Йирси газатар ккадаркури
КIваълан душнайи тикилишар
1966-пи йисан жилар тIурчIвбаан хайлин бедбахтвалар гъахьнийи. Му жилар тIурчIвбаан Халгъарин халачйирин фабрикайин Кюрягъ гъулаъ айи цех абхъну. Му вахтналанмина хайлин йисар гъушну. Халгъарин халачйирин фабрикайин руководителари му бедбахтвалин гьядиса фикирназ гъадабгъну Кюрягъ гъулаъ цIийи цех дибуз мясляаьт aпIypy.
Дурари 32 метр ярхишнаъ, 12 метр яркьушнаъ ва 4 метр ягълишнаъ ади цехдин цалар тикмиш aпIypy. Гьелбетда, я зиин йишв илдиривку ясан цалар катIну адру хулариъ халачйир урхури дусуб читин ву. Думу цIийи тикилишариина 700 штук шифер, 17 улдар, 7 урчIар, исикк ккабхьуз 31 кубаметр кьулар духьну архаин духьна. Цех илибкуз ялгъуз саб швнуб штук бурузар лазим ву. Амма му бурузар хуз Халгъарин халачйирин фабрикайин руководителари гьич саб фикирра туврадар. Гьацира «Труд» совхоздин руководителарикьан му ляхин фикирназ гъадабгъну, ярквраан ацIу гакIвлар алдатIуз мандат тувнийиш пис даршлийи. Гьаму метлеблу ляхин саб-швнуб ацIу гакIвлихъ лигури дийибгъна. Эгер дурар гьязурди вуйиш, Кюргъярин жямяаьтди жикъи вахтна му цехдик шифер кивну ккудубкIидийи.
Дупну ккундуки, Кюрягъ гъулаъ гьарган ужуб качествойин продукция гьясил aпIpy ковровщицйир цIиб адар. Дурарикан Эсбет Къурбанова, Муминат Гюлягьмедова ва саб жерге жарадар гьисаб шулу. Му дирбаш ковровщицйири урчIвубпи хьуд йисандин пландин садпи йисан 12 вазлиз улупнайи план 10—11 вазли ужуб качествойин продукция гьясил апIбиинди тамам гъапIну.
Мумкин вуки, эгер мурари халачйирин мастерскайиъ продукция гьязур апIурайиш, хъана зурба хъуркьувалар гъазанмиш апIуз.
Му гъулан рабочйир 1966-пи йисхъанмина халачйир урхру цех адарди читин гьялнаъ а. Мици вуйиган, мурари чпин хулари гьязур гъапIу продукция анжах исккан качествойинуб шулу.
Аьгъю дубхьну ккундуки, хуланна гьарсаб терефнаан рягьятвалар айи цехдин шараитар сабстар шулдар. Хулаъ халачи убхруган саб сяаьтдин арайиъ саб-швнуб ражари дидхъан гъудужвуб алабхъуру. Гьаддиз хулаъ гъубху халачйирин качество асккануб шулу. Миди гьам государствойиз ва гьамсана рабочйириз зарар тувру. Халгъарин халачйирин фабрикайин руководителари думу фикриз гъадабгъуб лазим шулу.
3. РАМАЗАНОВ.
Жвули гъул.
Шадвалиинди къайд гъапIну
ХустIларин школайиъ ЦIийи йисандин машквраз гьич даругансиб ужуб гьязурлуг гъубхнийи. Утканди дабалгнайи елкайин улихь школайиъ урхурайидариз тешкил гъапIу викторинайикан асас вуди пуб ужу ву. Лотереяйин билетар тарагъбаъ Гь. Гьясановди заан бажаранвал улупну. Мялимарина урхурайидари 780 6илет гъадагънийи. Дурарикан гизафдариз жюрбежюр шей’эр уйнамиш гъахьнийи.
ГЬ. ГЬЯСАНОВ.
«Табасарандин нурар» №2(3747)
4 январь 1972-пи йис
