, йиз фикриан, асасуб гьадму вуки, ихь инсанар, насларихьан насларихьна дуфнайи аьдатари тIалаб апIурайиганси, рягьимлудар, гъавриъ ахърудар ву. Ваъ, сакьюдар вакиларихьан халкьарин уьмуми аьдатар батIул апIуз шлуб дар. Шаксузди, сагъу кьувватар гьарган улихь гъягъиди, гъалиб хьиди.
Гьелбетда, ихь уьлкейиъ, Кавказдин региондиъ, респуб-ликайиъ гъалмагъал айиваликан мянфяаьт ктабгъуз ккуни, жигьилар дюз рякълан алдауз гьяракат апIурайи, дюн’яйиъ ислягьвал, халкьарин арайиъ мясляаьт айивалиин рази дару кьувватарра гъузна. Гьамус ухьу вари чарйир дицисдарихъди гъаврикк ккаъбан ляхин гъабхувалиина, агьал-йир экстремизмдин ва терроризмдин рякъ’ина жалб апIру себебар терг апIбиина диш дапIну ккунду. Дициб ляхин сакьюдар инсанарихьан ваяки ялгъуз къанун уьбхру органарихьан кIулиз адабгъуз шлуб дар. Думу ляхин дурумлуди, варидин иштарак’валиинди дубхну ккунду»,
– гъапнийи Жалалудин Аьлирзаевди.
Сергей Меликовдин кюмекчи Тимур Зербалаевдира къайд дапIнайи пис гьяракатарихъди фициб женг дубхну ккундуш, ктибтнийи.
«Диндин экстремизм ухьухьна гъирагъдиан гъюрайи аьзар ву. Гьаддиз ухьу ихь мугъаятвал, хатIасузвал сикин дарди мюгькам апIуб лазим шула.
Яшайишдин асккан ери, бикарвал, къанунсузди яркьламиш духьнайи дестйир арайиз гъювал – гьамрар вари экстремизм ва терроризм арайиз хурайи себебар ву. Ихь республикайин саб бязи шагьрариъ ва гъулариъ террориствалин гьяракатар шулайивали Дагъустандиъ, гьадму гьисабнаан ухьухьра, дурар арайиз гъюбан шартIар ва себебар имбувалин, дурарин ччивар ккутIну адрувалин гьякьнаан шагьидвал апIура. Аьхиримжи йисари хатIалу дюшюшарин улихьишв бисурайидар гизафси тербияйин ляхин заан дережайиъди гъабхурайи ихь мектебарин мялимар, мистарин имамар, районарин, вари шагьрарин ОВД-йирин, военкоматарин гъуллугъчйир ву. Имбу идарйирин вакиларира чпин терефнаан му ляхин жанлу дапIну ккунду.
Пулин дакьатар адру жигьилар экстремистарин чIуру бацаригъ гъядряхъбан бадали, тербияйин ляхин жанлу ва думу жигьилар шлубкьан ухди ляхнихъди тямин апIувал сабпи нубатнан месэла ву. Кьюб кIуруб, тербияйин ляхин ужуб дережайиз хпан бадали, удукьрувалар айи пишекрар лазим ву», – гъапнийи АТК-йин вакили.
Серенжемдин аьхириъ Дагъ.Огни шагьрин мектебариъ ва колледжариъ урхурайи баяр-шубари, террористарихъди женг гъубху ва чпин жанар фида гъапIу Дагъ. Огни шагьрин ГОВД-йин гъуллугъчйирин ччвурар ктухури, жикъиди сягьнайиин дурарин гьунарарикан ктибтнийи. Дурар узузра кIваин апIуз ккундузуз: Зейдуллагь Качибегов, Тельман Къазиханов, Зейдуллагь Аьлиаьгьмедов, Мягьямедсалам Гьюсейнов, Арсен Гьялимов, Габиль Шихмягьямедов.
Серенжем сягьнайилан артистари хусуси метлеб айи операцияйиъ иштирак шулайи эскрариз бахш дапIнайи мяълийир апIбиинди ккудубкIнийи.
Шиклиъ: Серенжемдин иштиракчйир Дагъ.Огнийиъ Ватандин Аьхю дявдин иштиракчйириз дивнайи ядигарин улихь.
