Дюн’яйиъ инсандин варитIан аьхю девлет – жандин сагъвал ву. Сагъ’вал адру касдиз уьмрин шадвал гюзет апIуз лап читинди алабхъуру. Гьаддиз дицдар касарин гьюкуматдин, жямяаьтлугъдин терефнаан вуйи кюмекнаъ игьтияж а. Гьюкуматдин терефнаан кюмек тувбан бадали, инсандиз жандин бегьем сагъ’вал адрувал духтрари тасдикь апIурайи документ лазим ву.
2022-пи йисан июлин садпи йигъхъан мина Дагъустандиъ сакьат инсанариз инвалидвалин документ тувбан цIийи къайда (медицинайинна социальный комиссияйин улихь иццурайи кас учв дийигъуруш ясана думу чан хулаъ имиди медицинайин справкйириинди документ дюз апIуруш, аьзарлуйи чав ктабгъуру) кьувватнаъ убчIвди. Дидин гьякьнаан РД-йиъ айи МСЭ-йин кIулин бюройиан мялумат тувра.
Чаз фициб къайдайиинди думу ляхин апIуз ккундуш, бегьем сагъламвал адру ватандашди поликлиникайиъ ктабгъуру, хъа къайда ктабгъбаъ учв иштирак шулаш, дугъхьан комиссия гъабхру йигъра, вахтра ктабгъуз шулу.
Эгер учв аьзарлу комиссияйиз гъюрадарш, аьзарлуйин гьякьнаан поликлиникайиан хъадаънайи медицинайин документариз асас вуди, дугъаз инвалидвал тувбан вая тутрувбан къарар адабгъуру. Медицинайин оборудованиейихъди ахтармишар гъахувал лазим дарш, аьзарлуйихьан комиссияйиз дарфиди гъузуз шулу.
«Республикайин медицинайинна социальный экспертизайин гъуллугъну, ич пишекрари, РД-йин Минздравдин, республикайин медицинайин идарйирин пишекрарихъди сатIиди электрондин аьлакьйир къайдайиз хувалиин ляхин гъабхура. Диди гьаму терефнаан цифровизацияйин ляхник гьяракат кипра, ватандашариз инвалидвалин документ гъадабгъувалин ляхин рягьят апIура», – ктибтнийи учухъди сюгьбатнаъ РД-йиъ айи МСЭ-йин аьхюну бюройин кIулиъ айи Шамил Рамазановди.
Дугъу къайд гъапIганси, Урусатдин зегьметнан ва агьалйир яшайиш жигьатнаан уьрхбан министерствойи медицинайин тешкилатарин ва медицинайинна социальный экспертизайин идарйирин арайиъ мялуматарин аьлакьа уьбхбан гьякьнаан приказдин проект тартиб дапIна. Гьаму проектдиз асас вуди, аьзарлуйин медицинайин документар думу яшамиш шулайи йишван МСЭ-йин бюройизси, МСЭ-йин комиссияйин къарар ва инсандин сагъламвал хъана ахтармиш дапIну ккунивалин гьякьнаан теклифар электрондин каналариъди поликлиникайизра хътаиди. Чан гьякьнаан месэла фици гьял апIураш, ватандашдихьан чаз гъюрайи мялуматариан аьгъю апIуз шулу.
«ЦIийи къайдайиз швнуб-саб ужудар мумкинвалар а: ватандашариз рягьятвал, кьабул апIурайи къарарнан гьякьлувал, кIули гъахурайи ахтармишарин ачухъ’вал. Уьлкейин кIулиъ айидари инсандиз, думу яшамиш шулайи йишвкан асиллу дарди, кьувватнаъ айи къанундин къайдйириинди, комиссияйин гьякьлу къарар кьабул апIбан бадали, цIийивалар адагъура. Мидланра савайи, инвалидарин реабилитация апIбан программйириз дикъатлу фикир тувузра артухъ мумкинвал хьибди», – гъапну Шамил Рамазановди.
КIваина хурача, COVID-19 тарабгънайи вахтна медицинайинна социальный экспертизайи гизафси манзилнаъди ляхин апIури гъабхьну.
