Вари Урусатдин гъулариан ва бицIи шагьрарианси, Дагъустандин гизаф гъуларианра жигьилар ужуб уьмур ва яшайишдин гъулайвалар бадали удучIвну гъягъюра. Гъулар ккадахьура.
Кьаби абйир-бабариз гъулар, чпин жигьил уьмур адапIу хулар дирчну, шагьрариз жвуван веледарихьна удучIвну гъягъюз ккундар. Гьаци инсанар гъулариъ ялгъузди гъузра. Дагъустандиъ 15 агъзуртIан артухъ ялгъузди яшамиш шулайи инсанар а.

 

 

Ялгъузвал — шагьрариъ яшамиш шулайи кьабидарин улихьра дийибгънайи ва гьял апIуз удудукьрайи месэла ву. Яш дубхьнайи инсандиз учв саризра лазим даруганси гьугъубжвуру. Гизаф дюшюшариъ гьаци вудира шулу. Ужудар дару фикрарикк ккахъу кьабидарин уьзрар гъати шулу, кефйир уьргъюру.

Дагъустандиъ 300 агъзуртIан артухъ, хъа Урусатдиъ — 7 миллондиинакьан яшлуйир яшамиш шула, думу кьадарну уьлкейин агьалйирин 13% тяйин апIура. Республикайин вари кьабидар хизандиъ яшамиш шуладар, гизафдари чпин кьабивал ялгъузди адапIура, бязидар кьабидариз хъайивал апIру хулариъ яшамиш шула. Аьхюну пай агьал-йирин фикриинди, ялгъузди гъузу инсандиз дугъан багахьлуйири кюмек дапIну ккунду, хъа бязидари думу ляхин гьюкуматдин яшайиш жигьатнаан агьалйирин тереф уьбхру органариин илипура. Гьаддиз ихь уьлкейиъ ялгъуз кьабидариз кюмек тувру гъуллугъари ляхин апIура.

Дагъустандиъ РД-йин зегьметнан ва яшайишдин артмиш’валин минис-терствойин 4 агъзуртIан артухъ пишек-рари ялгъузди гъузнайи кьабидариз, сакьат касариз, жандин бегьем сагъ’вал адрудариз кюмек тувра. Дурарин зегьметну, сабурлували, хъайивал апIували варжариинди инсанарин уьмрар ярхи апIура.

«Узу хъайивал апIурайидарин арайиъ 1919-пи йисан февралин 2-пи йигъан бабкан гъахьи, Ватандин Аьхю дявдин иштиракчи Галина Сергеевна Понамарева а. Дугъан 103 йис дубхьна. Гьелбетда, гьаму яшнаъди дугъхьан чаз хъайивал апIуз удукьурадар. Дугъаз социальный гъуллугъчийин кюмек чарасуз лазим ву.
Хъа ич ляхнин читинваликан улхуруш, узу хъайивал апIурайи касди фуну вахтна дих гъапIишра, жвуван ляхнар дирчну, читинвалариз дилигди, дих апIурайирихьна хъуркьну ккунду. Гьелбетда, дурари чарасуз лазим гъахьигантIан учуз дих апIурадар. Имбуну вахтна дурариин ич пландиъ айиси улукьури шулча. Узу хъайивал апIурайидар узуз багъри инсанарси духьназуз. Ялгъузди яшамиш шулайи кьабидар учуз ккилигурайиваликан гьаммишан кIваинди шулзуз.

Учу хъайивал апIурайи яшлуйириз варитIан гизафси сюгьбатар гъахуз ккунди шулу. Дурари чпин веледарикан, худларикан ихтилатар апIуру, дурарин хъуркьуваларикан ктибтуру, амма дурарихьна яшамиш хьуз гъягъюз ккундар. Хъа учура дурар ккарцури шулча, кьаби дархьиди, веледарин хъуркьувалар дярякъди гъийихдар кIваин апIури, ялгъузваликан фикрар ярхла апIуз кюмек туври, ич гъуллугънан вазифйир тамам апIури шулча», – кIура ич сюгьбатнаъ Каспийск шагьриъ лихурайи социальный гъуллугъчи, ихь ватанагьли Светлана Кьасумовайи.
Накь Светлана Кьасумовайиз, чав гизаф йисари баркаллу зегьмет зигбаз, чан вазифйир заан жавабдарвалиинди тамам апIбаз лигну, РД-йин Каспийск шагьриъ айи КЦСОН ГБУ-йин дирекцияйин терефнаан Гьюрматнан грамота тувну.

Мялум вуйиганси, ихь уьлкейиъ гьар йисан июндин 8-пи йигъан социальный гъуллугъчийин йигъ къайд апIури шулу.
Думу кесп рягьятуб ву, пуз шулдар. Социальный гъуллугъчийин кюмек, хулан ляхнарилан гъадабгъну, медицинайин сабпи кюмек тувбиинакьан яркьуди гьатIабццна. Гьаддиз узу, Светлана Кьасумова кIулиъ ади, вари социальный гъуллугъчйирин гъагъи ва баркаллу зегьметназ чухсагъул кIури, дурар чпин пишекарвалин машкврихъди тебрик апIураза. Гъит Светлана Кьасумовасдар ужуб юкIв айи, жарарин дерди-балайиз кюмек тувуз гьязур вуйи инсанар ихь арайиъ артухъ ишри.

Шиклиъ: Светлана Кьасумова дявдин ветеран Галина Пономаревайихъди.