Рамазандин ваз – ислам диндин календариъ варитIан гирами ваз ву. Думу ваз динагьлийирин рюгьнан, имандин мюгькамвал ахтармиш апIру вазсира гьисаб апIура. Магьа гьаму йисандин гирами Рамазандин ваз ктабхъайиз сакьюдар йигъартIан имдар. Ихь варидарин гъидису ушвар, гъапIу гъудгнар, дюъйир, рягьимлувалин, гьюрматнан ляхнар Аллагьди кьабул апIри.
Аьхиримжи йисари Дагъустан Республикайин районариъ ва шагьрариъ ушвар дидиснайи мусурмнари сатIиди ушв гьибтувал аьдатнаъ убчIвна. Мидланра савайи, РД-йин муфтиятдин тешкиллувалиинди ихь уьлкейин жара аьхю шагьрариъра сатIиди ушв гьибтувалин серенжемар гъахура.
26-пи апрелиъ Иса Пайгъамбрин ччвурнахъ хъайи Духовный центриъ Табасаран ва Хив районариан вуйи агьалйирин сатIиди ушв гьибтувалин мажлис кIули гъубшну. Думу шадлу серенжемдиз Табасаран ва Хив районарин 5 агъзуртIан артухъ вакилар уч духьнайи.
Серенжем ачмиш апIбан кьяляхъ, душваъ сарпирди Дагъустандин муфтиятдин фатвайин отделин гъуллугъчи Мугьяммад-Рамазан Ражабовдиз гаф тувнийи. «Ислам динди инсандиз чав апIурайи гьарсаб ляхниъ эдеб-лувалихьна, асуллувалихьна, нач’валихьна дих апIура, нягьякь’вал, лайикьсузвал тянкьид апIура. Жара касдин кьяляхъ улхувал, дугъан камивалар тянкьид апIувал ухьуз хас дар. Абу Гьурайрайин (чакан Аллагь рази ишри) бикIбариинди, Аллагьдин Пайгъамбри (с.аь.в.) гъапну: «Ихь дин варитIан дугъриб ва марцциб ву, хъа Первердигари исламдин гьякьикьи маш улупувал ухь’ина табшурмиш гъапIну. Мусурман дин хъапIри, гьаммишан жарарин кьяляхъ улхурайи, чаз лазим дару ляхнаригъ гъючIврайи, футнйир апIурайи касдикан жарадари фициб фикир апIур?». Гьаддиз, гьюрматлу чвйир-чйир, ихь диндиъ ужуб хасият, асуллувал, абйир-бабарихьна, хпирихьна, жилирихьна, гъуншйирихьна айи гьюрмат варитIан кьиматлу ву. Эгер ихь арайиъ албагувал дархьиш, ухьу сар-сарихьан ярхла хьиди, кюмек адарди, ялгъузди гъузди. Эгер ихь хасиятнан ужудар гъиллигъар ишлетмиш апIуруш, ухьуз гизаф дустар хьиди. Аллагьдин Пайгъамбрихьан (с.аь.в.) гьерхну кIур: «Инсандин ляхнарикан, гьяракатарикан варитIан кьиматлуб фунуб ву?» Дугъу жаваб тувну: «Ужуб, эдеблу хасият». Аллагьди ухьу ихь ляхнариинди ислам диндин уччвувал, марццивал улупру агьларикан апIри», – гъапнийи чан улхбаъ Мугьяммад-Рамазан Ражабовди.
Серенжемдиъ региондин парламентдиъ республикайин Главайин вакил вуйи Нюсрет Уьмаровра удучIвну гъулхнийи. «Гъийин гьамциб важиблу мажлиснаъ иштирак хьувал узуз аьхю гьюрмат вуйиз. Гьаму вазлиъ вари Дагъустандиъ гьамцдар серенжемар кIули гъягъюра. Мицисдар серенжемари инсанар сатIи, дурарин рюгь марцц апIуру. Аллагьди ихь гъидису ушвар, гъапIу дюъйир кьабул апIри», – къайд гъапIнийи дугъу.
Хив райондин глава Ярмет Ярметовди чан удучIвну улхбаъ, гьамусяаьт Украинайин аьтрафариин кIули гъябгъюрайи хусуси метлеб айи дявдин операцияйиъ иштирак шули, чпин гъуллугънан буржи тамам апIурайи баярихъанди, дурар сагъ-саламатди чпин хизанарихьна кьяляхъ гъювалихъанди дюаь апIувал ккун гъапIнийи.
Серенжемдин аьхириъ удучIвну гъулху Хив райондин имам Шябан Салигьовди ушв гьибтбан мажлиснан харжар чан кIул’ина гъадагъу, амма чан ччвур ачухъ дарапIувал ккун гъапIу касдиз, му йигъан гвачIнин ухди дуфну, гьаму мажлис тешкил апIуз, гьивуз-гьадабгъуз кюмек гъапIу волонтерариз чухсагъул мялум гъапIнийи. Хив райондин имамди уч духьнайи агьалйириз хайлин насигьятнан гафарра гъапнийи.
Серенжемдиз уч духьнайидарин арайиъ тупут ипну, умра гьяждиз гъягъюз кьюб путевка, саб якъ, саб телефон ва самовар пешкешарди тувнийи. Хъасин уч духьнайидари ушв гьибтнийи.
