Урусатдин Федерацияйин Правительствойин председатель Михаил Мишустиндин табшуругъниинди, РФ-дин экономикайин артмиш’валин министерствойи СКФО-йин субъектарихъди сатIиди экономикайин артмиш’валин план тартиб гъапIну. Думу пландин дахилназ гьарсаб региондиъ хьу-хьуб мяналу проектар гъадагъна.
Багахь йисари промышленностдин, гъулан мяишатдин, туризмдин ва жара цирклариъ гьаму проектар уьмриз кечирмиш апIували регионарин экономика артмиш дапIну ккунду: инвестицйир жалб апIувалиинди, цIийи карханйир тикмиш апIури, инсанариз лихру йишвар яратмиш апIури, субъектарин агьалйирин яшайишдин аьгьвалат за апIури.
Вари проектар милли метлебариз ва улихь дивнайи месэлйириз жаваб туврайидар ву. Гьаддиз харижи уьлкйири санкцйир иливурайивалиинди Урусатдин экономикайиз илзигурайи вахтна, му проектар хъуркьувалиинди уьмриз кечирмиш апIувал – улихь дийибгънайи важиблу месэла ву.
Дагъустандин экономика артмиш апIбан пландин дахилнаъди республика улихьна гъабхру, цIийи жюрейин ва чпин уьмуми кьимат 335 миллиард манат вуйи инвестицйирин 5 проект кадагъна.
Думу проектар «Каспийин кластерин артмиш’вал», «Кьибла Дагъустандиъ яр-йимишдин кластерин артмиш’вал», «Чекмечйирин шагьур» стратегияйин план уьмриз кечирмиш апIувал», «Шюшдин промышленностдин кластерин артмиш’вал», «Мягьячгъала» аэропорт рас апIбан кьюбпи пай» ву.
«Чекмечйирин шагьур» проект уьмриз кечирмиш апIбан дахилнаъди 7 миллиард манат харж апIбанди ву. Думу проектди 1600 касдиз лихру йишвар яратмиш апIиди. Хъа «Шюшдин промышленностдин кластерин артмиш’вал» проектдиз 7,6 миллиард манат харж хьибди, ва диди 700 кас лихру йишварихъди тямин апIиди.
Уьмуми кьимат 297,4 миллиард манат вуйи «Каспийин кластерин артмиш’вал» проект уьмриз кечирмиш гъапIган, 12 агъзур касдиз лихру йишвар яратмиш апIиди. «Кьибла Дагъустандиъ яр-йимишдин клас-терин артмиш’вал» проект уьмриз кечирмиш апIбан дахилнаъ уьмуми кьимат 13,8 миллиард манат харж шлу 2 подпроект а. Му проект уьмриз кечирмиш апIбан кьяляхъ, 2020 касдиз лихру йишвар арайиз гъиди.
Проектар уьмриз кечирмиш апIбан месэлйир гьял апIури, 19-пи апрелиъ Москвайиъ РФ-дин Правительствойин председателин заместитель Александр Новакдин регьберваликкди кIули гъубшу совещаниейиъ Дагъустан Республикайин кIулиъ айи Сергей Меликовди дурар айибтIан хъана ужу апIбан тек-лифар дивнийи. Гьамци «Кьибла Дагъустандиъ яр-йимишдин кластерин артмиш’вал» проектдиъ гъуларин мяишатарин сурсат тартиб апIбан проектра гьисабназ гъадабгъувал ва думу проектдин ччвур, региондин мумкинвалариз дилигну, «Дагъустандиъ яр-йимишдин кластерин артмиш’вал» кIуру ччвурнахъди гьюдюхювалин тек-лиф дивнийи. Проект уьмриз кечирмиш апIували 3,3 агъзур касдиз лихру йишвар арайиз хиди.
Александр Новакди къайд гъапIганси, му проектариз Урусатдин Правительствойи, кредитарин процентдин кьадарнаъди субсидйир тувбан бадали, аьлава вуди пулин дакьатар жара апIбан мумкинваларин месэла гьял апIиди.
