Мартдин 28-пи йигъан РД-йин Правительствойин председатель Аьбдулмуслим Аьбдулмуслимовди, уьлкейиъ арайиз дуфнайи аьгьвалат гьисабназ гъадабгъну, Дагъустан Республикайиъ экономикайин мюгькам артмиш’вал тямин апIбан гьяракатнан штабдин заседание кIули гъубхну.

 

Аьбдулмуслим Аьбдулмуслимовди къайд гъапIганси, уьлкейин аьгьвалатнахъди аьлакьалу вуди, республикайиъ мянфяаьтлу уьлчмйир кьабул апIури, экономика къайдайиз дубхну ккунду.

РД-йин Правительствойин председатели, бизнесдиз, жюрбежюр карханйирин ляхин яркьу апIбаз, яшайишдин месэлйириз, республикайин гьясиллувалин карханйириз, улихьди харижи уьлкйириан хурайи алатар ихь уьлкейиъ гьясил апIувал яркьу апIбаз кюмек тувбан бадали, заседаниейин иштиракчйирин улихь муниципалитетарин бюджетариъ резервдин фондар ачмиш дапIну ккунивалин месэла дивнийи.

Гьадму йигъан Хючна гъулаъ кIули гъубшу Табасаран райондин депутатарин собраниейин нубатнан заседаниейиъ мунициалитетдин резервдин фонд тешкил апIбан месэла гьял гъапIнийи. Райондин депутатарин собраниейин председатель Иса Исаевди, депутатарихьинди илтIикIну, аьлава дакьатарин фонд ачмиш апIбан мяна ашкар гъапIнийи: «Гьамусяаьт, Урусатдиз къаршу вуди экономикайин санкцйир ижми апIурайи вахтна, ерли бюджетарин мюгькамвал тямин апIувал чарасуз лазим ву. Дагъустан Республикайин жара муниципалитетариъси, Табасаран райондиъра, хусуси гъазанжарикан 3 проценттIан цIиб дарди жара дапIну, резервдин фонд арайиз хибди. Диди 10 миллионна 830 агъзур манат тяйин апIура».