Урусатдин Президент Владимир Путинди Дагъустан Республикайин Глава Сергей Меликовдихъди гюрюш кIули гъубхну. Гюрюшдиъ региондиъ айи яшайишдинна экономикайин аьгьвалатнахъди аьлакьалу месэлйир гъитIирккнийи.
Сергей Меликовди Владимир Путиндиз республикайиъ коронавирусдихъди аьлакьалуди арайиз дуфнайи аьгьвалатнакан ктибтну.
«Гъубшу йисан коронавирусдин уьзрихъди женг гъабхури, хайлин уьлчмйир кьабул гъапIнийча. Оперштабди, Роспотребнадзори ва Минздравди вахтниинди туву табшуругъари гъийин ужудар натижйирихъна гъахну. Вакцинайин рубар йивбан гьякьнаанра Урусатдин кьялан улупбарихьна гъюрача», – гъапну Сергей Меликовди.
Республикайин кIулиъ айири уьлкейин президентдиз региондиъ тIумутIчивал артмиш апIбаъ кьабул апIурайи уьлчмйириканра «Республикайиъ гьясил апIурайи тIумтIар Крымдиз, Ставрополиз, Краснодарский крайдиз гъахуз шулу. Ужудар сортарин гьясиллувал за дапIну, Советарин деврин вахтна гьясил апIури гъахьи кьадарнахъ хъуркьуз мумкинвал ачуз».
Сергей Меликовди Владимир Путиндиз республикайин инфраструктура артмиш апIуз 10,5 миллиард манатдин кредит тувбазра чухсагъул мялум гъапIнийи. Дугъу къайд гъапIганси, думу дакьатарин кюмекниинди Чиркейин шид уьбхюрайи йишвхьан мина Мягьячгъалайиз ва Каспийскдиз шид зигру цIийи гъурулуш тикмиш дапIну, гележегдиъ рес-публикайин жара шагьрар ва районарра штухъди тямин апIуз мумкинвал хьибди.
Сергей Меликовдин гафариинди, региондин агьалйир ляхнихъди тямин апIбан месэлайиз артухъ фикир тувуз ачухъ апIуз хъюгъювали республикайиъ айи бикарарин кьадарра цIиб апIуз мумкинвал тувну. Социальный займарин программайира гизафдар ляхнихъди тямин гъапIну – сифтейин капиталин кюмекниинди алверчивал, хусуси проектар ва программйир артмиш апIуз кюмек гъабхьну.
Дагъустандиъ агьалйир ляхнихъди тямин апIувалин месэла лап учIруди дийибгънашра, республикайин Главайи, региондиз гъюрайи инвестиц-йири агьалйир касибвалиан адауз кюмек тувур кIури, умуд кивра.
Инвестицйир ишлетмиш апIуваликан улхури, дугъу Сулейман Керимовдин тешкиллувалиинди гьязур дапIнайи Дербентдин артмиш апIбан проект кIваина гъабхнийи. «Думу программайиз улупнайи 170 миллиард манатдикан 70 процент хусуси инвестицйир ву. Гьадму программа уьмриз кечирмиш апIувал гьисабназ гъадабгъну, кьибла Дагъустандиъ агьалйириз лихру йишвар артухъ шлувалик умуд киврача»,-къайд гъапIну Сергей Меликовди.
