Йирси газатар ккадаркури
Пеэрин инкубаторин станция ходнаъ ипну
Ихь райондин пеэрин инкубаторин станцияйиъ 1954-пи йисандин сезондин ляхин башламиш гъахьну.
Инкубаторин станцияйиъ жинснан пеэрин сабпи 8000 мурта ккивна. Пеэрин инкубаторин станцияйи майдин вазлин 21-22-пи йигъарилан тина райондин колхозариз шюхъяр тувуз башламиш апIиди.
ГЬ. БАЛАБЕКОВ
«Колхоздин уьмур», 9-пи май 1954-пи йис, №36 (1357)
Фельетон
Маллааьлдина Гьяжиаьлди гъапIу тахсрарин касиб Ризайи гьаз жаваб туврухъа
Жулжагъ гъулан С.Сулеймандин цурнахъ хъайи колхоздин парторганизацияйин секретарь, МТФ—йин заведующий Маллааьлдиз аьжайиб саб пис хасият а. Дугъриданда чан тахсрар жарариин илирчуб, жамааьтди адагъу гьюкмар чIур апIуб, коллективдихьан жаради чав чан кIулъинди бяъзи ляхнар апIуб ва гьацдар жара аьмлар Маллааьлдиз хас ву.
Колхоздин дугъру член Риза сад швнуд йисан колхоздин марччарихъ гъушну. Саб ражари Ризайихьан дургу 2 чарва Жулжундиф гъулан Мурадлин чарвйиригъ гъидихъну. Колхоздин тIамгъа кайч гьаму кьюб чарва гьякьикьатди колхоздиндар вуйиб райондин суддина силисдин органарира субут гъапIну. Колхоздин дургу чарвйир агуб, дурарин гъайгъу зигуб зав МТФ — Маллааьлдин чан вазифа хьпаз дилигди дугъу начра дарди, му чарвйпр колхоздиндар дар кIури гьарай aпIypa. Гьаму чан тахсир Ризайиин илипуз гьяракат aпIypaйи Маллааьлдин ляхнар гъяркъю жамааьтар гизаф мягьтал духьна. Колхоздин чарвйир, колхоздиндар дар кIури Маллааьлди шагьидвал aпIypa кIури касиб Ризайин фу тахсир вухъа?
Жамааьтдин пай кайи 1260 манат пул. Гьаму пул Маллааьлдихъ хъайи растрата ву ва думу дугъкан кадагъбан гьякьнаан уьмуми собраниейин кьарар а. Гьаму пулин ерина Малла-аьлдин тахил колхоздин складдиъ дебккну хайлин вахт гъахьну. Амма МТФ —йин заведующий, парторганизацияйин секретарь Маллааьлдин ибаъ жамааьтдин кьарар учъундар, я дугъаз колхоздин правление, председатель, бухгалтер аьгъю ахьундар.
Колхоздин председатель юл. Кьасимов больницайиз гъушиган председательвалин вазифа Маллааьлди кIулиз гъахури гьахьну, гьадмуган дугъу жамааьтдин кьарар чIур дапIну, растратайин ерина дебккнайи чан тахил тувбан гьякьнаан гергми печат илибну гьюкум адагъну.
Чахъ хъайи 1260 манат пул растрата Маллааьлди туврадар кIури, касиб Риза тахсир вуйинхъа?
Колхоздин хюндин саб агъ (жвукь) якк. Апрелин вазлин 17-диъ гъубкку колхоздин хюндин саб агъ яккун, агрономар багьана дапIну, Маллааьлди чан манфяаьтназ шиш-кабаб гъапIну кIури сар касиб Ризайи гьапIдихъа?
Маллааьлдиз хас вуйи гъилигъар айиганси, мугъан чви бригадир Гьяжиаьлдизра «магаришбегвалин» хасиятра а. Бригадир Гьяжиаьлдин ляхин цIиб, фун аьхюб ву.
Гьяжиаьлди колхоздин малар колхоздин члендихьна рягъниз гъягъюз тувишра, саб варж грамм, пеъ ва муртйир магаришди чаз тувуб тIалаб апIуру. Мугъу зи кьюрдин вахтна колхоздин саб арчлин чвуг ва колхоздин аьлафар чан танишриз арагъийин бутылкйирихъ ва пеэр-муртйирихъ тувну. Парторг Маллаааьли ва дугъан чви Гьяжиаьли гьамцдар пис ляхнариин машгъул духьну гъулаъ агитационно-массовый ляхнар тешкил апIбаз дурариз мажал адар. Маллаааьлдинна Гьяжиаьлдин халкьдин арайиъ газет урхивал, цалин газет адабгъивал кIоаълан гъушиш, урхуз-бикIуз аьйдру касиб Риза халуйи гьапIуб лазим ву?
Гьарсар инсандин зяифвалар ва гъалатIар хьуз мумкин ву. Дурарикан бахиш апIру ва дарапIру тахсрарра а. Хъа Маллааьлдина Гьяжиаьлди апIурайи тахсрарра, му тахсрариз уьлчи бисбаъ колхоздин правлениейи апIурайи зяифвал гьич хил алдабгъуз шлуб дар.
З—МУХБИР
«Колхоздин уьмур»,
16-пи май 1954-пи йис
№38 (1359)
Выпускной вечер
Гьаму йисан 22—пи июндиъ Хючна гъулан кьялан школайиъ выпускной вечер гъахьну.
Му вечериъ кьялан школайин директор юл. Къурбанов гъулхну. Дугъу чан улхбариъ 10—пи классдиъ гъурху вари 39 касди хъуркьувалариинди школа ккудукIивалин гьякьнаан мяълум гъапIну ва дурариз аттестатар тувну.
Юл. Къурбановди 10—пи класс ужудар кьиматариинди ккудукIу Ильясовдин, Гьяжимурадовдин, Аьзизовдин, Расуловдин, Мягьяммедовдин, Къирхлеровдин ужудар хъуркьуваларин гьякьнаан гъапну ва дугъу 10—пи класс ккудукIу вари юлдшариз чпин урхивал заан школйириъ давам апIувал маслааьт гъапIну.
Вечериъ гьацира ССКП-йин райкомдин секретарь юл. Къурбанов Р. ва зегьметкешарин депутатарин райсоветдин исполкомдин председателин заместитель Раджабов А. гъулхну. Дурари 10-пи класс ккудукIдариз гележегдиъ бахтавар уьмур ва уьмриъ ужудар хъуркьувалар хьивал ккун гъапIну.
Мушваъ гьацира экстерно вуди 10—пи класс ккудукIу Керимов 3., Асланбеков М., Мурадов М. ва Мукаилов Я. юлдшарира аттестатар гъадагъну.
X. ШИХМЯГЬЯММЕДОВ.
3 миллион гектар хам жилар хъаъна
АЛМА-АТА, 21-пи июнь. (ТАСС). Казахский ССР—ин колхозариъ, совхозариъ ва гьяйвнарин заводариъ 3 миллион гектар хам ва къурамит жилар хъаъна. 1954—пи йисаз тумар урзбан бадали 1.620 агъзур гектар хам ва къурамит жилар гьязур дапIна.
ЦIийи жилар хъаувал гизаф гьяракатниинди давам aпIypa, МТС—ариз ва совхозариз гъафи цIийи техника либхуз хъюгъна.
Казахстандин бушди вуйи яркьу чюллериъ мягьсулар за шула. Вари йишвариз сабси гъургъу мархьари дурар ужуйи ва гьяракатниинди за aпIypa.
«Колхоздин уьмур»,
28-пи июль 1954-пи йис
№51 (1372)
