27-пи апрелиъ Табасаран райондин Хючна гъулан 1-пи нумрайин лицейдиъ математикайиан 9-10-пи классариъ урхурайидарин арайиъ экономикайин илмарин доктор, профессор, Урусатдин лайикьлу экономист Зейдуллагь Юзбеговдин ччвурнахъ хъайи олимпиадайин муниципальный этап кIули гъубшну.
Олимпиада муниципа-литетдин глава Мягьямед Къурбановдин жягьтлувалиинди ва Ломоносовдин ччвурнахъ хъайи МГУ-йинна Табасаран районди сатIиди ляхин апIбан йикьрарин дахилнаъди, ва гьацира райондин образованиейин гъурулушдиъ бажаранвал кайи бицIидар ачмиш ва дурарик урхбахьна хъана артухъ гьевес капIбан бадали, тешкил дапIнайиб вуйи.
Олимпиадайиъ учв экономикайин илмин аьлим-теоретикси ва гьюкуматдин гъуллугънаъ тажрубалу гъуллугъчиси хъуркьувалиинди улупу профессор Зейдуллагь Юзбеговдира иштирак’вал гъапIну. Гьамусяаьт дугъу МГУ-йиъ ляхин апIура.
«Математика – гьякьлу илмарин шибритI ву, ва гизаф йисари Табасаран райондин мектебар ккудукIу бицIидар республикайин ва гьацира уьлкейин заан урхбан тешкилатарин физикайинна математикайин факультетарик урхуз кучIвра. Ихь урхбан тешкилатариъ аьгъювалар тувбан гьамусдин деврин къайдйир ишлетмиш апIури, му аьдат гележегдиъра давам дапIну ккунду», – гъапну Мягьямед Къурбановди.
Къайд апIуб лазим вуки, му олимпиадайин мектебдин этап гьаму йисан февралин вазлиъ кIули гъубшну. Муниципальный этапдиз райондин образованиейин 37 идарайин 57 урхурайир гъядягънийи, 32 – 9-пи классариан, 25 – 10-пи классариан.
Олимпиадйирин натижйир.
10-пи классариъ урхурайидарин арайиъ Къужник гъулан кьялан мектебдиъ урхурайи Эльвира Аьлимягьямедова гъалиб гъахьну, хъа Хючна гъулан 1-пи нумрайин лицейдиъ урхурайи Аьгьмед Рягьимовди ва Табасаран райондин гимназияйиъ урхурайи Алина Рашидовайи пешкешнан йишвар гъадагъну. 9-пи классарин арайиъ Табасаран райондин гимназияйиъ урхурайи Жигьан Рамазанова гъалиб гъахьну, хъа Гьесхъарин кьялан мектебдиъ урхурайи Амина Аьбдуллаевайи ва Халгъарин кьялан мектебдиъ урхурайи Индира Аьбдуллаевайи пешкешнан йишвар гъадагъну.
Олимпиадайин гъалибчйириз ва пешкешнан йишвар гъадагъдариз Москвайиз гъягъюз сертификатар тувну. Душваъ дурариз уьлкейин машгьур вузариъ, гьадму гьисабнаан МГУ-йиъра, урхбан гьяракат фици тешкил дапIнаш, таниш хьуз мумкинвал хьибди. Гьацира дурариз Москвайин медениятдин ва тарихнан асас йишварихьна экскурсия тешкил апIиди.
