Ватандин Аьхю дявдиъ Гъалибвал гъадабгъу Игитарин насларра чпиз ухшарвал айидар ву.

 

 

Украинайиъ хусуси метлеб айи дявдин операция гъюбгъюри, магьа юкьуб ваз тамам духьна. Му вахтнан арайиъ душваъ иштирак’вал апIурайи дявдин гъуллугъчйирин багахьлуйири фукьан дерд-хажалат зигураш, гъавриъ хьуб читин дар. Иллагьки сифте вахтари, думу ккебгъну имиди, му аьгьвалат фикриъ удрубшди, дурар йишвну — нивкIухъ, йигъну — апIруб-дарапIрубдихъ мягьрум духьну гъахьну. Хъа сабпну мициб бедбахтвалихъди раст гъахьи жигьиларин, дявдин гъуллугъчйирин кIваан фу гъябгъюри гъабхьнуш, сар АллагьдизтIан мялум дар.

Юкьуб вазлин арайиъ дявдин операцияйиъ иштирак’вал дапIну, гьамусяаьт рягьятвал гъадабгъуз ватандиз гьаънайи ихь ватанагьли Аьбдуллагьдихъди (ихь бализ гаф дархьбан ва дугъан хатIасузвал уьбхбан бадали, ччвур дигиш дапIна) улихьнаси сюгьбат гъубхунза.

— Аьбдуллагь, уву, гизаф йисари ихь ватандин хатIасузвал уьбхбан гъаразнаъ дийигъну, сифте яв ватандаш’валин, хъасин гъуллугънан буржи лайикьлуди тамам апIурава. Учву апIурайи ляхин, заан жавабдарвал тIалаб апIрубси, ичв уьмриз, сагъламвализ къурхулуб вуйибра аьгъяхьуз. Хусуси метлеб айи дявдин операция ккебгъруваликан учвуз улихь ккимиди аьгъяди гъабхьунчвуз?
– Сифте учу, вердиш апIуз кIури, Ростовдиз гьаънийи, хъа гьадушв’ан – Крымдиз. Крымдиъра вердиш апIбан серенжемар давам гъахьнийи. 24-пи февралиъ гвачIнин ухди гюллйирин учIру сесерин гъугъ абхънийи, ва учу тревогайиинди уч дапIну, хусуси метлеб айи дявдин операция ккебгънайиваликан мялум гъапIнийи. Дишлади вари женг гъабхбан тамам гьязурлуг’вализ духну, 25-пи февралиъ ихь сяргьятарилан Украинайин жилиинди улдучIвнийча. Сяргьятарра бегьемди дадаргънайи, рякъюн жюрбежюр йишварихь уларикк украинайин дургнайи танкар, БМП-йир, гъийиху эскрар ккахьуйи.

– Мициб аьгьвалатнахьна фици вердиш гъахьунчва? Рюгьнан зяифвал улупрудар гъахьнийин?

– Сифте йигъари, гьелбетда, ич улихь шулайи гьядисйир чIуру нивкIси гьибгъри, думу гьякьикьат вуйиб фикриъ убшудайи. Хъасин, дидихьна вердиш шули, гьяракатар умудлуди кIули гъахуз хъюгънийча.
Сифте варидиз вари терефариан лап читинди вуйи: яркврар-чIурариъ дахъри-гъудужвури (думуган кьюрдун вахт вуйи), тяминвалин терефнаанра учухь хьайибдихъди мадар апIури, яваш-явашди улихьна гъягъюри гъахьунча. Гьамци гъулахъди-гъул, шагьрихъди — шагьур азад апIури гъягъруган, кми-кмиди минометдин йивбариккра ккахъри шуйчу.
Аьлакьайиз удучIвуз затра мумкинвал адайи, фицики урусатдин мобильный аьлакьайиз удучIвубси, завуъ фу-вуш ачмиш шуйи. Тму терефну гизафси къадагъа дапIнайи кассетный ракетйир йивури шуйи.

– Аьбдуллагь, учву, урусатдин эскрар, Украинайин халкьди фици къаршуламиш апIури гъахьнийи? Учву гъювалиин дурар разиди шуйин, дарш дурари наразивал улупуйин?

– Учу гъяркъиган гизафдари чпин разивал улупуйи. Мисалназ, сар хьуцIур йисан яшнаъ айи украинжвуву, ихь эскрарилан хабар алдагъну, «чухсагъул учвуз, йиз баяр» кIури, хилариз макар апIуз хъюгънийи.
Хъа бязидар ич метлеб чпи нациствалихьан азад апIуб вуйивалин гъавриъ духьнадайи. Учу дурарикан гиран апIудайча. Дурар къанажагълу гьялнахьна духнайидарси гьиргъуйчуз. Гьяйифки, фашизмди Украинайиъ «кюкю адабшвурайиб» ачухъди рябкъюйи. Ихь уьлкейин главнокомандующийди адабгъу къарар чарасуз лазим вуйиб ва вахтназ гъилигуб гъабхьну. Дидин гьякьнаан саринра шак гъюрадар. Дугъу ич улихь дивнайи вазифа тамамди кIулиз адабгъуз гьязур вуча.

— Баракаллагь, аферин! Гъит учвуз Аллагь кюмек ишри, вари баяр сагъ-саламатди чпин хизанарихьна кьяляхъ гъюри. ЦIибди «эл хътабгъуз» ватандиз гьаайиз улихьна фуну йишваъ гъуллугъ гъабхури гъахьнийчва ва душван аьгьвалат фициб вуйи?

– Аьхиримжи вахтна учу Донецкдинна Запорожский областарин сяргьятарихъ гъуллугъ апIурайча. Ич вазифара – азад дапIнайи шагьриъ къайда дебккувал, ерли агьалйирин хатIасузвал уьбхювал, нацистарин гьяракатарин улихьишв бисувал вуйи. Аьгьвалат гьелелиг саламатуб дайи, вахт-вахтарик йивбар давам шуйи.

– Сюгьбат гъабхбаз чухсагъул!

Суалар хъана фикриъ айишра, рягьятвал гъадабгъуз гьаънайи бализ дурар тувуз гъабхьундайзухьан. Дугъазра ктибтуз гъагъиди вуйиб аьгъю шуйи. Амма саб гьякьикьатдин гъавриъ гъахьунза. Ватандин Аьхю дявдиъ Гъалибвал гъадабгъу Игитарин наслар чпиз ухшарвал айидар, дурариз лайикьлудар ву. Ва гъи, думу дявдин кьяляхъ 77 йис дубшнашра, гьадмуганси, ватанди чпин улихь диву вазифа гъийин наслира намуслуди, кьягьялвалиинди кIулиз адабгърубдин саб шак адар. Гъит дидихьна вуйи рякъ ягъурлуб, хатIасузвалинуб ва рягьятди ккадапIруб ибшри!