Апрелин 20-пи йигъан Дагъустан Республикайин Глава Сергей Меликов Урусатди Украинайиъ гъабхурайи хусуси метлеб айи дявдин операцияйиъ чпин гъуллугънан буржи тамам апIури гъийиху дагъустанлуйирин хизанарин вакиларихъди магьа 4-пи ражари гюрюшмиш гъахьну.
Гъийиху эскрарин багахьлуйириз чан дерин пашманвал мялум апIури, Сергей Меликовди къайд гъапIну: «Аьхиримжи йисари дюн’яйиъ чапхунчивалин ляхнар кIулиз адагъурайи уьлке сикин апIбан бадали, кьувват ишлетмиш апIувал лазим шула. Урусатди думу кьувват Украинайин аьтрафариин арайиз дуфнайи, сяргьятарин улихь яваш даршлу нацистариз аьксиди ишлетмиш апIурайивалин ухьу гъавриъ духьну ккунду».
Дагъустандин кIулиъ айири 1941-пи йисан чапхунчи фашистар ихь уьлкейин сяргьятарихъ дерккуз дархьивалин натижайиъ миллионариинди инсанарин уьмрар гъуху дявдин гьядисйир кIваин гъапIнийи: «Эгер ихь кIулин командующийди хусуси метлеб айи дявдин операция ккебгъбан гьякьнаан къарар кьабул гъапIундайиш, дявдин женгар ихь уьлкейин аьтрафариин ккергъдийи. Гьаддиз чпин улихь дивнайи месэлйир тамам апIурайи ихь кьушмари уьлкейин гележег уьбхюра».
Сергей Меликовди кIваин гъапI-ганси, гъийиху эскрарин хизанариз, гьюкуматдиси, думу метлебарихъ хъуркьбан бадали тешкил дапIнайи республикайин «Вари сатIиди» фонднура кюмек тувди.
КIваина хурача, гьаму йисан апрелин вазлиъ, Дагъустан Республикайин Глава Сергей Меликовдин табшуругъниинди, РД-йин зегьметнан ва яшайишдин артмиш’валин министерствойин багахь, Урусатди Украинайиъ гъабхурайи хусуси метлеб айи дявдин операцияйиъ гъийиху эскрарин хизанариз кюмек тувбан бадали, Дагъустандин региондин «Вари сатIиди» кIуру фонд тешкил дапIна. Гъийиху эскрарин хизанари банкдиъ ачмиш дапIнайи счетдиз, документар ахтармиш апIбан кьяляхъ, саб ражари тувру кюмек хътапIиди. Думу фонднан счетдиз гъийиху эскрарин хизанариз жвуван хушниинди кюмек апIуз ккунирихьанра пул хътапIуз шулу.
Дявдин гъуллугънаъ гъийихдарин багахьлуйириз вари жюрейин кюмек тувди, гьадму гьисабнаан медицина-йинра, бицIидариз образование тувбанра. «Гъийиху ихь гизаф баярин хизанариъ бицIидар гъузна. Адашдин кьягьялвал чешнеди дибисну, бицIидариз адаш игит вуйивалин гъавриъ ади аьхю шлуганси тербия тувну ккунду. БицIидариз кюмек апIбан, образование тувбан бадали, ухь’ан удукьруб вари апIидихьа», – гъапну Сергей Меликовди.
Гюрюшдин аьхириъ Сергей Меликовди къайд гъапIганси, респуб-ликайин районариз ва шагьрариз гъушиганра, дугъу гьаму жюрейин гюрюшар гъахиди. «Гьелбетда, ичв кIван зиян учхьан сагъ апIуз хьибдар, хъа ичв баярин машгьурвали учвуз яшамиш хьуз кюмек апIиди. Гьарганси гьамусра ухьу ихь душмнариин гъалиб хьидихьа, хъа гъийин деврин къурхулуваларихьан ухьу гъюрхдар кIваълан гьаидархьа», – аьлава гъапIнийи дугъу.
