Июндин 28-пи йигъан Хив райондин ЦБС-диъ, Украинайин сяргьятариин ислягь халкьдин маракьар ва ихтиярар уьрхбан бадали, февраль вазлин аьхирарилан башламиш дапIну кIули гъябгъюрайи хусуси метлеб айи дявдин операцияйиъ уьмрихъ мягьрум гъахьи Хив райондин ватандашарин гьюрмат уьбхбан серенжем кIули гъубхну.

 

КьатI’иди кIуруш, райондин глава Ярмет Ярметов кIулиъ ади йишвариин ерли гьюкум тешкил ва жямяаьтлугъ игьтияжар тамам апIбан гъуллугънаъ айи саб жерге вакилар райондин ругариин фаракьат дапIнайи кьягьялар Мавзудин Зульфикьаров-дин (ЧIир’ан), Гюльмягьямад Гъалабеговдин (Мажвглан), Велибег Яьгь’яевдин (Яргъ-лиан), Ремик Сялигьовдин (Чювккен) ва Ямудин Асла-новдин (Кашкентдиан) абйир-бабарихъди ва багахьлуйирихъди гюрюшмиш гъахьну.

Серенжем ачмиш апIури, гъийиху баярин гьюрмат уьбхбан шилнаъди серенжемдин иштиракчйири дурарин портретарихъ кюкйир дивну.
Гьюкуматдин маракьар уьрхбан рякъюъ Жилир-валиинди уьмриан гъушу жигьиларин абйир-бабариз, вари майил-мадатдиз башсагълувал ккун дапIну, Хив райондин глава Ярмет Ярметовди чан удучIвну улхбаъ гъи Урусатди саб жерге харижи уьлкйирин терефнаан гъаних’вал, душманвал улупбан натижайиъ читин геренар ккадаурайивал, гьадму гьисабнаан мушваъ гьюкуматдин азадвалин ва сабвалин тарих намуслувалиинди дюбхну, мюгькам гележег яратмиш апIбан мяна айивал субут гъапIну.
«Аьхиримжи йисари гъирагъдиан ухьухьна вуйи рафтарин вари шагьидар вухьа. Гьяйифки, дявдин йисарин читинвалариан намуслувалиинди удучIвну, архаинди мюгькам ва ислягь яшайиш ккабалгнайиган, гизаф хаинкрар арайиз удучIвну. Гъи ихь ватандашар нубатнан ражари душмандин, асас вуди Украинайин терефнаан ихь сяргьятарихъ яракьламиш гъахьи нацистарин, гъаншариъ дийигъуз мажбур гъахьну.

Гьяйифки, дявди баяр тувруб дар: хайлин жигьилар нацистарихъди вуйи женгариъ уьмрихъ мягьрум духьна.Шаксуз, дурар гьарсар ухьуз багьа вухьуз. Гьадму саб вахтна дурарикан гьарсар жвуван Ватандин маракьар, жвуван веледарин ислягь гележег бадали уьмриан гъушувалин гъавриъ айивали ухьуз думу дердна хажалат аьх апIуз кьувватра, сабурра тувра.
Ав, кечмиш гъахьи асас пай жигьиларин набалугъ баяр-шубар ими. Ухьу дурарин гележег мюгькамди ккабалгуз буржлу вухьа. Дагъустандин Глава Сергей Аьлимович Меликовди му жигьатнаан думу баяр-шубариз гьам аьгъюваларна илим тувбан, гьамсана сагъламвал уьбхбан гьякьнаан лазим вуйи кюмек апIбан жавабдарвал гъабхувал гьюкмин гъурулушариз табшурмиш дапIна.Ухьу гъи думу живанар чпин ИГИТ адшарин рюгьяриз лайикьлуди тербияламиш апIуз буржлу вухьа», – гъапну райондин главайи.
Федеральный ва республикайин дережайиъди гъийихдарин хизанариз кюмекар тувбан гьякьнаан серенжемдиин Хив ва Агъул районарин военком Пирмягьмад Къубачев, Пенсйирин фонднан вакил Герман Асваров ва УСЗН-дин кIулиъ айи Тигеран Къаибхановра удучIвну гъулхнийи.
«Гьелбетда, саб жюрейинра кюмекнахьан дадайиз бай, дишагьлийиз – уьмрин юлдаш, веледдиз – адаш эвез апIуз удубкьруб дар. Вушра, текрар шулза, дурар вари уьмриан Жилирвалиинди душна.

Шаксуз, ухьу душмандиин гъалиб хьидихьа. Гъалибвал гьякьвалин терефнаъ, хъа гьякьна дугъривал Урусатдин терефнаъ а. Жвуван халкьдин ислягь гележег уьбхбан шилнаъди уьмриан гъушу жигьиларин ччвурар ва дурарикан вуйи фикрар насларин мелзниин аьсрариз гъузди», -аьлава гъапIну Я.Ярметовди.
Жвуван бай Ремик Сялигьов намуслуди душмандин гъаншариъ дийигъну уьмриан гъушуваликан улхури, дугъан адаш Исрафил халуйиз гафар апIузра рягьятди алабхъурадайи. Амма дугъаз чав халис ватанпервер тербияламиш ва аьхю гъапIувалин гъавриъ айивали хажалат аьх апIуз сабур туврайи.
«Ихь абйири Ватандин Аьхю дявдин йисари, вари читинвалар намуслувалиинди табигъ дапIну, душмандиин гъалибвал гъадабгъну. Гъи ухьу, кIул ис дапIну, дурарин гьунарар ликрикк ккивуб дюз шулайинхъа?! ИкибаштIан, ваъ. Инсанди уьмрин рякъ саб ражари ккадапIуру, ва думу рякъ намуслувалиинди, жарарин тягьна ктарди ккадапIбаъ аьхю мяна а. Йиз бай Ремикра, саб жерге чан гъарашугъарси, Игитвалиинди уьмриан гъушну. Душмандин улихь юкIв усал дарапIди, жвуван юлдшар аьжалихьан дюрхну, чан жан фида апIуз фунур вушра касдихьан удукьруб дар…», – гъапнийи дугъу.

Серенжендин аьхириъ кечмиш гъахьи жигьиларин гьарсаб хизандиз муниципальный дережайиъди меценат, Хив райондин ГъванцIил гъулан вакил Баллакерим Мягьямедовди 100 агъзур манатдин материальный кюмек тувну.
Аьлава апIураза: ав, пашманвалин тялукь серенжемар гъахувал аьхиримжи вахтна Урусатдин саки вари пIипIариъ кьувватнаъ ипна. Шаксуз, хажалатнан мярака гъабхувал гъагъи ляхин ву, амма ухьу жвуван Игитарикан гьаммишанлугъди марцци фикрар уьрхюз буржлу вухьа. Гъит ихь кьягьял жигьиларин гьунарар давди гъюдудучIвуз аьзиз Аллагьди кьувват туври! Гъит дюн’я ислягь дубхьну, гьарсар дадайи чан бай сагъ-саламатди хабаъ тIаъру йигъар Аллагьди багахь апIри!