Гъябгъюрайи йисан 1-пи апрелихъан хьадукран призыв тешкил апIбан, пенсйирин индексация апIбан, налогарин льготйир тувбан ва жара цIийивалар хьиди.
Яшайишдин пенсйирин индексация
Апрелин вазлиъ яшайишдин пенсйирин аьдати индексация апIувал кIули гъабхиди. Думу гьар йисан гъабхурайиб ву. Гьаму йисан пенсйирин кьадар, гъубшу йисандин инфляцияйин тасдикь дапIнайи дережайиз асас вуди, 8,6%-диинди за хьибди. Гьаддин гьякьнаан Государствойин Думайин спикер Вячеслав Володинди мялум гъапIну.
Индексацияйи 4 миллион касдиз хайир хибди ва думу харжариз бюджетдиан уьмуми кьадар 33,7 млрд манат жара апIиди.
Бизнесдиз ва ватандашариз налогарин льготйир
Санкцйирин шартIариъ алверчйириз ва ватандашариз кюмек вуди налогарин льготйирин нубатнан уьлчмйир гьяракатнаъ учIвди. Дурарин гьякьнаан налогарин къанунчивалиъ тIаъру дигиш’валар 26-пи мартдиъ кьабул гъапIну. Дурариз асас вуди, банкариъ уьбхюрайи пулилан гъюрайи процентарикан 2021-2022-пи йисари НДФЛ ктабгъидар.
Хусуси касарин шейъ-шюйъдилан уч апIру ва жилин налогдин кьадар гьисаб апIруган, кадастровый кьимат йисан эвелиъ тасдикь дапIнайи кьадарнаъди гъубзди.
Мидланра савайи, 2022-2024-пи йисари IT-компанйирин гъазанжарикан налог ктабгъидар. Урусатдин гостиницйирра НДС-дихьан азад апIура.
Донбассдин женгарин иштиракчйириз ветерандин статус тувди
Апрель вазлихъан хъюгъну, Украинайиъ гъябгъюрайи хусуси метлеб айи операцияйин иштиракчйир ва Донецкдинна Луганскдин жилиин женгариъ иштирак’вал гъапIдар, гьаму йисан мартдин вазлиъ кьабул гъапIу къанундиз асас вуди, ветеранарси гьисаб апIиди.
Гьаму статусди дурариз Урусатдиъ дявдин гьяракатарин ветеранариз улупнайи налогарин, транспортдин, жилин ва яшайишдин уьлчмйрикан хайир ктабгъуз ва гьацира коммунальный гъуллугъарихъан пул тувруган, льготйир ишлетмиш апIуз мумкинвал тувиди.
Му къанун Госдумайи пленарный заседаниейин кьяляхъ дишлади кьабул гъапIнийи ва сакьюдар йигъарилан РФ-дин Президент Владимир Путинди дид’ин къул гъизигнийи.
Гьюкуматдин органарин гьякьнаан кучIлин мялуматар тарагъбаз жаза
Гьаму вазлихъан хъюгъну, гьюкуматдин органари Урусатдин Федерацияйин гъирагъдиъ чпин вазифйир тамам апIбан гьякьнаан чIуру кьаст ади кучIлин мялуматар тарагъбан тахсиркарвал апIбаз жаза тувру къанун гьяракатнаъ убчIвди.
Дициб тахсиркарвал гъапIдарин 1,5 миллион манат журум апIиди ясана дурариз 15 йисан дустагъ апIбан жаза гьадабтIиди.
Мушваъ улхуб асас вуди харижи уьлкйириъ айи вакилвалин идарйирин, прокуратурайин, Росгвардияйин, МЧС-дин ва СК-йин ляхникан гъябгъюра.
Мидланра савайи, харижи уьлкйириъ айи урусатдин гьюкуматдин органарин гьяракатар шаклу апIуз ккун гъабхьидарин 1 миллион манат журум апIиди.
Дармнар масу тувбан гьякьнаан
Урусатдиъ экономикайиз кюмек тувбан уьлчмйирин дахилнаъди «Дармнар масу тувбан гьякьнаан» ва «Ватандашарин сагъламвал уьбхбан бинйирин гьякьнаан» къанунариъ тIау дигиш’валар гьяракатнаъ учIвди. Дурариз асас вуди, эгер кьитвал арайиз гъафиш, харижи уьлкйирин дармнар масу гъадагъузра ихтияр тувди. Дидин гьякьнаан Урусатдин Правительствойи къарар адабгъиди. Хъа харижи уьлкйирин компанйириз чпин ляхин дебккуз ккун гъабхьиш, дурари гьацI йис ккимиди мялум дапIну ккун хьибди.
Хьадукран призыв
Апрелин эвелихъанмина хьадукран призыв ккебгъна. Гьаму йисан армияйиз гъахурайидарин кьадар улихьна йисантIан цIибди ву. Гьаддин гьякьнаан РФ-дин оборонайин министр Сергей Шойгуйи мялум гъапIну. Гъубшу йисан армияйиз гьау жигьиларин кьадар 134 650 агъзур кас вуйи.
Призывникар майдин вазлин аьхирариъ армияйиз гъахуз хъюгъиди. Гьадму саб вахтна, Сергей Шойгуйи гаф тувганси, призывникар дявдин гьяракатар гъягъюрайи йишвариз, гьадму гьисабнаан Украинайиз, ДНР ва ЛНР республикйириз гъахидар.
