РД-йин Госавтоинспекцияйин пресс-гъуллугънаан мялумат тувганси, гъубшу гьяфтайиъ Дагъустандин рякъяриъ хатIалу 25 дюшюш гъахьну. Думу аварйириъ 10 кас гъийихну, дурарин арайиъ сар бицIирра а, 33 кас, гьадму гьисабнаан шубур бицIир, гъагъи зийнар духьну, республикайин больниц-йириз гъурхну.
ГИБДД-йи машинар хъаърайидариз ва рякъярилан улдучIвурайидариз рякъюъди гъягъбан къайдйир уьрхювалихьна дих апIура.
Гьаддихъди сабси, абйир-бабари веледарихъди му месэлйирин гьякьнаан сикин дарди профилактикайин сюгьбатар гъахури, уьмриъ гъахьи хатIалу дюшюшарикан ктибтури, дурар рякъяриъ ихтиятвал уьбхувалихьна жалб апIури ккунду. Мисал вуди, гъябгъюрайи йисан апрелин 21-пи йигъан Къизилюрт райондиъ гъабхьи дюшюшдикан ктибтуз ккундузуз.
Дагъустандин МВД-йин пресс-гъуллугънаан хабар тувганси, му хатIалу дюшюш йишвну сяаьт 11-дин гьацIаъ Султанянгиюрт гъулаъ гъабхьиб ву. Му гъулан 17 йисан яшнаъ айи сар живан бали, республикайиан жара йи-швариз лихуз душнайи чан халуйин Мерседес машин ихтияр адарди гъадабгъну, чан бицIину гъардаш ва чахъди сатIиди мектебдин 11-пи классдиъ урхурайи шубур дуст баярра хъади гъулан мистаз йишвандин гъудган апIуз гъягъюру. Машин хъапIуз дугъаз саб жюрейинра ихтияр адайи. Мист’ан удучIву баяри, машиндин нумрар алдагъну, айитIинди ивну, дидиъди яртуз гъягъюру. Рякъюъдиъ машин хъапIбан вари къайдйир чIур апIури, машин зарбди гагь арчулну, гагь гагулну терефназди илбицури хъапIрайи живандихьан, вахтниинди думу дюз алапIуз вая дебккуз дархьиди, машин Октябрин инкьилабдин ччвурнахъ хъайи аьхю гъанавдизди абхъру. Му дюшюшдин натижайиъ Мерседес хъапIрайир ва ду-гъахъди улихь деънайи бай сагъди гъузру, хъа машиндин кьяляхъ деънайи шубур бай кечмиш шулу. Дурарин яшар 16-17 йистIан дайи.
Республикайин МВД-йиан къайд гъапIганси, му бедбахтвалин дюшюшдин гьякьнаан мялуматар уч дапIна ва суддин къарар адабгъайиз ккилигура.
