Сач республикайин Глава Сергей Меликовди, учв Табасаран райондиз гъафи вахтна, халачичивалин цирклиз кюмек тувбан гафар гъапIнийи. Хъа гьелелиг дигиш дубхьнайиб адар.
Улихьна йигъари республикайин туризмдинна халкьарин художествойин сяняаьтарин министр Эмин Мердановдихъди пресс-конференция кIули гъубшну. Конференция асас вуди туризмдиз бахш дапIнайиб вушра, министри, халачйирикан вуйи йиз суалназ жаваб туври, республикайин халкьарин художествойин саняаьтарин гъийин йигъандин гьялнаканра ктибтнийи.
«Гъулариъ айи халачйирин фабрикйир гъи фициб гьялнаъ аш, ухьуз варидариз мялум вухьуз. Циркил арт-миш апIбан бадали, гьязур апIурайи шей’ариз муштарйир ккунду. Муштарйир адрувал – гъи му цирклиъ гьял дапIну ккуни асас месэлйирикан саб ву. Фицики гьясил апIурайи халкьдин сяняаьтарин шей’ар масу гъадагъру касар айиган, думу циркил артмиш апIбазра артухъси кюмек шулу.
Учу гьар йисан, халкьарин сяняаьтарин цирклиъ ишлетмиш апIру, лазим вуйи шей’ар вая цIийи алатар масу гъадагъбаз удучIву харжар цIибкьан ккеркбан бадали, субсидйир туврача. Ихь республикайиъ му цирклиъ ляхин апIурайи хайлин устадар а. Саки варидари гьар йисан субсидйир гъадагъура.
Ич асас вазифа – Дагъустан Республикайиъ гьясил апIурайи халкьарин сяняаьткарвалин шей’арин бренд дюзелмиш апIувал вуйич. Мидланра гъайри, къанундиинди гьял дапIну ккуни, янаки республикайин халкьарин сяняаьткарвалин шей’ар гьясил апIуз ихтиярар айи Дагъустандин хиликкна тувбан месэлара гьелелиг гьял дарапIди гъубзна. Фицики гьамусяаьт сабкьан милли сяняаьтдин ихтиярар къанундиинди дюрхнадар. Гьаддиз, дурар ич сяняаьткарвалар вуйич дупну фужарихьан-вушра чпин ликрихъ хъибтIуз шулу», – гъапну министри.
Дагъустан халкьарин сяняаьткарвалин шей’ар – вари республикайин дамагъ ву. Амма, гьаци вушра, гьарсаб халкьдин анжагъ чав гьясил апIру хусуси шей’ар а. Гьаддиз халкьдин сяняаьтар региондиъ туризм артмиш апIбаъ аьхю роль уйнамиш апIурайи культурайин циркларикан саб ву.
Эмин Мердановди гъапиганси, республикайиз гъюрайи туристар ихь культурайихьна, милли хурагарихьна ва халкьдин сяняаьткарвалин шей’арихьна маракьлувал ади гъюрайидар ву.
Субсидйир тувбан гьякьнаан табасаран халкьдин сяняаьт – халачичивал артмиш апIурайидари субсидйир гъадагънуш гьерхри, узу Хив райондин Мажвгларин халач-йирин фабрикайин директор Рамазан Мягьямедялиев-дихъдира сюгьбат гъубхунза. Дугъу туву мялуматариинди, ккудубшу йисан фабрикайиз 430 агъзур манатдин мурслар хусуси дакьатарихъ масу гъадагъну, хъа субсидйир дурариз тувундар.
«УдучIву харжарин 30% субсидйир жюрейиинди кьяляхъ туврайиваликан хабар айчуз. Лазим вуйи вари документар гьязур дапIну, министерствойиз хътаунча. Гьяйифки, учухъ 2 агъзур манатдин налог хъайивал себеб дубхьну, сач учуз субсидйир тувуз отказ гъапIну. Магьа ццира 400 агъзур манаттIан артухъ мурслар масу гъадагънача. Субсидйир гъадагъбаз лазим вуйи документар гьязур дапIну, багарихьди минис-терствойиз хътаидича. Сарун налогарин буржар ликрихъ хътрувализ лигну, цци учуз субсидйир тувур кIури, умуд кайиз», – къайд гъапIну халач-йирин фабрикайин директори.
