Мартдин вазлихъан мина, Дагъустан Республикайин Глава Сергей Меликовдин табшуругъниинди, республикайин муниципалитетариъ нубатнахъди гъулан мяишатдиъ гьясил гъапIу ипIру-убхъру сурсатар масу туврайи ярмаркйир тешкил апIура. Ярмаркйирин тешкилатчйир республикайин гъулан мяишатдинна ипIру-убхъру сурсатарин ва промышленностдинна ариш-веришчивалин министерствйир ва муниципалитетар ву.
Гъийин йигъаз ипIру-убхъру сурсатар асккан кьиматназ масу туврайи 9 ярмарка кIули духна. Региондин гъулан мяишатдин ва ипIру-убхъру сурсатарин министерствойин пресс-гъуллугънан кIулиъ айи Мягьямед Аьбдуллаевди туврайи мялуматариинди, ярмаркайиъ базрариътIан 20-30%-дин асккан кьиматназ итIру сурсатар масу гъадагъуз шулу мялум ярмарка наан тешкил апIурашра, душваъ иштирак хьуз республикайин вари муниципалитетариан, сатIиди гьисаб гъапIиш, 150-тIан артухъ гъулан мяишатдин карханйир гъюра.
«Гъубшу гьяфтайиъ (9-пи апрелиъ) Мягьячгъалайиъ ярмарка тешкил гъапIунча. Дина ихь республикайин саки вари районариан 180-кьан гъулан мяшатдин гьясилдрари чпи гьясил дапIнайи сурсатар – йикк, никк, мейвйир, йимишар ва гьацдар жарадар масу тувуз гъахнийи. Ярмаркайиъ масу туврайи малин ва чарвайин йиккун кьимат 300-370 манат, картфар – 40 манат, хъа келем – 60 манат вуйи. Гьаци имбуну ипIру-убхъру сурсатарра асккан кьиматариз масу тувнийи», – гъапну сюгьбатчийи.
Гъулан мяишатдин сурсатарин ярмаркйр гъахбан асас метлеб – базрариътIан, аьхю супермаркетариътIан лап асккан кьиматназ ипIру-убхъру сурсатар масу тувувал ву. Гьаци вуйивализ лигну, агьалйирра аьхю аьшкьниинди ярмаркйириз гъягъюра ва дурари му жюрейин серенжемар хъанара тешкил апIувал ккун апIура.
Мягьямед Аьбдуллаевди, ярмаркйириз гъюрайи муштарйирин кьадар гизаф вуйивализ лигну ва агьалйирин ярмаркйир кми-кмиди гъахбан гьякьнаан вуйи тIалабарра гьисабназ гъадагъну, республикайин гъулан мяишатдинна ипIру-убхъру сурсатарин ва промышленностдинна ариш-веришчивалин министерствйирин ва Мягьячгъала шагьрин администрацияйин кюмекниинди апрелин 23-пи–24-пи йигъари, ушварин машквран улихь, респуб-ликайин меркездин Пушкиндин ччвурнахъ хъайи кючейиъ нубатнан ражари ярмарка тешкил апIиди кIури, мялумат тувнийи. Эгер учвуз асккан кьиматназ ипIру-убхъру сурсатар масу гъадагъуз ккундуш, ярмаркайиъ иштирак йихьай.
Аьхириъ къайд апIуз ккундузузки, республикайиъ тешкил апIурайи гъулан мяишатдин сурсатар масу тувру ярмаркйириъ ипIру-убхъру сурсатарин, хъа ясас вуди йиккунна никкдин ери фициб вуш ахтармиш апIурайи, ветеринарияйинна санитарияйин дишлади экспертиза апIуз шлу, мина-тина хъапIну гъябгъру лаборатория либхура. Эгер ярмаркайиъ масу гъадагъу сурсатариин хъугъ’вал алдарш, гьарсар муштарийиз гьадушвахь хьмиди лабораторияйиъ думу сурсатарин ери ахтармиш апIуз мумкинвал а.
