Туристари рягьятвал гъадабгъру, дурар цIийи, таниш дару йишвар ахтармиш апIуз мина-тина гъюгъру фасил ккебгъра. Аьхиримжи йисари Дагъустан Республикайиъра туризм ужуди артмиш шула. Йислан-йисаз ухьухьна гъюрайи туристарин кьадарра швнуб-саб ражари артухъ дубхьна. Мисал вуди гъадабгъиш, сач Дагъустандиз миллионтIан артухъ туристар гъафну. Туристар гизаф гъюрашра, республикайиъ артмиш шулайи туризмдин цирклиз лазим вуйи къайдайин шартIар адар.
Цци, Урусатдиин санкцйир иливнайивал себеб вуди, жара йишвариз гъягъюз даршули, Дагъустандиз гъюрча кIурайидарин кьадар гизаф дубхьна. Рябкъру гьялариан, республикайиз гъюру туристарин кьадар сачтIан лап артухъ хьибди. Циркил региондин Глава Сергей Меликовди чан гюзчиваликкна гъадабгъна.
Улихьна йигъари дугъу, муниципалитетарин главйиринра иштирак’вал ади, му темайин гьякьнаан яркьу совещание кIули гъубхну. Совещание ачмиш апIури, региондин Главайи мялум гъапIганси, Дагъустандиз туристар гъювали респуб-ликайин экономикара арт-миш апIуз мумкинвал тувди. Главайин гафариинди, гъи рес-публикайиъ туризмдин циркил артмиш апIуз манигъ’вал апIурайи месэлйир гьял апIуз шлудар ву.
«Гьамусра гьял дарапIди гъузнайи месэлйир инфраструктурайихъди аьлакьалудар ву. Ухьуз гьуркIну туристар кьабул апIру гостиницйир ва ипIруб гьивру йишвар адар. Гьаддихъди сабси, асас вуди туристариз улупру тарихи ва машгьур йишварихьна гъягъру гизафси рякъярра ужуб гьялнаъ адар. Санитарияйин терефнаанра республика гьелелиг кьяляхъ хъа, ва, гьаддихъди сабси, туристарин хатIасузвал уьбхювалра зяифди ву.
Гьаддиз, муниципалитетарин главйирихьна илтIикIну, республикайиз гъафи туристар ужудар шартIар айи йишварихъди тямин апIувал дурари чпин гюзчиваликкна гъадабгъуб тIалаб апIураза», – гъапну Сергей Меликовди.
Совещаниейиъ Дагъустан-дин Главайи къайд гъапIганси, гьамусяаьт республикайин Табасаран, Къизлар ва СтIал Сулейман районариъ, инвес-торар жалб дапIну, туризмдин цирклиан гележег хъайи проектар уьмриз кечирмиш апIура. Цци гьаму шуббиб районариъ туризмдин инфраструктура артмиш апIуз хурайи инвестицйирин кьадар саки 160 миллион манат ву.
Табасаран райондикан улхуруш, думу туризм артмиш апIуз мумкинвалар айи районарикан саб ву. Фицики райондиз туристар жалб апIуз табиаьтдин, тарихнанна культурайин йишвар фукьан вушра а. Амма, думу йишварихьна гъягъру рякъяр читин гьялнаъ айивал, гъафи туристариз ипIруб гьивру ва дурар дахъру-гъудужвру йишвар адрувал себеб вуди, райондиъ туризмдин артмиш’вал кьяляхъ йивура. Туризм артмиш апIбан бадали, гьаму девриин тIалабариз жаваб тувру, заан ерийин инфраструктура тешкил апIувал чарасуз лазим ву.
Му месэлайин гьякьнаан Табасаран райондин глава Мягьямед Къурбановдира мялуматар тувну. Дугъан гафариинди, сач апрелин вазлиъ Сергей Меликов Табасаран райондиз гъафиган, Ургур чвуччвун ва сар чуччун гъала ва Рибчрар рякъбан кьяляхъ, дугъу, райондиъ туризм артмиш апIбан бадали, гьял дапIну ккуни хайлин месэлйирин гьякьнааан табшуругъар тувнийи.
«Сергей Аьлимовичди райондиз гъафиган туву табшуругъарин дахилнаъди, Табасарандиз туристар жалб апIбан бадали, аьхиримжи йисан туриствалин 4 маршрутдин проектар тартиб дапIнача. Мидланра гъайри, туристариз лазим вуйи йишварихьна гъягъюз рякъ улупбан 31 лишнар итна, райондиъ туризм артмиш апIуз аьхю инвесторар жалб дапIна ва туризмдин инфраструктура ужуб терефназди дигиш апIура.
Пуз ккундузузки, гьамусяаьт туризмдин циркил артмиш апIуз Табасаран райондиз жалб дапIнайи инвесторар жара йишвариъ яшамиш шулайи ихь ватанагьлийир ву.
Мисалназ, Хянгъяринна Хючнаарин арайиъ айи Рибчрарин гъвалахъ гостиницайинна ресторандин сатIиди вуйи комплекс тикмиш апIуз Къазахистандиъ яшамиш шулайи
Гьарихъ гъулан агьали Гьяжибег Аьлибеговди 100 миллион манат жалб гъапIну.
Хъа СертIил гъулан агьали Гюлмягьямед Шихмягьямедовди Хючна гъулаъ 4 хядран магазин-гостиница тикмиш апIуз 80 миллион манат жара гъапIну.
Кувагъ гъулан агьали Сабир Мирзаевди райондиъ рягьятвал гъадабгъру база дивуз 70 миллион манат харж апIбанди ву.
Ургур чвуччвун ва сар чуччун гъалайихъ гакIвлин бицIи хулар ва кафетерий дивуз 20 миллион манат райондиз сарсан инвестори жалб дапIна.
Яна сачна цци райондиъ туризм артмиш апIбаз бюджетдиан дару 300 миллион манат жара дапIна», – мялум гъапIну Табасаран райондин главайи.
Ав, туристар гъювали райондин экономикайиз ужуб тясир апIиди. Амма, гизаф туристар гъюбан бадали, ужудар шартIарра тешкил дапIну ккунду.
