Урусатдиин санкцйир иливнайивализ лигну, уьлкейин Президент Владимир Путинди, ихь гьюкуматдиъ итIру сурсатарин гьясиллувал за ва экономика артмиш апIбан бадали, регионарикан артухъди зегьмет зигувал, хъа гъулан мяишатдин сурсатарин кьадар артухъ апIбан бадали, эйси хътарди дирчнайи хутIларин жилар ишлетмиш апIувал ккун гъапIну.
Къайд апIуб лазим вуки, аьхиримжи вазлин арайиъ му цирклиъ зегьмет зигурайидариз льготйир тувбан швнуд-сад уьлчмйир кьабул дапIна. Гъийин йигъан ипIру-убхъру сурсатарихъди аьлакьалу аьгьвалат читинуб вуйивализ лигну, гьамусяаьт циркил арт-миш апIбаз гьюкуматдин терефнаан туврайи кюмек хъанара яркьу апIура.
Улихьна йигъари Сергей Меликовдин регьберваликкди Дагъустандин гъулан мяишатдин циркил артмиш апIбаз бахш дапIнайи яркьу заседание кIули гъубшну. Заседание ачмиш апIури, дугъу Дагъустан гъулан мяишатдин циркил гьаммишан асасубси гьисаб апIурайи республика вуйиваликан ва уьлкейин кIулиъ айидари кьабул апIурайи уьлчмйир ихь региондиз важиблудар вуди гьисаб апIурайиваликан гъапнийи.
Варидиз мялум вуйиганси, гъулан мяишатдин циркил ужуди артмиш шулайи Урусатдин регионарин арайиъ Дагъустан Республика 2-пи йишв’ин ал. КIули гъубшу заседаниейиъ республикайин Главайи мялум гъапIганси, ухьухь гьясил апIурайи гъулан мяишатдин сурсатар ихь уьлкейин хайлин регионарин базрариъ масу тувра. Гьаддиз, эгер Дагъустандиъ гьясил апIурайи ипIру-убхъру сурсатарин кьадар цIиб гъапIиш, ухьузси, вари Урусатдизра зарар хьибди.
«Гъи гъулан мяишатдин цирклиъ варитIан ухди гьял дапIну ккуни месэлйир, швнуд-сад йисариинди эйси хътарди дирчнайи хутIлар хъаъну, душвариъ тахил убз-бахъди, агрологистикайин дережа за апIувалихъди ва, жиларарин бегьерлувал за апIбан бадали, мелиорацияйин серенжемар гъахбахъди аьлакьалудар ву. Гьадму месэлйир гьяракатниинди гьял апIуз хътрюгъиш, артмиш’валра улихь гъябгъидар.
Гьаддиз, гъулан мяишатдин циркил гьамусдихъантина фици артмиш дапIну ккундуш, тешкил дапIнайи советдикан мяналу теклифариз ккилигураза», – гъапну Сергей Меликовди.
Къайд апIуз ккундузузки, цци республикайиъ хьадукран вахтна 225 агъзур гектарин жилар хъаъну, тумар урзуз гьязур дапIна. Му кьадар сачтIан 10 агъзур гектарин артухъди ву. Гьаму кьадар жилариин урзурайи вари тумарра ихь региондиъ гьязур дапIнайидар ву. Яна цци, урзуз кIури, жара йишвариан зат тумар масу гъадагъундар; дидланра савайи, гъюру йисазра гьамусмиди тумар, гъелемар гьязур апIбиинра машгъул духьна.
Республикайин гъулан мяишатдин ва ипIру-убхъру сурсатарин министерствойин пресс-гъуллугънаан учуз мялум гъапIганси, Дагъустандин Главайин табшуругъниинди, цци мейвйир кивуз пландиъ улупнайи жиларин кьадар 2,5 агъзур гектарин артухъ гъапIиган, дурарин уьмуми кьадар 63 агъзур гектар гъабхьну. Гьадму гьисабнаан 20 агъзур гектарар картфариз улупнайидар ву.
Мидланра гъайри, гил айи йимишар гьясил апIбаан Дагъустан Республика Уру-сатдин регионарин арайиъ кIакIначи ву. Думу йимишар гьясил дапIну, ички ктру меъли ширйир гьязур апIурайи заводарра республикайиъ лихура. Амма, гьяйифки, уч гъапIу йимишар уьрхру йи-швар гьелелиг цIибтIан адар. Гъийин йигъаз региондиъ 22 агъзур тоннайин йимишарна мейвйир уьрхру йишвартIан адар. Цци 3 агъзур тоннайин йимишарна мейвйир уьрхру йишвар дивну ккудукIиди. Гьадрарикан саб Табасаран райондиъра тикмиш апIурайиб ву. Гьаци вушра, гьелелиг республикайиз лазим вуйи кьадар йимишарна мейвйир уьрхру йишвар гьуркIрадар.
Жикъи къайд
Гъи Дагъустандиъ 1406 гъулан мяишатдин тешкилатар, 3813 кIул’инди вуйи дилаварчйирин КФХ-йир, 419923 кIул’инди вуйи хусуси мяишатар ва 184 агьалйирин сатIиди вуйи, коммерцияйин дару мяишатар а.
