Хив райондин Заан Яракк гъулаъ культурайин цIийи хулан дарамат дивну ва думу багахь йигъари абццди. Му мялуматар учуз Хив райондин культурайин цирклин кIулиъ айи Казбек Къазиевди тувну.

 

«Заан Яракк гъулаъ культурайин хулан ва Хив гъулаъ — бицIидаринна живанарин искусствйирин мектебдин дараматар бинайиан рас дапIну ккудукIнача. Гьамусяаьт Ра-мазандин ваз ккебгънайивалихъди аьлакьалу вуди, думу хулар ачмиш апIбан серенжемар майдин вазлиз гъитунча. Гьаму кьюбиб дараматар федеральный бюджетдин дакьатарихъ «Медениятдин бушлугъ» программайин дахилнаъди бинайиан цIийи алауз мумкинвал гъабхьну. Гъуху расвалин ляхнарикан улхуруш, культурайин хуланра, искусствйирин мектебдинра ялгъуз цалартIан имдарди вари гьюдюхну: гъваъ, раккнар, унчIвар, жиликк ккахьнайи кьулар ва гь.ж. Цалар айтIанра, зиъланра дюз алаъну. Манишин тувру гъурулуш ляхник кипну. Дараматарин гьяятарилан бару дизигну, къайдайиз гъахну. Багарихьди Заан Яракк гъулан культурайин халра, Хив гъулаъ айи бицIидаринна живанарин искусствйирин мектебра материалинна техникайин цирклианра бегьемди тямин апIиди. Думу харжарра федеральный бюджетдиан апIурайидар ву»,

— гъапну Казбек Къазиевди.

Йиз сюгьбатчийин гафариинди, майдин вазлиъ (гьеле йигъ мялум дапIнадар) Хив райондин культурайин цирклиъ цIийи дараматар арццбан серенжемариз, РД-йин культурайин министр Зарема Бутаева кIулиъ ади, республикайин меркездиан хайлин хялар гъиди. Хъа гьамусяаьт бицIидарин ва живанарин искусствйирин мектебдиъ бажаранлу бицIидар концертдин программайихьна гьязур шула. Мидланра гъайри, программайин дахилнаъди думу серенжемариъ табасаран эстрадайин хайлин машгьур артистарра иштирак хьиди.