Гъийин илбикьнайи заманайиъ Аллагьдин ва жямяаьтдин улихь мар-цциди гъузуз чалишмиш шулайи инсанар, дюн’я уьбхюз ккудубкьнайи дестег вуйиганси, гьисаб апIуз шулу. Рамазандин марцци ваз улубкьган, дицдар касарин кьадар артухъ хьуз гъитра кIури, хиял вуйиз. Фицики му гирами вазли Аллагьди гьарсариз жвуван фикрар ва ниятар марцц апIуз, жвуван багахьлуйирилан ккебгъну, дарвал кайидариз кюмек апIуз, ужудар ляхнариз шерик хьуз улупура.
Аьхюну пай ихь жигьилари гъудган-жилкIан апIури, дурубхъри, папрус дизригри, ушвар дисури айивал – мубарак ляхин ву. Аммаки гьамусяаьт ухьук гъалабулугъвал кипрайи суаларра цIиб адар. Жвув жвуван ихтиярнаъ даршлу ляхниъ ади, ушв бисруган ва деебтруган хураг ипIуз мумкинвал адруриз, ушв бисбаан гъаллаж дубхьнайи жандиз кьувват гъюз шартIар адру йишвариъ айириз ушв дибрисди гъузуз каламариъ ихтияр улупнайин? Дициб аьгьвалатнаъ айи динлу касди гьапIну ккунду? Гьамцдар суалар хьади, узу ихь ватанагьли, Билижи посёлокдин имам Ризван Гьябибовдихьна илтIикIнийза.
Жигьил имам Ризван Гьябибовди газат урхурайи ихь ватанагьлийириз гирами Рамазандин ваз мубарак гъапIнийи ва йиз суалариз кIваз сабур хру жавабар тувнийи.
Имамдин гафариинди, Аллагьдин каламариъ инсанариз дурарихьан даршлуб апIин кIурадар. Ушв бисуз мумкинвал адру шартIариъ аш, хъасин, мумкинвал айи вахт улубкьган, гъядахьу ушвар дисурза дупну, ният дапIну ккунду. Гьамусяаьт дидрису ушвар, ин ша Аллагь, ужуб бере гъабхьиган, бегьем апIуз шулу. Гьаци, мисалназ, язва ади, давление за шули ва жара уьзрар кади, ушв бисбаан сагъ’вализ хатIа айи инсанаризра ушвар гъидирчуз ихтияр а. Иццурайи касдира, учв сагъ гъахьиган, ккадахьу ушвар бегьем апIурза дупну, ният дибисну ккунду ва, ин ша Аллагь, иццрушин улдубчIвган, ният кIулиз адабгъну ккунду.
Са-сабган иццрушин кайирихьан, чан гьял фициб вуш, гъаври хьуз шулдар. Дугъу, ушв бисувал чаз хатIалу вуйин-дарин, духтрихъди мясляаьт дапIну ккунду. Фикир тувуб тIалаб вуйихьки, думу духтир учв динлу, ибадат апIурайи ва Аллагьдин каламарин гъавриъ айи кас духьну ккунду. Му дюшюшдиъ духтриинра аьхю жавабдарвал ал. Дугъу, инсандин гьял фициб вушра дилигди, ушв мибисан дупну ккундар. Ясана гьаци, дугъан гьял ахтармиш дарапIди, ушвар чарасуз дис дупну, нахуш касдин сагъ’вализ ва уьмриз хатIалу аьгьвалатра хьуз гъитну ккундар. Инсан учвра ушвар дисуз удукьру шартIариъ ва гьялнаъ хьуз чалишмиш духьну ккунду. Хъа фициб аьгьвалатнаъ ашра, мусурман диндиъ инсандиз анжагъ уж’вал ккун апIура ва гьарсаб читин дюшюшдиан удучIвуз сагъ’вализ ва уьмриз хатIа даршлусдар рякъяр улупна.
