Аьхир адру дердер

 

Йитим духьну ккаъну айир дердери,
Лицурайза кIан-кIул адру чюллериъ.
Хабарсузди алахънийзуз ялгъуз кас,
Гьам узуси дургну айир дердери.

Му касдира гьерху узхьан аьгьвалат,
ГьапIуз узу дарди адаш саламат.
Амма узхьан дикъат жаваб даршиган,
Пуз хъюгънийи чаз дубхьнайи хажалат.

Дугъриданра аьхюб вуйи мугъан дерд,
Хизандикан имдай мугъаз сар велед.
Пашманвали ккагъну айир узузси,
Лицурайи агуз ккунди инсан мерд.

Узкан ишри увуз гъардаш гъапиган,
Бейнава кас рази гъахьний лап узкан.
Йикьрар гъапIча яшамиш хьуз сатIиди,
Дюзмиш дапIну кьюриддира саб хизан.

Аьхю Худа! ТIалаб вуйич гъи увкан,
Сар имдарди мигъитана ич хизан.
Аьхиратдиз гъайих сабси кьюридра,
Даршлуганси гъузну имбур зат
пашман.

Дердер! Дердер! АпIурачва уьмур нур,
Адаршул зат чан уьмриъ дерд
дярябкъюр.
Веледдин сес багъри хулаъ имдруган,
Дадиз шула аку дюн’я гъурбагур.

 

Мясляаьт

 

Алагьдин лукI дахъра ругдик гъакIиган,
Аьян гъитну хъубсну айи гъвандикан.
Хъа фукьандар, имдарди зат накьв
ва а шил,
Дургри ада инсанарин уларикан.

Инсан дургбан себеб аьгъя варидиз,
Шерик шула дявикрар му ляхнариз.
Гьаз апIдайкIан инсанари мясляаьт? –
Шаду уьмур гъубзруганси халкьариз.

Гизафдарси йитим вуза узура,
Адашдин накьв мялум дариз гьич
гъира.
Гьам узуси, хъана фукьан агьалйир,
Аьхю дявдин зулмари лап дургнада.

Мясляаьт, мясляаьт, хъана мясляаьт
Гере шула инсанариз гьар сяаьт.
Мясляаьтназ футна, кучIал хай даршул,
Аьгъдарди дар инсанариз му аьдат.

Багъри адаш гъузри гьарган веледдиз,
Гъюрхюндарда дади думу дявйириз.
Улихь гьучIвну гьюкумдарар,
паччагьар,
Гъачайдачва мясляаьтнан майдандиз!

Накьдин гъардшар, гъи духьну
душмунар,
Ачмиш духьну ада дявдин цIайлапнар.
СатIи духьну мясляаьтназ дустарси,
Дяви дебккай, аьхю миллет славянар!
КкудукIура вари дустар

Жигьил вахтна дустар айзуз,
Кьадарсузди гьюрмат ади.
Гъи хъюгъназа кIваин апIуз,
Гъушу йигъар дустарихъди.

ЙицIуд йисан саб партайихъ,
Киврай дарсар эзбер дапIну;
Хал дидривди ич «Пирарихъ»,
Агъабала гъул’ан гъушну.

Гьам узузси, йитим Юсуф,
Ашукь гъахьну мяракайиз.
Ислягьвализ вуди лап луф,
ГъуштIилна гъач гъапну элдиз.

Хабар тувну ихь дагълари,
Гъи гъурубкьну узухьна дерд.
КIулар эрхна ай дустари,
Имдругана дагъсир Эсед.

Кьюбан ккебгъу хизандикан,
Гъидритди зат уьмриз велед.
Шябан гъушну дюн’яйилан.
Гъитну учуз зиян ва дерд.

Мурадяли – гирами дуст,
Физматдик кучIвний узухъди.
Заан мялим гъахьнийи дуст,
Бухьнагъ гъул’ан сарпир вуди.

40 йисан чветIан артухъ,
Дуст Сейфуллагь узуз гъахьну.
Фукьан вушра гъапIза язухъ,
Кивган дугъак уьзур чIуру.

Вахт гъабхьиган гъяри шуйча,
ЦIийи Курккакк ккипуз суфра.
Улихь шуйич гьарган хунча,
Фарман вуди тамадара.

Инженер кас шулдар гьархуз,
ЦIурутIларин Аьлимурад.
Бай дарфиган сагъди хулаз,
Дердну гъургну аьхю устад.

Студент йисар зухъди гьаур,
Йиз гъулажви Тагьир вуйи.
Хайлин йисари гъилихур,
Хив мектебдин директорди.

Халайин бай – дагъсир Шамил,
ЧветIан артухъ инсан вуйзуз.
Йиф убгъури, адарди шил,
Гъабхну мугъаз рякъ ягъурсуз.

Аьхю чудар дуст Залумхан,
Фукьан вушра дугъри вуйи.
Чан бин’ина узу гъушган,
Нисар, масар кIаркIтIихъ шуйи.

Шукур увуз, Худа-Аллагь!
Инсаф апIин жигьилариз.
КучIал дариз затра, валлагь,
Дустар вари гъягъюрайиз.

Мялимвалин заан устад
Селим вуйи ГъуштIил гъулаъ.
Урусатдиъ ай мугъан ад,
Уткан хизан айи хулаъ.

Уткан абин дирбаш Неби,
МВД-йиъ лихуз хъюгъну.
Мушван ляхнар кьабул дарди,
Дердлу гъахьир, уьзри ккагъну.

Авар-кавха явхънин устад,
Мирзакерим ШихитIкьарин,
Дярбкъди чан хизандин ад,
Ухди гъушну дюн’яйилан.

Сар Гъвандикк риш ккун гъахьиган,
Гъафну зухьна дуст Селимхан.
Мяъли бикIуз ккунириз чан,
Кюмек ккунди шаирихьан.

Аьгъюр гафар хуб албагуз,
ЦикътIарин вакил Рамазан.
Хул’ан гъушур кIари абгуз,
Душнади шул сагъ уьмриан.
Гъафиганна узу гъулаз,
Чахьна теклиф шуй Наврузан.
Гъяри шуйза дустран хулаз,
Гиран дарди гъитуз узкан.

Гьам узуси математик
Вуйи хиварин Керимра;
Дюзвализ вуй аьхю шерик,
Ккунир дайи зат гьярамра.

Кьандиси дуст гъахьну узуз,
Адлу шаир Пирмягьямад.
Аьгъдарди чаз кучIал апIуз,
АпIрур гьарган дустарин ад.

Яшлу касар чиб рягьматдиз,
Гъягъюрайган дюн’яйилан.
ГьапIруб ибшри жигьил касдиз,
Ярхла хьуб чан хизандихьан?

Дустар! Ухди гъушчва уьмриан,
Веледариз гъитну дердер.
КIваълан гьархуз шлудар узхьан –
Албагунза учвкан бендер.

 

Фикрар

 

АпIурачва гагь узу шад,
Гагьсан йиз кIваз хурачва дерд.
Улубкьнашра хуш хьадукар,
Узук гьевес кубчIври адар.

Вахт-вахтарик кIури шулза –
Фукьан уткан дарин дюн’я!
Амма хъасин дуст имдруган,
Даккун шулу дюн’я гьарган.

НивкIукди йиз гъяркъган гюзел,
Гъудужвунза кади шадвал.
Амма гъабкган гъариб хабар,
КIваълан гьюрхру гъяркъю нивкIар.

Гъузуз шулдар дарпи фикрар,
Гьарсар касдиз хас вуйидар.
Фикрар ишри, дарди дердар,
Дадиз ади шад веледар.

Фикриз гъюра гъи мидитIан,
АпIру ляхин закур йигъан.
Гьамци духьна инсаният,
Сар-сарихьна ади гьюрмат.

КтубчIвиган жвувкан тахсир,
Инсан шула дидин йисир.
Хъа игитвал улупиган,
Тахсир гьархра гъабхьирихьан.

Фикрар, фикрар, мубганай жан!
Кум апIури йиз уьмрикан.
КIваин хури шаду вахтар,
Гьауз гъитай уьмрин йигъар…

 

Мялимар

 

ГъуштIлан сифте кьюр мялимар,
Рамалданна Кьади вуйи.
Хъа гъушган хайлин йисар,
Гъул’ан мялим Селим вуйи.

Лап гьирифну дидхъанмина,
Адлу жерге мялимарин
Хив ва Ляхла, хъа Гъвандиккра,
Мялимар айи гъуштIларин.

Заан чвурназ хас мялимар,
ЙицIуркьана ада ГъуштIил.
Вардиз ада заанвалар,
Лап аьгъяди апIур ляхин.

Мялимарин сагъ хизанар,
Тярифнандар ву гъуштIлариз.
Дурарин гьюрматлу веледар,
Хъуркьру гъулан мяракайиз.

 

Рапак дере

 

Гафар дарапIди зат гьяйиф,
АпIураза му яв тяриф.
Багъри йиз юрд – Рапак дере,
Утканвализ вува бере.
Миржиб гъярна саб Рапак нир,
Ахмиш шула йиз гъуштIлариз.
Мициб девлет табиаьтдин,
Адар жара ихь гъулариз.

Пуз ккаш уву – дергуз шулдар,
Кьабул апIру хялар адар.
КучIал дарди кIуразавуз –
Вари гъуландар хялар шулвуз.

Аьбкъюза ккундуш хьадар яйлагъ,
Гьарсаб гъяригъ гъабгъу булагъ;
Нирихъна гъач, ккебгърай Рапак,
Гъябгъюрайи ГъуштIил гъул’ан.

Кьаркьул дагъдин саб кIакIналан,
Гъилигиган, шулу гьяйран.
Рапак дере – Дирчва мягьял,
Вува учуз кIаздин гьякал.

 

Хизан

 

Кьюб хизандин аьхю кIулар,
Гъюри шуйи мясляаьтназ;
Эвленмиш дапIну живанар,
Веледариз хулар ккебгъбаз.

Ваъ кIурдайи веледари,
Аьхюдарин албагбариз.
Далдабу, жам икриъ шуйи,
Живанарин сабпи сумчриз.

Саб кьадар вахт гьирифиган,
Гьязур шуйи цIийи хулар.
Му хулариз бай-швушв гъушган,
Рас апIуйи йирси хулар.

Ада хайлин хуш мисалар,
Ужуб хизан дюзмиш гъапIдар.
Ада хъана мисаларра,
Хизан халкьдиз улулупдар.

ЦIийиб дубхьна гьамус аьдат,
Живанди чаз тай агура.
Гъабхьигана шад-мясляаьт,
Аьхюдариз хабар тувра.

Шуру кIура чан живандиз –
Гьязур апIин цIийи хулар.
Яв дидихъди зат ккундариз –
Магьан увуз йиз хиялар.

Рази гъахьи язнайира,
Зал абгура мяракайиз.
Сумчриз гъафи хяларира,
Кюмек тувра живанариз.

Гьам ухдиси, гьамсан гъира,
Хизандин кIул аба шуйи.
Мугъаз айи чан девлетра,
Уьрхюрайи бай-риш вуйи.

АпIругана абин тяриф,
Улупуйи сагъ веледар.
ДарапIди зат гафар гьяйиф,
Улупуйи вардин ляхнар.

КIуругана хизандикан,
Гьархуз даршул дадара зат.
Дупну ккунду аьхюшивкан,
Фукьан гъубччнуш дугъу палат.

Амма гьамус бязидариз,
Адаш-дада гьархра кIваълан.
Гъюри шулдар отпускайиз,
Хъади чахъди цIийи хизан.

Ярхла айи балкан-шуркан,
Гъариб хабар гъебкиш нагагь;
Рякъюъ шулу аба гьарган,
Духьнади учв бегьем русвагь.

Гьерхиш узхьан: «Ануз девлет?»
Девлет вуйиз вари хизан.
Уьбхюри йиз хулан беркет,
Лицураза жиларилан.

Хизан! Аьжаб вува заан! –
Инсанарин сифте бина.
Душну ашра ГъуштIил гъул’ан,
Гьархуз шулдар гъулан хазна.